བོད་ལྗོངས་ཀྱི་མཁའ་དབུགས་སྤུས་ཚད་ཆ་སྙོམས་སུ་ལེགས་ཚད་ལོ7ལ་བསྟུད་མར95%ལས་བརྒལ་བ།

ཀྲུང་གོ་བོད་ཀྱི་དྲ་བའི་འཕྲིན། ཉེ་སྔོན་གསར་འགོད་པས་བོད་ལྗོངས་ཀྱི་སྐྱེ་ཁམས་ཁོར་ཡུག་ཐིན་ནས་རྒྱུས་ལོན་པ་ལྟར་ན། བོད་ལྗོངས་ཀྱིས་ལོ་མང་པོའི་རིང་ལ་ཁེ་ལས་ཀྱི“སོལ་འགྱུར་ཟང་ཟིང་སྦགས་བཙོག”བཅས་ཀྱི་ཕྱོགས་བསྡུས་བཅོས་སྒྲིག་ལས་དོན་སྤེལ་ཏེ། སོལ་འགྱུར་ཅན་དང་གློག་ཤུགས་ཅན། སྡོད་དམངས་ཀྱི་སྲོལ་རྒྱུན་ནུས་ཁུངས་ཀྱི་འཛད་སྤྱོད་ཚབ་བྱེད་བཅས་ལ་སྐུལ་འདེད་ཧུར་ཐག་བཏང་ནས་གྲུབ་འབྲས་མངོན་གསལ་བླངས། 2019ལོར་ལྗོངས་ཡོངས་ཀྱི་ས་ཁུལ་དང་གྲོང་ཁྱེར7གྱི་མཁའ་དབུགས་ཁོར་ཡུག་སྤུས་ཚད་ཆ་སྙོམས་སུ་ལེགས་པའི་ཉིན་གྲངས99.6%ལ་སླེབས་ཡོད་ཅིང་། དེ་ནི་བོད་ལྗོངས་ཀྱི་མཁའ་དབུགས་སྤུས་ཚད་ཆ་སྙོམས་སུ་ལེགས་ཚད་ལོ7ལ་བསྟུད་མར95%ལས་བརྒལ་བ་ཡིན།

བོད་ལྗོངས་སྐྱེ་ཁམས་ཁོར་ཡུག་ཐིན་གྱི་ཐིན་ཀྲང་ནོར་རྒྱལ་གྱིས་བཤད་རྒྱུར། 2019ལོར། བོད་ལྗོངས་ཀྱིས་ཁོར་ཡུག་དམངས་འཚོ་དང་། གནམ་སྔོན་པོ། ཆུ་དྭངས་མོ། ས་གཙང་བཅས་ཀྱི་སྲུང་སྐྱོབ་བྱ་བར་གནད་འགག་རང་བཞིན་གྱི་འཕེལ་རྒྱས་བྱུང་ཞིང་། སྐྱེ་ཁམས་ཁོར་ཡུག་སྤུས་ཚད་རྒྱུན་མཐུད་ངང་ལེགས་པའི་རྣམ་པ་རྒྱུན་འཁྱོངས་བྱས་ཡོད་དེ། རྒྱལ་ཁབ་ཀྱི་སྐྱེ་ཁམས་བདེ་འཇགས་འགོག་ཡོལ་རྒྱུན་ཆད་མེད་པར་སྲ་བརྟན་དུ་བཏང་ཡོད་ཟེར།

ནོར་རྒྱལ་གྱིས་བཤད་རྒྱུར། གོམ་སྟབས་རྗེས་མར། བོད་ལྗོངས་ཀྱིས་མུ་མཐུད་དུ་སྐྱེ་ཁམས་བདེ་འཇགས་འགོག་ཡོལ་སྲུང་སྐྱོབ་དང་འཛུགས་སྐྲུན་འཆར་འགོད་ལག་བསྟར་བྱས་ཏེ། སྐྱེ་ཁམས་བདེ་འཇགས་འགོག་ཡོལ་སྐྱེ་ཁམས་ལྟ་ཞིབ་ཚད་ལེན་དྲ་རྒྱའི་འཛུགས་སྐྲུན་དང་དོ་དམ་བྱ་བར་ཤུགས་བསྣན་ནས། རྒྱལ་ཁབ་རིམ་པའི་སྐྱེ་ཁམས་དཔལ་ཡོན་འཛུགས་སྐྲུན་དཔེ་སྟོན་ཁུལ་གྱི་འགོ་རྩོམ་རྒྱུ་དང་། མཐོ་སྒང་གྲང་ཁུལ་གྱི་ཚོད་ལྟ་ཁང་འཛུགས་སྐྲུན་བྱེད་པ་དང་ཆབས་ཅིག དུས་དང་བསྟུན་པའི་སྒོ་ནས་ཆུ་དང་ས་རྒྱུའི་སྦགས་བཙོག་འགོག་བཅོས་ས་ཁུལ་གྱི་ཁྲིམས་འཛུགས་བྱ་བ་ལེགས་པོར་སྤེལ་ནས་བོད་ལྗོངས་ཀྱི་སྐྱེ་ཁམས་ཁོར་ཡུག་སྤུས་ཚད་མུ་མཐུད་དུ་ལེགས་པའི་རྣམ་པ་རྒྱུན་འཁྱོངས་བྱ་རྒྱུ་ཡིན་ཟེར། །

རྩོམ་སྒྲིག་པ། མཁའ་མཚོ་སྐྱིད།