སྤྱི་ཟླ༦པའི་ཚེས༡ཉིན་ཁུལ་དམངས་ཆེན་རྒྱུན་ལས་ཨུ་ཡོན་ལྷན་ཁང་དང་ཁུལ་སྲིད་གཞུང་གཉིས་ཀྱིས་དར་མདོར༼དཀར་མཛེས་བོད་རིགས་རང་སྐྱོང་ཁུལ་བོད་ཀྱི་སྐད་དང་ཡི་གེའི་སྐོར་གྱི་སྲོལ་ཡིག༽དོན་འཁྱོལ་མཐར་ཕྱིན་བྱེད་པའི་གསར་འགྱུར་ཁྱབ་བསྒྲགས་ཚོགས་འདུ་འཚོགས།༼སྲོལ་ཡིག༽འདི་ནི་རང་ཁུལ་གྱིས་བཟོ་བཅོས་བྱས་ནས་གྲོས་འཆམས་བྱུང་བའི་བོད་ཀྱི་སྐད་ཡིག་ལ་སློབ་སྦྱོང་དང་ཞིབ་འཇུག བེད་སྤྱོད། དོ་དམ། འཕེལ་རྒྱས་བཅས་འགན་སྲུང་དང་སྐུལ་འདེད་བྱེད་པ་དང་། བོད་ཀྱི་སྐད་ཡིག་ཚད་ལྡན་ཅན་དང་ཚད་གཞི་ཅན།ཆ་འཕྲིན་ཅན་བཅས་འཛུགས་སྐྲུན་ལ་སྐུལ་འདེད་བྱེད་པའི་ས་གནས་ཅན་གྱི་ཁྲིམས་སྲོལ་ཞིག་ཡིན་པས།རང་ཁུལ་གྱི་མི་རིགས་ཀྱི་སྐད་དང་ཡི་གེའི་ལས་དོན་དེ་འཕེལ་རྒྱས་ཀྱི་དུས་རིམ་གསར་པ་ཞིག་ལ་བསླེབས་པ་དེ་མཚོན་པ་རེད། ཁུལ་དམངས་ཆེན་གྱི་ཀྲུའུ་རེན་གཞོན་པ་ཧུའུ་ཏེན་མིང་དང་ཁུལ་སྲིད་གཞུང་གི་ཁུལ་དཔོན་གཞོན་པ་ཧྲུའུ་ཝུན་སོགས་འབྲེལ་ཡོད་འགོ་ཁྲིད་དག་ཚོགས་འདུར་ཞུགས་པ་དང༼སྲོལ་ཡིག༽དོན་འཁྱོལ་མཐར་ཕྱིན་བྱེད་པར་གལ་ཆེའི་བླང་བྱ་བསྟན་པ་རེད། ༼དཀར་མཛེས་བོད་རིགས་རང་སྐྱོང་ཁུལ་གྱི་བོད་ཀྱི་སྐད་དང་ཡི་གེའི་སྐོར་གྱི་སྲོལ་ཡིག༽ནི་སྤྱི་ལོ༢༠༡༥ལོའི་ཟླ༡པོའི་ཚེས༢༥ཉིན་དཀར་མཛེས་བོད་རིགས་རང་སྐྱོང་ཁུལ་སྐབས་བཅུ་གཅིག་པའི་མི་དམངས་འཐུས་མི་ཚོགས་ཆེན་གྱི་གྲོས་ཚོགས་ཐེངས་བཞི་པའི་ཐོག་གྲོས་འཆམས་བྱུང་ཞིང་།༢༠༡༥ལོའི་ཟླ༤པའི་ཚེས༡ཉིན་སི་ཁྲོན་ཞིང་ཆེན་སྐབས་བཅུ་གཉིས་པའི་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་ཐེངས་ལྔ་པའི་ཐོག་ཆོག་མཆན་ཐོབ་པ་དང་།༢༠༡༥ལོའི་ཟླ་བ༦ཚེས༡ཉིན་ནས་བཟུང་ལག་ལེན་བསྟར་རྒྱུ་ཡིན་པ་རེད། ༼དཀར་མཛེས་བོད་རིགས་རང་སྐྱོང་ཁུལ་བོད་ཀྱི་སྐད་དང་ཡི་གེའི་སྐོར་གྱི་སྲོལ་ཡིག༽ལ་དོན་ཚན་བཞི་བཅུ་ཞེ་གཅིག་ལ་བགོས་ཡོད་ཅིང་།འདི་ཉིད་ལག་བསྟར་བྱེད་པ་ནི་རང་ཁུལ་གྱིས་ཏང་དང་རྒྱལ་ཁབ་ཀྱི་མི་རིགས་ཀྱི་སྐད་དང་ཡི་གེའི་ཐད་ཀྱི་བྱེད་ཕྱོགས་དང་ཁྲིམས་ལུགས་ཁྲིམས་སྲོལ་ལག་ལེན་མཐར་ཕྱིན་བསྟར་བ་དང་།ཁྲིམས་ལྟར་མི་རིགས་སོ་སོའི་རང་ཉིད་མི་རིགས་ཀྱི་སྐད་དང་ཡི་གེ་བེད་སྤྱོད་དང་འཕེལ་རྒྱས་གཏོང་བའི་རང་དབང་འགན་སྲུང་བྱེད་པ་དང་།ཏང་གི་ལང་ཕྱོགས་དང་བྱེད་ཕྱོགས། སྲིད་ཇུས་དྲིལ་བསྒྲགས། རྒྱལ་ཁབ་ཀྱི་ཁྲིམས་ལུགས་དང་ཁྲིམས་སྲོལ་དྲིལ་བསྒྲགས།མི་རིགས་མཐུན་སྒྲིལ་ཇེ་བཟང་། སྤྱི་ཚོགས་བདེ་འཇགས་སྲུང་སྐྱོང་། མི་རིགས་སོ་སོ་ཐུན་མོང་དུ་མཐུན་སྒྲིལ་འབད་འཐབ་དང་ཐུན་མོང་དུ་དར་རྒྱས་གོང་འཕེལ་ཡོང་བར་སྐུལ་སྤེལ།མི་རིགས་ཀྱི་ཕུལ་བྱུང་སྲོལ་རྒྱུན་རིག་གནས་རྒྱུན་འཛིན་དང་དར་སྤེལ་གཏོང་བ་བཅས་ལ་གལ་ཆེའི་དོན་སྙིང་ཡོད་པ་ཡིན།ཚོགས་འདུར་ཁམས་པའི་བརྙན་འཕྲིན་ཁང་དང་སི་ཁྲོན་གསར་འགྱུར་དྲ་བ་སོགས་གསར་འགྱུར་འཕྲིན་སྦྱོར་ལས་ཁུངས། ཁུལ་དམངས་ཆེན་དང་ཁྲིམས་སྐྱོང་ཨུ་ཡོན་ལྷན་ཁང་སོགས་འབྲེལ་ཡོད་འགན་ནུས་སྡེ་ཁག༢༥ཞུགས་ཡོད་པ་རེད།།
༄༅།།དཀར་མཛེས་ཁུལ་གྱི་བོད་ཀྱི་སྐད་ཡིག༼སྲོལ་ཡིག༽ཁྱབ་བསྒྲགས་ཚོགས་འདུ་བསྡུས་པ།
ཡོང་ཁུངས། : ཁམས་པའི་དྲ་བ། སྤེལ་དུས། : 2015-06-03 08:01:32
རྩོམ་སྒྲིག་པ། : admin
