༄༅།།མཚོ་ལྷོ་ཁུལ་བོད་སྐད་ཨུས་ཡོངས་འཛིན་རིག་མཛོད་གྲངས་མཛོད་འཛུགས་སྐྲུན་མཉམ་འབྲེལ་གྲོས་ཚོགས་བསྡུས་པ།

བགྲོ་གླེང་གི་ཟུར་ཞིག

སྤྱི་ཟླ9བའི་ཚེས18ཉིན། མཚོ་ལྷོ་ཁུལ་བོད་སྐད་ཨུས་གཙོ་སྒྲུབ་གནང་བའི་ཡོངས་འཛིན་རིག་མཛོད་གྲངས་མཛོད་འཛུགས་སྐྲུན་མཉམ་འབྲེལ་གྲོས་ཚོགས་དེ་མཚོ་ལྷོ་ཁུལ་གྲོས་ཚོགས་ལྟེ་གནས་སུ་བསྡུས་ཤིང་། ཀྲུང་གོའི་མི་རིགས་སྐད་ཡིག་ཡིག་སྒྱུར་ཅུའུ་དང་། མི་རིགས་དཔེ་སྐྲུན་ཁང་། དེ་མིན་བོད་ཁུལ་གྱི་ས་ཁུལ་སོ་སོའི་བོད་སྐད་ཡིག་བྱ་བའི་ལས་ཁུངས་ཀྱི་འགོ་ཁྲིད་དང་ཆེད་མཁས་པ50ལྷག་ཐེངས་འདིའི་གྲོས་ཚོགས་སུ་ཞུགས་ཏེ་བོད་ཡིག་ཆ་འཕྲིན་ཅན་བྱ་བའི་ཁྱབ་ཁོངས་ཀྱི་མཉམ་འབྲེལ་འཆར་བཀོད་ཐད་གཏིང་ཟབ་པའི་བགྲོ་གླེང་མཛད།

བགྲོ་གླེང་གི་ཟུར་ཞིག

ཀྲུང་གོའི་མི་རིགས་སྐད་ཡིག་ཡིག་སྒྱུར་ཅུའུ་ཡི་བོད་ཡིག་ཡིག་སྒྱུར་ཁང་གི་འགོ་གཙོ་ཟླ་བ་ཚེ་རིང་དང་། མི་རིགས་དཔེ་སྐྲུན་ཁང་བོད་ཡིག་གཞུང་སྒྲུབ་ཁང་གི་འགོ་གཙོ་རྟ་རྡོ། བོད་རང་སྐྱོང་ལྗོངས་བོད་སྐད་ཨུའི་འགོ་གཙོ་གཞོན་པའམ་སྒྲིག་སྒྱུར་ཅུའུ་ཡི་འགོ་གཙོ་གཞོན་པ་ཆོས་གྲགས། ལྷོ་ནུབ་མི་རིགས་སློབ་ཆེན་མི་རིགས་ཞིབ་འཇུག་གླིང་གི་ཏང་ཨུའི་ཧྲུའུ་ཅིའམ་མི་རིགས་ཡིག་ཚགས་ལྟེ་གནས་ཀྱི་འགོ་གཙོ། བོད་རིག་པའི་ཞིབ་འཇུག་ལྟེ་གནས་ཀྱི་འགོ་གཙོ་ལིའུ་ཡུང་། བོད་རང་སྐྱོང་ལྗོངས་བོད་སྐད་ཨུའི་ཚན་ཞིབ་ཁྲུའུ་ཡི་འགོ་གཙོ་གདུགས་དཀར་ཚེ་རིང་། མཚོ་སྔོན་ཞིང་ཆེན་མི་རིགས་ཆོས་ལུགས་ལས་དོན་ཨུ་ཡོན་ལྷན་ཁང་མི་རིགས་སྐད་ཡིག་གཞུང་སྒྲུང་ཁང་གི་འགོ་གཙོ་གཞོན་པ་ལེ་ཧྲུའུ་དབྱིན། རྔ་བ་ཁུལ་བོད་ཡིག་སྒྲིག་སྒྱུར་ཅུའུ་