དེང་རབས་སློབ་གསོའི་ལག་རྩལ་གྱི་བྱེད་ཐབས་སྤྱད་དེ་བོད་རྒྱ་སྐད་གཉིས་སློབ་ཁྲིད་གང་ལེགས་སྤེལ་བ་དང་། བོད་ལྗོངས་དང་མཚོ་སྔོན། སི་ཁྲོན། ཀན་སུའུ། ཡུན་ནན་བཅས་ལྗོངས་ཞིང་ལྔའི་བོད་ཁུལ་གྱི་སློབ་གྲྭ་ཆུང་འབྲིང་གི་སྐད་གཉིས་དགེ་རྒན་རྣམས་ཀྱི་སློབ་གསོ་ཆ་འཕྲིན་ཅན་གྱི་ཆུ་ཚད་མཐོ་འདེགས་བྱས་ནས། སློབ་གསོ་སློབ་ཁྲིད་ཀྱི་སྤུས་ཚད་སྔར་ལས་ཀྱང་ཇེ་མཐོར་གཏོང་ཕྱིར། ལྗོངས་ཞིང་ལྔའི་བོད་ཀྱི་སློབ་གསོའི་མཉམ་ལས་འགོ་ཁྲིད་ཚོགས་ཆུང་གཞུང་སྒྲུབ་ཁང་(五省区藏族教育协作领导小组办公室)གིས་གཙོ་སྒྲུབ་མཛད་པའི་ལྗོངས་ཞིང་ལྔའི་བོད་རྒྱ་སྐད་གཉིས་སྨྱན་མང་ཁྲིད་ཆས་འགྲན་སྡུར་སྐབས་གསུམ་པ་དེ་མི་འགྱངས་བར་ཕྱོགས་ཡོངས་ནས་སྤེལ་འགོ་བརྩམ་རྒྱུ་ཡིན།
རེབ་འདིའི་འགྲན་སྡུར་ནི་ཀྲུང་གོ་བོད་ཀྱི་སློབ་འབྲིང་དྲ་བས་（http://www.tibetanms.cn/）འགྲན་སྡུར་དྲ་ཚིགས་ཀྱི་འགན་ཁུར་ནས་ལྗོངས་ཞིང་ལྔའི་རྒྱ་ཆེ་བའི་བོད་རྒྱ་སྐད་གཉིས་སློབ་གྲྭ་ཆུང་འབྲིང་གི་དགེ་རྒན་ལས་སློབ་ཆུང་གི་བོད་ཡིག་དང་དམའ་འབྲིང་གི་བོད་ཡིག མཐོ་འབྲིང་གི་བོད་ཡིག རིག་གནས་ཚན་ཁག༼བསམ་བློ་ཆབ་སྲིད་དང་། ལོ་རྒྱུས། ས་ཁམས། དབྱིན་ཡིག༽ རང་བྱུང་ཚན་རིག་གི་ཚན་ཁག༼ རྩིས་རིག དངོས་ལུགས། རྫས་འགྱུར། སྐྱེ་དངོས།༽ བསླབ་ཚན་ཆུང་གསུམ་གྱི་ཚན་ཁག་༼ཆ་འཕྲིན་ལག་རྩལ། རོལ་དབྱངས། ལུས་རྩལ། མཛེས་རྩལ།༽བཅས་ཚན་ཁག་དྲུག་གི་ཕྱོགས་སུ་སྨྱན་མང་ཁྲིད་ཆས་སྡུད་སྒྲིག་བྱེད་པ་དང་། ལྗོངས་ཞིང་ལྔའི་བོད་ཀྱི་སློབ་གསོའི་མཉམ་ལས་འགོ་ཁྲིད་ཚོགས་ཆུང་གཞུང་སྒྲུབ་ཁང་གིས་ལྗོངས་ཞིང་ལྔའི་སློབ་ཁྲིད་ཆེད་མཁས་མི་སྣར་གདན་དྲངས་ཏེ། སི་ཁྲོན་ཞིང་ཆེན་རྔ་བ་ཁུལ་རྔ་བ་རྫོང་སྐད་གཉིས་བཅའ་སྡོད་ཆ་ཚང་སློབ་འབྲིང་གིས་ཁྲིད་ཆས་དཔྱད་སྡུར་གྱི་འགན་ཁུར་ནས་དཔྱད་འདེམས་བྱ་རྒྱུ་ཡིན། འགྲན་སྡུར་སྐོར་ཀྱི་འབྲེལ་ཡོད་ཇུས་གཞི་དང་བརྡ་ཐོ་སོགས་ཀྱི་དོན་ཚན་ཞིབ་ཕྲ་ཟུར་དུ་ཀྲུང་གོ་བོད་ཀྱི་སློབ་འབྲིང་དྲ་བར་རབ་དང་རིམ་པ་ལྟར་བརྡ་སྦྱོར་གཏོང་རྒྱུ་ཡིན་ལ་རྒྱ་ཆེ་བའི་དགེ་རྒན་རྣམས་ཀྱིས་དོ་སྣང་གནང་བར་འཚལ།
༄༅།།ལྗོངས་ཞིང་ལྔའི་བོད་རྒྱ་སྐད་གཉིས་སྨྱན་མང་ཁྲིད་ཆས་འགྲན་སྡུར་སྐབས་གསུམ་པསྤེལ་རྒྱུ་ཡིན།
ཡོང་ཁུངས། : བོད་ཀྱི་སློབ་འབྲིང་དྲ་བ། སྤེལ་དུས། : 2015-07-17 10:21:26
རྩོམ་སྒྲིག་པ། : lalong1985
