2020ལོར་ཇོ་མོ་གླང་མའི་བྱང་ངོས་སུ་འཛེག་རྒྱུའི་འཆར་གཞིར་ཐོ་འགོད་བྱེད་འགོ་ཚུགས་པ།

ཀྲུང་གོ་བོད་ཀྱི་དྲ་བའི་གློག་འཕྲིན་ལྟར་ན། གསར་འགོད་པས་བོད་ལྗོངས་ཡར་ལྷ་ཤམ་པོ་མྱུལ་ཞིབ་ཀུང་སི་ནས་ཤེས་རྟོགས་བྱུང་པར་གཞིགས་ན། བོད་ལྗོངས་ཡར་ལྷ་ཤམ་པོ་མྱུལ་ཞིབ་ཀུང་སིས་2020ལོའི་ཇོ་མོ་གླང་མའི་(བྱང་ངོས)རི་འཛེག་འཆར་གཞིར་མིག་སྔར་མིང་ཐོ་འགོད་བཞིན་ཡོད་པ་དང་། “རྩེར་སོན་ཕུགས་འདུན”ལྡན་པའི་རི་འཛེག་ལ་དགའ་མོས་ཅན་ཚོར་ཆ་རྐྱེན་ངེས་ཅན་ཞིག་འཛོམས་ཚེ་ད་གཟོད་མིང་ཐོ་འགོད་ཆོག་གི་ཡོད་པ་རེད། མིང་ཐོ་བཀོད་ཚར་རྗེས། མིང་ཐོ་འགོད་མཁན་ངེས་པར་དུ་ཟམ་ཟུང་འགག་གི་ཇོ་རིའི་ལད་ཟློས་གསོ་སྦྱོང་འཛིན་གྲྭར་ཞུགས་དགོས་པ་རེད།

ཤེས་རྟོགས་བྱུང་པར་གཞིགས་ན། བོད་ལྗོངས་ཡར་ལྷ་ཤམ་པོ་མྱུལ་ཞིབ་ཀུང་སིས་ས་བབ་མཐོ་བའི་རི་འཛེག་རིགས་ཀྱི་བྱེད་སྒོ་སྤེལ་བ་དེ་ནི་མིག་སྔར་རྒྱལ་ཡོངས་སུ་འཛུགས་སྔ་ཤོས་དང་གཞི་ཁྱོན་ཆེ་ཤོས་ཀྱི་རི་འཛེག་ལུས་རྩལ་ཁྱབ་གདལ་དང་རི་འཛེག་རིག་གནས་བརྒྱུད་སྤེལ་བྱེད་པ་ཞིག་ཡིན་ལ། ས་བབ་མཐོ་བའི་རི་འཛེག་དང་ལག་རྩལ་ལ་བརྟེན་ནས་རི་འཛེག རྐང་ཐང་དང་མྱུལ་ཞིབ། བྲག་འཛེག་གསོ་སྦྱོང་བྱེད་པ། འཁྱགས་འཛེག་གསོ་སྦྱོང་སོགས་ཀྱི་ཞབས་ཞུ་མཁོ་འདོན་བྱེད་མཁན་ཆེད་ལས་ཅན་གྱི་ཀུང་སི་ཞིག་ཡིན་ཏེ། དེ་ལས་ཀྱང་ཀྲུང་གོའི་ཚོང་ལས་རི་འཛེག་གི་ཆེད་ལས་རི་མཐོའི་ཞབས་ཞུའི་ཚོགས་པ་ཞིག་ཀྱང་ཡིན་ཞིང་། དེ་སྔར་རྒྱ་མཚོའི་ངོས་ལས་ས་བབ་མཐོ་ཚད་སྨི་8000ཡན་གྱི་རི་རྩེར་འཛེགས་པ་རྩ་འཛུགས་བྱས་པ་དང་འབྲེལ་དམིགས་བསལ་གྱི་བདེ་འཇགས་རི་འཛེག་རྣམ་པའང་གཏོད་ཡོད་པ་རེད།