ཡི་འགོ་གཙོ་སྒྲོལ་དཀར་སྐྱིད། ཀན་ལྷོ་ཁུལ་བོད་སྐད་ཡིག་བྱ་བའི་གཞུང་སྒྲུབ་ཁང་གི་འགོ་གཙོ་དཀོན་ལོ། བདེ་ཆེན་ཁུལ་བོད་རིག་པའི་ཞིབ་འཇུག་གླིང་གི་ཞིབ་འཇུག་པ་རྟ་མགྲིན་ཐར། ཡུལ་ཤུལ་ཁུལ་བོད་སྐད་ཡིག་བྱ་བའི་གཞུང་སྒྲུབ་ཁང་གི་འགོ་གཙོ་ཚེ་བརྟན་རྡོ་རྗེ། མགོ་ལོག་ཁུལ་བོད་སྐད་ཡིག་བྱ་བའི་གཞུང་སྒྲུབ་ཁང་གི་འགོ་གཙོ་འཇུ་སྐལ་བཟང་། རྨ་ལྷོ་ཁུལ་བོད་སྐད་ཡིག་བྱ་བའི་གཞུང་སྒྲུབ་ཁང་གི་འགོ་གཙོ་སྙིང་ལྕགས། མཚོ་བྱང་ཁུལ་བོད་སྐད་ཡིག་བྱ་བའི་གཞུང་སྒྲུང་ཁང་གི་འགོ་གཙོ་རིན་ཆེན་ཚེ་རིང་། མཚོ་ནུབ་ཁུལ་བོད་སྐད་ཡིག་བྱ་བའི་གཞུང་སྒྲུབ་ཁང་གི་འགོ་གཙོ་རྡོ་རྗེ་ཚེ་བརྟན། དཔའ་རིས་རྫོང་བོད་སྐད་ཡིག་བྱ་བའི་གཞུང་སྒྲུབ་ཁང་གི་འགོ་གཙོ་གནས་བརྟན་ཚེ་རིང་བཅས་ཐེངས་འདིའི་གྲོས་ཚོགས་སུ་གདན་འདྲེན་ཞུས་ཡོད་པ་ལས་གཞན་ད་དུང་། ཀྲུང་གུང་མཚོ་ལྷོ་ཁུལ་ཨུའི་རྒྱུན་ཨུའམ་ཁུལ་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཚོགས་ཀྱི་ཧྲུའུ་ཅི་དཔལ་སྒྲོན། མཚོ་ལྷོ་ཁུལ་དམངས་ཆེན་རྒྱུན་ལས་ཨུ་ཡོན་ལྷན་ཚོགས་ཀྱི་འགོ་གཙོ་གཞོན་པ་ཡེན་མུའུ་ལེ། མཚོ་ལྷོ་ཁུལ་སྲིད་གཞུང་གི་དྲུང་ཡིག་ཆེན་མོ་ཚེ་རིང་། མཚོ་ལྷོ་ཁུལ་བོད་སྐད་ཡིག་བྱ་བའི་གཞུང་སྒྲུབ་ཁང་གི་འགོ་གཙོ་ཚེ་ལོ། དེ་མིན་རྒྱལ་ཁབ་ཡིག་སྒྱུར་ཅུའུ་དང་མི་རིགས་དཔེ་སྐྲུན་ཁང་། རང་སྐྱོང་ཁུལ་སོ་སོའི་འབྲེལ་ཡོད་ཆེད་ལས་མི་སྣ་དང་མཚོ་ལྷོ་ཁུལ་གྱི་རྫོང་ལྔའི་བོད་སྐད་ཡིག་བྱ་བའི་གཞུང་སྒྲུབ་ཁང་གི་འགོ་གཙོ་བཅས་གྲོས་ཚོགས་སུ་ཞུགས།

མཚོ་ལྷོ་ཁུལ་བོད་སྐད་ཨུའི་ལས་སྒྲུབ་མི་སྣས་ཡུལ་དངོས་སུ་ཡོངས་འཛིན་བོད་ཡིག་
