《དག་ཡིག་གསར་བསྒྲིགས》དག་བཅོས་མའི་འགྲེམ་སྤེལ་ཚོགས་འདུ་ཟླ4བའི་ཚེས11ཉིན་ཏེ་རེས་གཟའ་སྤེན་པར་མཚོ་སྔོན་ཟི་ལིང་གྲོང་ཁྱེར་ཞིན་ཧྭ་དཔེ་ཁང་དུ་བསྡུ་རྒྱུ་རེད། 《དག་ཡིག་གསར་བསྒྲིགས》ནི1973ལོར་ཉེ་རབས་བོད་ཀྱི་མཁས་དབང་བསམ་གཏན་ལགས་ཀྱིས་གཙོ་སྒྲིག་གི་འགན་བཞེས་ཤིང་དགེ་བའི་བཤེས་གཉེན་བཀྲ་ཤིས་རབ་བརྟན་དང་གྲགས་པ། འགྱུར་མེད་སོགས་རྩོམ་སྒྲིག་གི་བྱ་བར་ཞུགས་ཏེ། ལོ་ངོ་བདུན་ལྷག་ལ་དཀའ་སྤྱད་འབད་བརྩོན་བྱས་མཐར1979ལོར་དངོས་སུ་པར་དུ་བསྐྲུན་ཅིང་བགྲང་བྱ་སུམ་ཅུ་ལྷག་གི་རིང་ལ་དེབ་གྲངས་ཁྲི60ལྷག་འགྲེམ་སྤེལ་བྱས།
《དག་ཡིག་གསར་བསྒྲིགས》དག་བཅོས་མ།
ཐེངས་འདིར་མཚོ་སྔོན་མི་རིགས་དཔེ་སྐྲུན་ཁང་གིས་དུས་ཀྱི་འཕེལ་འགྱུར་དང་སྤྱི་ཚོགས་ཀྱི་དགོས་མཁོ་ལས་བེད་སྤྱོད་མཁན་གྱི་དགོངས་འཆར་ལྟར་ཆེད་ལས་མཁས་པ་གདན་དྲངས་ནས་དག་ཡིག་འདི་ལ་ལེགས་བཅོས་མཛད་དེ་རྒྱ་ཆེའི་སྐལ་ལྡན་བུ་སློབ་དག་གི་སྤྱན་ལམ་དུ་བསྟར།
དག་ཡིག་གསར་སྒྲིག་དག་བཅོས་མ་སྒྲིག་གཙོ་འགྱུར་མེད།
《དག་ཡིག་གསར་བསྒྲིགས》དག་བཅོས་མ་འདིའི་ནང་རྒྱུན་སྤྱོད་ཀྱི་ཐ་སྙད1900ལྷག་གསར་དུ་བསྣན་ཡོད་པ་དང་། དུས་རབས་འཕེལ་རྒྱས་ཀྱི་འགྲོས་དང་མཐུན་ཞིང་ཀློག་པ་པོའི་འདོད་བློ་དང་བསྟུན་ལ། ཀློག་པ་པོའི་དགོས་མཁོར་དམིགས་ནས་དེབ་ཚད32ཅན་དང64ཅན་གཉིས་པར་སྐྲུན་བྱས་པ་དང་དཔེ་དེབ་ཀྱི་བཟོ་སྟངས་ལེགས་ཤིང་སྤུས་ཀ་བཟང་བ་ཡིན།
༄༅།།《དག་ཡིག་གསར་བསྒྲིགས》དག་བཅོས་མའི་འགྲེམ་སྤེལ་ཚོགས་འདུ་བསྡུ་རྒྱུ།
ཡོང་ཁུངས། : མཚོ་སྔོན་པོ་དྲ་བ། སྤེལ་དུས། : 2015-04-10 11:00:15
རྩོམ་སྒྲིག་པ། : admin