མདོ་འཛིན་པ།
སྤྱི་ཟླ5བའི་ཚེས9ཉིན་གྱི་དགོང་མོར། ཀྲུང་དབྱང་མི་རིགས་སློབ་ཆེན་བོད་རིག་པ་ཞིབ་འཇུག་སློབ་གླིང་དང་གངས་ལྗོངས་རིག་གནས་ཡར་སྐུལ་ཚོགས་པ་གཉིས་ཀྱིས་གཙོ་སྒྲུབ་དང་། ཀྲུང་དབྱང་མི་རིགས་སློབ་རོལ་དབྱངས་སློབ་གླིང་དང་། མི་རིགས་རིག་པ་དང་སྤྱི་ཚོགས་རིག་པའི་སློབ་གླིང་སོགས་ཀྱིས་རོགས་སྒྲུབ་གནང་བའི་ཀྲུང་དབྱང་མི་རིགས་སློབ་ཆེན་གྱི་སྐབས་དང་པོའི་བོད་གཞས་ཁུ་བྱུག་དབྱངས་སྙན་གྱི་རྟིང་རྩོད་འགྲན་བསྡུར་ཀྲུང་དབྱང་མི་རིགས་སློབ་ཆེན་དུ་ཚོགས་ཤིང་། བོད་རིགས་གླུ་བ་གྲགས་ཅན་པདྨ་བསམ་གྲུབ་དང་། གདུགས་དཀར་ཡག ཚེ་རིང་བསམ་གྲུབ། བསྟན་འཛིན་དབང་འདུས་སོགས་བོད་གཞས་ཁུ་བྱུག་དབྱངས་སྙན་གྱི་དཔྱད་འདེམ་པར་གདན་ཞུ་བྱས།
སྙན་མོ་དབྱངས་ལ་འགུག་པ།
རྟིང་རྩོད་འགྲན་བསྡུར་དུ་བསྟན་འཛིན་ཡེ་ཤེས་དང་། ཟླ་བ་དོན་གྲུབ། ཡར་འཕེལ། བློ་བཟང་བསྟན་འཛིན། སྐྱིད་འཛོམས། བསོད་ནམས་ཆོས་སྒྲོན་བཅས་བོད་རིགས་སློབ་མ6དང་། ཡུས་ཙེ་ཧྭ་ཞེས་པའི་རྒྱ་རིགས་སློབ་མ1བཅས་བསྡོམས་པས་སློབ་མ7ཡོད་ཅིང་། ཁོ་ཚོས་སྔ་གཞུག་ཏུ་འགྲན་བསྡུར་རིམ་པ་གསུམ་བྱས་རྗེས་བསྟན་འཛིན་ཡེ་ཤེས་ལ་ཨང་དང་པོ་དང་། བསོད་ནམས་ཆོས་སྒྲོན་ལ་ཨང་གཉིས་པ། ཟླ་བ་དོན་གྲུབ་ལ་ཨང་གསུམ་པ། དེ་མིན་འགྲན་ཞུགས་གླུ་བ་གཞན་དག་ལ་ཕུལ་བྱུང་བྱ་དགའ་གནང་བ་རེད།
ཀྲུང་དབྱང་མི་རིགས་སློབ་ཆེན་གྱི་སྐབས་དང་པོའི་བོད་གཞས་ཁུ་བྱུག་དབྱངས་སྙན་གྱི་རྟིང་རྩོད་ལ་ཞུགས་པའི་སློབ་རའི་གླུ་བ།