འཚོལ་བཤེར་མ་ལག་གི་ཚོད་ལྟའི་པར་གཞི་འགྲེམ་གཏོང་བྱེད་པ།

གྲོས་ཚོགས་ཀྱི་ཟུར་ཞིག

གྲོས་ཚོགས་ཀྱི་ལྷན་པར།

   གྲོས་ཚོགས་སུ་ཀྲུང་གུང་མཚོ་ལྷོ་ཁུལ་ཨུའི་རྒྱུན་ཨུའམ་ཁུལ་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཚོགས་ཀྱི་ཧྲུའུ་ཅི་དཔལ་སྒྲོན་གྱིས་ཞུས་ཚིག་ཕུལ་ཞིང་། མཚོ་ལྷོ་ཁུལ་གྱི་གཞི་རྩའི་གནས་ཚུལ་དང་མི་རིགས་སྐད་ཡིག་བྱ་བའི་ཐད་ནས་མཚམས་སྦྱོར་གནང་བ་དང་། མཚོ་ལྷོ་ཁུལ་བོད་སྐད་ཡིག་བྱ་བའི་གཞུང་སྒྲུབ་ཁང་གི་འགོ་གཙོ་ཚེ་ལོ་དང་ཡོངས་འཛིན་འཚོལ་བཤེར་གྱི་ལས་སྒྲུབ་མི་སྣས་མཚོ་ལྷོ་ཁུལ་བོད་སྐད་ཡིག་བྱ་བའི་གཞུང་སྒྲུབ་ཁང་གི་ཉེ་བའི་ལོ་འགའི་ནང་གི་བྱ་བའི་གནས་ཚུལ་དང་། ཡོངས་འཛིན་བོད་ཡིག་འཚོལ་བཤེར་མ་ལག་ལས་གཞིའི་འཛུགས་སྐྲུན་གྱི་འཕེལ་ཚད། ཡོངས་འཛིན་རིག་མཛོད་གྲངས་མཛོད་འཛུགས་སྐྲུན་གྱི་འབྲེལ་ཡོད་ནང་དོན་མཚམས་སྦྱོར་བྱས་པ་མ་ཟད། བགྲོ་གླེང་བྱས་པར་བརྒྱུད། ས་གནས་སོ་སོའི་བོད་སྐད་ཡིག་བྱ་བའི་གཞུང་སྒྲུབ་ཁང(སྒྲིག་སྒྱུར་ཅུའུ)གིས་ཡོངས་འཛིན་རིག་མཛོད་གྲངས་མཛོད་འཛུགས་སྐྲུན་ཐད་མཉམ་འབྲེལ་གྱི་འདོད་ཚུལ་བསྟན་ཞིང་། ས་གནས་སོ་སོའི་ས་ཁོངས་རིག་གནས(ས་མིང་དང་། མིང་གྲགས་མི་སྣ། དམངས་སྲོལ། དགོན་སྡེ། སློབ་གྲྭ རི་ཆུའི་རིག་གནས་སོགས)ཐད་ཀྱི་རིག་མཛོད་བརྡ་འགྲེལ་རྩོམ་སྒྲིག་བྱེད་པར་གཅིག་མཐུན་གྱི་འདོད་བློ་ཆགས་ཏེ་ཚགས་དམ་ཞིང་འཐུས་སྒོ་ཚང་བ་དང་། དབང་གྲགས་ཆེ་བའི་ཡོངས་འཛིན་རིག་མཛོད་གྲངས་འཛིན་འཛུགས་སྐྲུན་བྱེད་པར་རྨང་གཞི་བརྟན་པོ་བཏིངས།
