དྲུག་གཅིག་བྱིས་པའི་དུས་ཆེན་ལ་ཕུལ་བའི་ལེཊ་སྐྱེས །

དེ་རིང་ནི་རྒྱལ་སྤྱིའི་བྱིས་པའི་དུས་ཆེན་རེད་ཟེར། ཐོག་མར་སྙིང་ཉེ་བའི་ཁ་བའི་ལྗོངས་ཀྱི་བྱིས་པ་ཡོངས་ལ་རྟེན་འབྲེལ་ཞུ། ཁྱེད་ཚོ་ནི་མི་རིགས་ཤིག་དང་རྒྱལ་ཁབ་ཅིག་གི་ཡར་སྐྱེས་མེ་ཏོག་སྟེ་མ་འོངས་པའི་རྒྱུད་འཛིན་ཡིན་པས་སྐྱོན་གྱིས་མ་གུས་པར་བདེ་བླག་ངང་ཕ་མའི་རེ་འདུན་ལྟར་འཚར་ལོངས་ཡོང་བའི་སྨོན་འདུན་ཞུ།

བྱིས་པའི་འཇིག་རྟེན་ནི་ངོ་མཚར་དང་འཆར་ཡན་གྱིས་ཁེངས་ཤིང་། བྱིས་པའི་སེམས་ཁམས་ཀྱང་ནག་ནོག་དང་གཡོ་ཟོལ་མ་འདྲེས་པའི་དྭངས་གཙང་གི་ཤོག་དཀར་ལྷེབ་མ་ཞིག་ཡིན་པས། ཤོག་དཀར་ལྷེབ་བུ་དེའི་ཐོག་བྱམས་བརྩེ་དང་ཞི་བདེ། བློ་གྲོས་དང་དཀྱེལ་ཡངས་བཅས་ཀྱི་མཛེས་རིས་བཀོད་པ་ནི་རྒན་རབས་རྣམས་ཀྱི་བྱིས་པ་སློབ་གསོའི་ལམ་ནས་སྐྱེད་སྲིང་བྱེད་པའི་རྩ་བའི་འོས་འགན་ཡིན།

ཉི་མ་དེ་ནི་བྱིས་པ་ཚོར་རང་ཉིད་ལ་དབང་བའི་ཉི་མ་ཞིག་ཡིན་པ་བཞིན། དགེ་རྒན་དང་ཕ་མ་ཚོས་ཀྱང་ཁོང་ཚོར་ལ་དམིགས་བསལ་གྱི་གཟིགས་སྐྱོང་སྟེར་གྱི་ཡོད་པ་མ་ཟད། སྐེ་རས་དམར་པོ་འདོགས་པ་དང་གསུམ་བཟང་སློབ་མ་འདེམས་པ་བཅས་རིམ་པ་བཞིན་བྱ་དགའ་སྟེར་ནས། སློབ་སྦྱོང་ཡར་རྒྱས་དང་ཀུན་སྤྱོད་ཇེ་ལེགས་སུ་འགྲོ་བའི་སྐུལ་མ་དང་བསྟོད་བསྔགས་བྱེད་ཀྱིན་ཡོད་ལ། བྱིས་པ་ཚོའི་སེམས་པ་ཀྱང་རྒྱལ་ཁ་དང་སྤྲོ་སྣང་གིས་ཁེངས་བཞིན་དགེ་སློབ་མཉམ་དུ་དུས་བཟང་དེ་ལོངས་སུ་སྤྱོད་ཀྱི་ཡོད།