ཇོ་མོ་གླང་མའི་བྱང་ངོས་ཀྱི་རི་འཛེགས་ལམ་ཐིག་ནི་བྱང་ཤར་གྱི་རི་རྩེ་བརྒྱུད་ནས་འཛེགས་པ་ཞིག་ཡིན་པ་དང་བྱང་ངོས་ཀྱི་རི་འཛེག་ལམ་ཐིག་ལ་སྤྱིར་བཏང་དཀའ་གནད་5ཡོད་པར་ངོས་འཛིན་བྱེད་ཀྱི་ཡོད་པ་སྟེ། དཀའ་གནད་དང་པོ་ནི་རྒྱ་མཚོའི་ངོས་ལས་ས་བབ་མཐོ་ཚད་སྨི་6500ཡོད་པའི་མདུན་སྐྱོད་སྒར་ས་ཡིན་ལ“དམྱལ་བའི་སྒར་ས”ཞེས་ཀྱང་འབོད། དཀའ་གནད་གཉིས་པ་ནི་རྒྱ་མཚོའི་ངོས་ལས་ས་བབ་མཐོ་ཚད་སྨི་6700ནས་7028བར་གྱི་བྱང་ངོས་འཁྱགས་རོམ་ཆེན་པོའི་ལྡེབས་ངོས་ཡིན་པ། དཀའ་གནད་གསུམ་པ་ནི་རྒྱ་མཚོའི་ངོས་ལས་ས་བབ་མཐོ་ཚད་སྨི་7500ཡོད་པའི“རླུང་སྒོ་ཆེན་མོ”ཡིན་པ། དཀའ་གནད་བཞི་བ་ནི་སྨི་8300ཡན་གྱི་སེར་རྒྱུད་འཕྲེད་བཅད་ཀྱི་གནས་ཡིན་པ། དཀའ་གནད་ལྔ་པ་ནི་རྒྱ་མཚོའི་ངོས་ལས་ས་བབ་མཐོ་ཚད་སྨི་8680ནས་8700བར་གྱི་སྐས་རིམ་གཉིས་པ་དང་གསུམ་པ་ཡིན་པ་བཅས་རེད།

ཇོ་མོ་གླང་མ་ནི་བོད་སྐད་དུ“ལྷ་མོ”ཞེས་པའི་དོན་ཡིན་ཏེ་འཛམ་གླིང་གི་ཡང་རྩེ་དང་པོ་དེ་ཡིན་པ་དང་ཧི་མ་ལ་ཡའི་དབུས་རྒྱུད་མཐའ་མཚམས་སུ་གནས་ཤིང་། བོད་ལྗོངས་གཞིས་རྩེ་གྲོང་ཁྱེར་གྱི་དིང་རི་རྫོང་གི་ལྷོ་ཕྱོགས་སུ་གནས་ཡོད་ཅིང་། ཇོ་མོ་གླང་མའི་རི་རྩེར་ལོ་འཁོར་ཧྲིལ་བོར་འཁྱགས་པས་བསྡམས་ཤིང་དཀར་གསལ་དྭངས་གཙང་གི་རྣམ་པས་ཁེངས་ཡོད།

