རྒྱུས་ལོན་བྱུང་བ་ལྟར་ན། མཚོ་སྔོན་ཡུལ་ཤུལ་རྫོང་རག་ཤུལ་ལུང་པ་ནས་སྐྱེས་ཤིང་འཚར་ལོང་བྱུང་བའི་ན་གཞོན་གཞས་པ་རག་ཤུལ་འཆི་མེད་དོན་གྲུབ་ཀྱི་གསར་བརྩམས་གླུ་གཞས་ཆེད་བསྒྲིགས《ལང་ཚོའི་གླུ་སྐད》ཅེས་པ་མི་འགྱངས་པར་འགྲེམ་སྤེལ་བྱེད་རྒྱུ་རེད། ཆེད་བསྒྲིགས་འདིར་ཁྱོན་གླུ་གཞས་ཚན་པ12བསྡུས་ཤིང་། དེའང་མང་ཚོགས་ཁྲོད་གྲགས་འགུལ་ཅུང་ཡོད་པའི་གཞས་མཁན་གཞན་འགའ་ཆེད་ཞུས་ཀྱིས་མཉམ་ལེན་དང་རོགས་འདོན་བྱས་པ་སོགས་ད་སྐབས་བོད་ཀྱི་ཡུལ་ལུང་བྱེ་བྲག་པར་ཁྱབ་བཞིན་པའི“བསྐྱར་ལེན་ཆེད་བསྒྲིགས”དང“བསྟོད་གླུ་ཕྱོགས་བསྡུས”དག་དང་བསྡུར་ན་ངོ་བོའི་ཆ་ནས་ཚིག་དང་དབྱངས་མང་ཚོགས་ཀྱི་སྒྱུ་རྩལ་མྱོང་རོལ་གྱི་ཆུ་ཚད་དང་འཚམ་པར་གསར་རྩོམ”བྱས་ཤིང་། རྣམ་པའང་འཚོ་བ་དང་ཐག་ཉེ་བའི་བརྗོད་དོན་ཕུན་སུམ་ཚོགས་པ། རོལ་དབྱངས་དང་། འཁྲབ་སྟོན། སྒྲིག་སྦྱོར་སོགས་ཀྱང་གནའ་དེང་ཟུང་སྦྲེལ་གྱི་ཁྱད་ཆོས་གཙོར་བཟུང་པ་བཅས་ཀྱི་མཐོང་སྣེ་འབུར་དུ་ཐོན་ཡོད། མདོར་ན་བོད་ཀྱི་གླུ་གཞས་སྒྱུ་རྩལ་གྱི་དོ་ར་ཡངས་པོར་མཚོན་ན་ཆེད་བསྒྲིགས་འདིའི་ཚིག་དབྱངས་རོལ་གསུམ་དང་སྒྲིག་སྦྱོར་ཕབ་བསྐྲུན་སོགས་ཐུན་མིན་ཁྱད་འཕགས་ཤིག་ཡིན་པའི་སྤོབས་པ་མེད་ཀྱང་། འུ་ཚོའི་ཁོར་ཡུག་བྱེ་བྲག་པའི་ངོས་ནས་བཤད་ན་གླུ་གཞས་ཀྱི་ཁ་ཕྱོགས་གསར་ཙམ་དང་གཞོན་སྐྱེས་ཚོར་ཡར་སྐུལ་གྱི་ནུས་པ་གང་འཚམ་ཐོན་པའི་ཡིད་ཆེས་བཅོལ་ཡོད།
རག་ཤུལ་འཆི་མེད་དོན་གྲུབ་ཀྱི་གསར་བརྩམས་གླུ་གཞས་ཆེད་བསྒྲིགས《ལང་ཚོའི་གླུ་སྐད》།
འདི་ནི་གཞས་པ་ཁོས་ལང་ཚོ་གླུ་ངག་ལ་བསྟིམ་ཞིང་འཚོ་བ་སྒྱུ་རྩལ་གྱིས་སྐྱེལ་བའི་ས་མཚམས་ལྟ་བུའི་མི་སྒེར་ཕ་སྐད་གླུ་གཞས་ཆེད་བསྒྲིགས་ཐོག་མ་དེ་ཡིན། མ་ཟད་ཆེད་བསྒྲིགས་འདི་ནི་དམེ་རིན་ཆེན་དང་ཡོན་ཏན་མགོན་པོ། ཡེ་ཤེས་སེང་གེ་སོགས་བོད་ཀྱི་ཆེད་ལས་རོལ་མཁན་དག་མཉམ་རུབ་ཀྱིས་བཟོས་ཤིང་། ཡུལ་ཤུལ་གཡག་རྒོད་སྒྲ་བརྙན་སྒྲིག་སྦྱོར་ཁང་ནས་སྒྲ་བརྙན་ལེན་སྦྱོར་གྱིས་འགྲེམ་སྤེལ་བྱེད་པའི་མི་སྒེར་ཆེད་སྒྲིགས་ཐོག་མ་དེའང་ཡིན་པ་རེད།
རག་ཤུལ་འཆི་མེད་དོན་གྲུབ་ཀྱི་གསར་བརྩམས་གླུ་གཞས་ཆེད་བསྒྲིགས《ལང་ཚོའི་གླུ་སྐད》།
དེ་ཡང་ཆེད་བསྒྲིགས་འདི་ཉིད་སྤྱི་ལོ2015ལོའི་ཟླ་4པའི་ནང་བོད་མདོ་དབུས་ཁམས་གསུམ་གྱི་ས་ཆ་སོ་སོའི་ཚོང་རར་དངོས་སུ་འགྲེམ་རྒྱུ་གཏན་ཁེལ་བྱས་པས་རྒྱ་ཆེའི་སྤུན་གྲོགས་ཚོའི་དགའ་བསུ་ཐོབ་པར་ཞུ།
༄༅།།རག་ཤུལ་འཆི་མེད་དོན་གྲུབ་ཀྱི་གསར་བརྩམས་གླུ་གཞས་ཆེད་བསྒྲིགས《ལང་ཚོའི་གླུ་སྐད》ཅེས་པའི་འགྲེམ་བརྡ།
ཡོང་ཁུངས། : མཚོ་སྔོན་པོ་དྲ་བ། སྤེལ་དུས། : 2015-03-26 16:22:21
རྩོམ་སྒྲིག་པ། : lalong1985
