ཀྲུང་གོ་བོད་ཀྱི་དྲ་བའི་འཕྲིན། ཉེ་ཆར། བོད་རང་སྐྱོང་ལྗོངས་བུད་མེད་དང་བྱིས་པའི་ཕྱོགས་བསྡུས་ཞབས་ཞུ་ལྟེ་གནས་ཀྱི་འཛུགས་སྐྲུན་རྣམ་གྲངས་ཀྱི་རྩིག་རྨང་འདིང་བའི་མཛད་སྒོ་ལྷ་ས་གྲོང་ཁྱེར་སྣེའུ་ཁུལ་གསར་དུ་འཚོགས་པ་རེད། གསར་འགོད་པར་མཛད་སྒོའི་ཐོག་ནས་ཤེས་རྟོགས་བྱུང་བར། རྣམ་གྲངས་དེ་ནི2017ལོར་རང་སྐྱོང་ལྗོངས་ཀྱི་ས་གནས་སྔོན་རྩིས་ཀྱི་གཞི་རྩའི་འཛུགས་སྐྲུན་མ་འཇོག་འཆར་འགོད་ནང་བཅུག་པ་དང་། རྣམ་གྲངས་དེར་ཁྱོན་མ་དངུལ་སྒོར་དུང་ཕྱུར་1.2བཏང་བར་ས་བཟུང་རྒྱ་ཁྱོན་མུའུ་15.8ཟིན་པ་དང་། སྤྱིའི་འཛུགས་སྐྲུན་རྒྱ་ཁྱོན་ལ་སྨི་ངོས་གྲུ23227.31ཟིན་གྱི་ཡོད། ཤེས་རྟོགས་བྱུང་བར་གཞིགས་ན། རང་སྐྱོང་ལྗོངས་བུད་མེད་དང་བྱིས་པའི་ཕྱོགས་བསྡུས་ཞབས་ཞུ་ལྟེ་གནས་ཀྱི་འཛུགས་སྐྲུན་རྣམ་གྲངས་ནི་ལྷ་ས་གྲོང་ཁྱེར་སྣེའུ་ཁུལ་གསར་གྱི་གཙང་འགྲམ་སྤྱི་གླིང་ཁུལ་དུ་གནས་ཡོད། འཛུགས་སྐྲུན་དང་བྱེད་ནུས་ཀྱི་ཐད་གཙོ་བོ་བྱིས་པའི་སློབ་གསོའི་ཞབས་འདེགས་དང་བུད་མེད་ཀྱི་གཉིས་གཏོད་གསོ་སྦྱོང་སོགས་བུད་མེད་དང་བྱིས་པའི་བསམ་བློའི་སྣེ་ཁྲིད་དང་བཅའ་ཁྲིམས་བློ་འདྲི་སོགས་ཀྱི་ཕྱོགས་བསྡུས་ཞབས་འདེགས་ཚུད་ཡོད། རྣམ་གྲངས་བསྐྲུན་ཟིན་རྗེས། ཐེངས་གཅིག་ལ་ཉུང་མཐར་ཡང་མི་250ལ་རྩལ་ནུས་སྦྱོང་བརྡར་དང་སློབ་ཚན་འཁྲིད་པ་སོགས་གསོ་སྦྱོང་གི་འཆར་གཞི་སྤེལ་ཆོག་གི་ཡོད་པ་དང་། ལོ་ལྟར་ཉུང་མཐར་ཡང་གསོ་སྦྱོང་ཐེངས་12བྱས་ནས་ལོ་ལྟར་སྤྱི་ཚོགས་ལ་མ་མཐར་ཡང་ལས་ཞུགས་མི་སྣ་3000གཏོང་ཐུབ་པའི་བརྩོན་ལེན་བྱ་རྒྱུ་ཡིན་པ་དང་ཆབས་ཅིག བུད་མེད་ཀྱི་གཉིས་གཏོད་གསོ་སྦྱོང་ལྟེ་གནས་ཀྱིས་མི་ཐེངས་350ཡི་ལས་གཏོད་དགོས་མཁོ་སྐོང་རྒྱུ་མ་ཟད། སེམས་ཁམས་བློ་འདྲི་དང་། གཉེན་སྒྲིག་བློ་འདྲི། གཉེན་སྒྲིག་མཚམས་སྦྱོར། བཅའ་ཁྲིམས་རོགས་སྐྱོར། ནང་ལས་ཞབས་འདེགས་སོགས་མཁོ་འདོན་བྱས་ཏེ་བུད་མེད་དང་སློབ་ཆེན་སློབ་མའི་རང་བརྟེན་ལས་གཏོད་ལ་སྐུལ་ལྕག་གཏོང་རྒྱུ་དང་། སྤྱི་ཚོགས་ལ་ལས་གནས་དེ་བས་མང་བ་བཏོད་དེ་བུད་མེད་དང་སློབ་ཆེན་སློབ་མ་སྤྱི་ཚོགས་ཐོག་ལས་ཀར་ཞུགས་པའི་འགྲན་རྩོད་འཇོན་ཐང་ཆེ་རུ་གཏོང་རྒྱུ་ཡིན་པ། ད་དུང་སྐྲུན་རྩིས་ཡོད་པའི་བྱིས་པའི་ཟློས་གར་ཁང་དུ་དུས་གཅིག་ལ་ལྟད་མོ་བ་350ཤོང་ཐུབ་པ་བྱ་རྒྱུ་རེད། ། རྩོམ་སྒྲིག་པ། ཀླུ་མོ་མཚོ།
བོད་རང་སྐྱོང་ལྗོངས་བུད་མེད་དང་བྱིས་པའི་ཕྱོགས་བསྡུས་ཞབས་ཞུ་ལྟེ་གནས་སྐྲུན་འགོ་ཚུགས་པ།
ཡོང་ཁུངས། : བོད་ལྗོངས་ཉིན་རེའི་ཚགས་པར། སྤེལ་དུས། : 2019-10-31 09:56:04
རྩོམ་སྒྲིག་པ། : lalong1985