མིང་ཐོ་འགོད་སྐབས་ངེས་པར་དུ་ཤེས་དགོས་པ་ནི། ད་ཐེངས་ཀྱི་བྱེད་སྒོའི་ནང་ཞུགས་མཁན་རི་འཛེག་པར་ངེས་པར་དུ་མཐོ་ཚད་སྨི་8000ཡན་གྱི་རི་འཛེག་འཛིན་ཡིག་ནམ་ཡང་ན་རི་རྩེར་འཛེག་པའི་འཛིན་ཡིག་དགོས་ཤིང་ལུས་པོ་བདེ་ཐང་ཡིན་དགོས་པ། མྱུར་དལ་གྱི་ནད་རིགས་གང་ཡང་མེད་པ། ལུས་ཟུང་ལེགས་པོ་ལྡན་དགོས་ཤིང་། མིང་ཐོ་འགོད་སྐབས་རིམ་པ་ཀ་པ་གཉིས་ཡན་གྱི་སྨན་ཁང་གི་ལུས་ཕུང་བརྟག་དཔྱད་རེའུ་མིག་སྤྲོད་དགོས་པ། ལུས་ཕུང་བརྟག་དཔྱད་ལ་སྙིང་དང་གློ་བ། མཆིན་པ་བཅས་ཀྱི་བརྟག་དཔྱད་སྙན་ཞུ་དང་ཁྲག་གི་རྒྱུན་སྲོལ་སོགས་ཚུད་ཡོད། རང་ཉིད་ཀྱི་ནད་གཞི་སྦ་གསང་བྱས་ཚེ་མཇུག་འབྲས་ཡོད་ཚད་རང་གིས་འགན་འཁུར་དགོས། ལྷ་སར་མིང་ཐོ་བཀོད་རྗེས་གཅིག་གྱུར་སྒྲིག་འཛུགས་ཀྱིས་སླར་ཡང་གཟུགས་པོར་བརྟག་དཔྱད་བྱ་རྒྱུ་དང་། ས་གནས་དེ་གའི་མི་རིགས་ཀྱི་གོམས་སྲོལ་དང་ཆོས་ལུགས་ཀྱི་གོམས་སྲོལ་ལ་བརྩི་འཇོག་བྱེད་པ། རི་སྐྱེས་སྲོག་ཆགས་དང་རྩི་ཤིང་སྲུང་སྐྱོང་བྱེད་པ་ལས་འཛིན་གསོད་དང་གཏོར་བརླག་བཏང་མི་ཆོག་པ། ལམ་བར་ནས་གལ་ཏེ་རང་ཉིད་ཀྱི་རྒྱུ་རྐྱེན་(དཔེར་ན་ལུས་ཤུགས་དང་ནད་སོགས་ལྟ་བུའི)ཕྱིར་འབུད་བྱས་ཚེ་འགྲོ་གྲོན་གང་ཡང་ཕྱིར་མི་སློག་པ་དང་། འགྲོ་གྲོན་ཡོད་ཚད་རང་གིས་འགན་ཁུར་དགོས། ངེས་པར་དུ་ལོགས་ཀྱི་ཆ་རྐྱེན་ཅི་ཡང་མེད་པར་སྣེ་ཤན་པའི་བཀོད་སྒྲིག་ལ་ཉན་དགོས་ཤིང་།དེ་ལྟར་མ་བྱས་ཚེ་མཇུག་འབྲས་ཡོད་ཚད་རང་གིས་འགན་ཁུར་དགོས། དེའི་ནང་ཞུགས་མཁན་རུ་མིས་ངེས་པར་དུ་མི་ལུས་ཀྱི་ཉེན་འགོག་འགན་བཅོལ་གཉིས་ཉོ་དགོས་ལ་དེ་ལས་གཅིག་ནི་རྩ་འཛུགས་བྱེད་མཁན་གྱིས་ཉོ་དགོས་པ་དང་། ཅིག་ཤོས་ནི་རུ་མི་རང་ཉིད་ཀྱིས་ཉོ་དགོས་པ་རེད། མིང་ཐོ་བཀོད་རྗེས་ངེས་པར་དུ་ཟམ་ཟུང་འགག་ཇོ་རིའི་ལད་ཟློས་གསོ་སྦྱོང་འཛིན་གྲྭར་ཞུགས་དགོས།

མིང་ཐོ་འགོད་པའི་དུས་ཚོད་ནི་ཟླ་10པའི་ཚེས་16ནས་ཟླ་12པའི་ཚེས་30ཉིན་།

འབྲེལ་གཏུག་བྱེད་ཐབས། 13322588848

བྱ་འགུལ་དུས་ཚོད། 2020ལོའི་ཟླ་4པ་ནས་ཟླ་5པའི་བར།

བྱ་འགུལ་ཉིན་གྲངས།ཉིན 45-60བར།

རྩོམ་སྒྲིག་པ། ཚེ་རིང་དོན་འགྲུབ།