འཚོལ་བཤེར་མ་ལག་རང་སྟེང་ལ་མཚོན་ན། རིག་མཛོད་དང་དྲིས་ལན་ནི་འཚོལ་བཤེར་མ་ལག་གི་གཙོ་སྙིང་ཁག་ཡིན་ཞིང་། ཡོངས་འཛིན་རིག་མཛོད་ཀྱང་ཡོངས་འཛིན་གྲངས་མཛོད་ཀྱི་གཙོ་སྙིང་ལས་མ་འདས།
   ཡོངས་འཛིན་རིག་མཛོད་ལ་བསྡོམས་པས་ལེ་ཚན་ཆེ་ཆུང1500ལྷག་ཡོད་ཅིང་། རང་བྱུང་ཁམས་དང་ས་ཁམས། ཚན་རིག སློབ་གསོ། དཔལ་འབྱོར། ལོ་རྒྱུས། མི་སྣ། རིག་གནས། ལུས་རྩལ། སྤྱི་ཚོགས། འཚོ་བ། སྒྱུ་རྩལ། ལག་རྩལ། དེ་མིན་དུང་དཀར་ཚིག་མཛོད་དང་། དགེ་བཤེས་ཆོས་གྲགས་སོགས་ཀྱི་ནང་དོན་འདུས། འདིར་དུས་ཡུན་ལོ་ངོ་འགའམ་ལོ་ངོ་བཅུའི་རིང་ད་གཟོད་འགྲུབ་ངེས་ཤིང་སྤྱི་ཚོགས་ཡོངས་ཀྱི་ནུས་ཤུགས་མཁོ་གལ་ཆེ་བ་ཡིན། ཤེས་ལྡན་མི་སྣ་ལས་གཞི་འདིའི་ཁྲོད་ཞུགས་པར། སྔ་གཞུག་ཏུ་སྤྱི་ཚོགས་ཡོངས་སུ་གྲངས་མཛོད་འཛུགས་སྐྲུན་གྱི་ཆེད་ལས་མི་སྣ50ལྷག་བསྡུ་ལེན་བྱས་ཏེ་མི་རེ་རེས་ཉིན་རེར་མ་མཐའ་ཡང་ཡིག་འབྲུ8000ཡི་ལོ་ཙཱ་དང་གཏག་འཇུག་སྒྲིག་རྩོམ་བྱེད་དགོས་ལ། དེ་ལས་མི30ནི་སློབ་གསོ་དང་གསོ་རིག ཆོས་ལུགས། ཁྲིམས་ལུགས། དམངས་སྲོལ། ལོ་རྒྱུས་སོགས་ཞིབ་འཇུག་ཁྱབ་ཁོངས་ཀྱི་ཆེད་ལས་མི་སྣ་ཡིན།
    དུས་ཡུན་ལོ་ངོ་གཉིས་ཀྱི་འཛུགས་སྐྲུན་བརྒྱུད། རིག་མཛོད་གྲངས་མཛོད་ཀྱི་བརྡ་འགྲེལ་སྤུས་ཚད་མཐོར་འདེགས་སུ་བྱུང་ལ། པའེ་ཏུའུ་རིག་མཛོད་དང་ཀུའུ་ཀི་རིག་མཛོད་སོགས་རྒྱལ་ནང་གི་རིག་མཛོད་སྟེགས་བུ་ཆེ་གྲས་ལ་དཔེ་བྱས་ཏེ་ནུས་ཤུགས་ཡོད་རྒུས་འཛམ་གླིང་ན་ཆེས་ཆེ་ཞིང་ཆེས་འཐུས་སྒོ་ཚང་བའི་བོད་ཡིག་རིག་མཛོད་སྟེགས་བུ་འཛུགས་སྐྲུན་བྱེད་པ་ཡིན། མིག་སྔའི་བར་ཡོངས་འཛིན་རིག་མཛོད་དུ་བརྡ་འགྲེལ་ཁྲི13ལྷག་རྩོམ་སྒྲིག་བྱས་ཡོད་ཅིང་། འདི་ནི་ཡོངས་འཛིན་འཚོལ་བཤེར་མ་ལག་གྲངས་མཛོད་རྩོམ་སྒྲིག