ལྷ་སའི་ཨ་ཅེ།

དོ་ནུབ་ལྷ་སར་ཐོན་སོང
ཁོ་བོ་ཐེངས་དང་པོ་ལྷ་སར་ཐོན་པ་ཡིན
མི་ཚོགས་ཀྱི་འཚང་ཁའི་ཁྲོད་ནས
ཇོ་ཁང་གི་མདུན་དུ་ཕྱག་གསུམ་འཚལ་ཞིང
སྤྱན་རས་གཟིགས་ཡིད་ལ་བསྒོམས་ཏེ
འབྲུ་དྲུག་གི་གདངས་དབྱངས་གྱེར་དུས
ངས་སྙིང་ཉེ་བའི་ཨ་ཅེ་ཁྱེད་རང་དྲན་བྱུང

ཨ་ཅེ་ལགས   སྙིང་ཉེ་བའི་ཨ་ཅེ
ཁྱེད་རང་དྲན་པའི་མཆི་མ་ཁོག་ལ་མིད་ཀྱིན
མདུན་ཕྱོགས་ཀྱི་སྲང་ལམ་དུ་ཞུགས
ཁྲ་ཁྲ་འུར་འུར་གྱིས་ཁེངས་པའི་སྲང་ལམ་དེར
མི་ཚོགས་དག་གིས་ད་དུང་ཡང་འཚང་ཁར་གྱེར
ངོ་གདོང་གཉེར་མས་སྦགས་པའི་བུ་མོ་ཞིག་གིས
ཁ་བཏགས་འཚང་བཞིན་ཐོན་བྱུང
སྐྱོ་ཉམས་ཀྱིས་ཁེངས་པའི་བུ་མོ་དེས
ཨ་ཅེ་ཁྱེད་རང་ཤིན་ཏུ་དྲན་པར་བྱས་སོང

ཨ་ཅེ   སྙིང་ཉེ་བའི་ཨ་ཅེ
དོ་ནུབ་ལྷ་སར་ཐོན་ཡོད
ཁྱོད་ཀྱི་མདུན་དུ་ཡང་ཐོན་ཡོད
ཡིན་ནའང ཁྱེད་རང་སྔ་མོ་ནས་བུད་སོང
ཕྱིར་འོང་མེད་པའི་ལམ་དུ་ཞུགས་སོང
ཁྱེད་ཀྱི་ཤུལ་དུ་ལུས་པའི་ཁྱིམ་གཞིར
དྲོད་འཇམ་གྱིས་དབེན་ཏེ
འཁྱགས་པས་བསྡམས་འདུག

ཨ་ཅེ་ལགས  སྙིང་ཉེ་བའི་ཨ་ཅེ
འདི་དག་ཡོད་ཚད་ནས་ཡོད་ཚད
ཁོ་བོས་ཡིད་ལ་དྲན་ཐེངས་རེ་རེར
དྲན་པའི་མིག་ཆུ་གཞུར་ཞིང
གདུང་བའི་ཡོངས་སུ་མནར་འགྲོ
འདི་དག་ཡོད་ཚད་བདེན་པར་སྣང་སྟེ
ལས་དབང་གིས་ཁ་ལོ་བསྒྱུར་པས་སོ

ཨ་ཅེ      ཨ་་་
གྲང་ཤུར་ཤུར་གྱི་མཚན་མོ་འདིར
དྲན་གདུང་གི་སྨྲེ་ངག་གྱེར་བཞིན
མི་ཚོགས་ཀྱི་བང་རིམ་བརྟོལ་ཏེ
ཇོ་ཁང་གི་བསང་དུད་ཁྲོད་ནས
ཁྱེད་ལ་སྨོན་ལམ་བཏབ་ཡོད
ལྷ་ཚོགས་ཀྱི་ཐུགས་ཀའི་མདུན་ནས
ཁྱེད་ལ་ཡང་ནས་ཡང་དུ་སྨོན་ལམ་བཏབ་ཡོད
ཨ་ཅེ་ལགས      སྙིང་ཉེ་བའི་ཨ་ཅེ

                                                                         2017/2/10  ནུབ་མོར་ལྷ་ས་ནས།