་མི་སྣས་ལོ་ངོ་གཅིག་གི་རིང་ལ་དཀའ་སྤྱད་འབད་བརྩོན་བྱས་པའི་འབྲས་བུ་ཡིན། ཡིན་ནའང་བོད་ཀྱི་རིག་གནས་ནི་རྒྱ་མཚོ་བཞིན་ཟབ་པ་དང་ཡོངས་འཛིན་རིག་མཛོད་ཀྱི་ལེ་ཚན་ཤིན་ཏུ་མང་བས་ད་སྔའི་འཕེལ་ཚད་འདིས་ལོ་རྗེས་མའི་སྤྱི་ཟླ8པར་ཡོངས་འཛིན་འཚོལ་བཤེར་མ་ལག་དངོས་སུ་ཤར་གཏོང་བྱེད་དུས་རིག་མཛོད་གྲངས་མཛོད་གྱི་འཛུགས་སྐྲུན་ལ་རྒྱུ་ཆ་མ་འདང་པར་དྲ་དམངས་ཀྱི་འཚོལ་བཤེར་དགོས་མཁོ་སྐོང་མི་ཐུབ་པ། ཆེད་ལས་ཤེས་བྱའི་རང་བཞིན་གྱི་བརྡ་འགྲེལ་ལོ་ཙཱ་དང་རྩོམ་སྒྲིག་མི་སྣ་མི་འདང་པ་སོགས་ཀྱི་དཀའ་ངལ་འབྱུང་སྲིད་པར་དོགས་ནས། ཐེངས་འདིའི་རྒྱལ་ཡོངས་བོད་ཁུལ་སོ་སོའི་བོད་སྐད་ཡིག་བྱ་བའི་ལས་ཁུངས་ཀྱི་མཉམ་འབྲེལ་གྲོས་ཚོགས་བསྡུས་ཏེ་ཇི་ལྟར་རྒྱལ་ནང་གི་བོད་སྐད་ཡིག་བྱ་བའི་ནུས་ཤུགས་གཅིག་སྒྲིལ་སྒོས་ཡོངས་འཛིན་གྲངས་མཛོད་ཆེན་མོ་འཛུགས་སྐྲུན་ཐད་རང་འགུལ་གྱིས་བྱས་རྗེས་རེ་འཇོག་པར་ལྷན་དུ་བགྲོ་གླེང་མཛད།
    ཡོངས་འཛིན་བོད་ཡིག་འཚོལ་བཤེར་མ་ལག་གི་འཛུགས་སྐྲུན་ལས་གཞི་འདི་ནི2013ལོའི་སྤྱི་ཟླ4བར་དངོས་སུ་སྒྲུབ་མགོ་བརྩམས་ཤིང་། 2015ལོའི་སྤྱི་ཟླ7པའི་བར་དུས་སྐབས་དང་པོའི་རྨང་གཞིའི་འཛུགས་སྐྲུན་གྱི་བཟོ་བཀོད་ལེགས་འགྲུབ་བྱུང་ལ། མིག་སྔར་དུས་སྐབས་གཉིས་པའི་སྤྱོད་ནུས་རིམ་འཕར་དང་ལེགས་སྒྱུར་བྱ་བ་སྤེལ་བཞིན་ཡོད་པ་དང་། འཆར་འགོད་ལྟར་ན2016ལོའི་སྤྱི་ཟླ8པར་དངོས་སུ་ཤར་གཏོང་བྱ་རྒྱུ་ཡིན་པ་མ་ཟད། ཤར་གཏོང་བྱས་རྗེས་ཀྱང་དུས་སྐབས་གསུམ་པ་དང་དུས་སྐབས་བཞི་བའི་ལས་གཞིའི་བྱ་བ་སྤེལ་རྒྱུ་ཡིན་ཞིང་། 2018ལོའི་ལོ་མཇུག་བར་ལས་གཞི་འདི་ཡོངས་སུ་མཇུག་སྒྲིལ་རྒྱུ་རེད།