སྙན་ངག་པ་ན་རོ་ལགས་ཀྱི་སྙན་ངག་ཚན་པ་དྲུག

དབུལ་བོ།

ཉིན་ལ་དབང་བོ་རལ་བས་བློ་རྩ་ཕྱིད་པ་སླ་ཡང་།།

མཚན་ལ་རྨི་ལམ་དྲས་ཏེ་དེ་ཡི་ལྷན་པ་བྱ་ཆོག །

ངག་ལ་ཐབ་ཚང་བཅས་པས་ཨ་ཙི་ཙི་ཞེས་དམོད་ཀྱང་།།

དབྱངས་ལ་མེ་དབལ་ཚ་བས་འོན་པའི་ཁྱིམ་ཕུག་དྲོ་བ།།

དབེན་པའི་འཕྲང་རིང་འགྲིམ་དུས་གཤིབས་གྲོགས་བདེ་སྤྱོད་བཟང་པོ།།

ངག་ལ་ཐན་པ་བྱུང་དུས་རོ་རྒན་དངོས་གྲུབ་རྒྱ་མཚོ།།

མགྲོན་ཁང་གཞན་ཏུ་བརྗེ་དུས་དུར་ཁྲོད་བསིལ་བ་ཚལ་ཡིན།།

ལྡེམ་དགོངས་སྐྱེད་མོས་ཚལ་ལ་སྤྱན་གཅིག་གཡོར་བར་ཕེབས་དང་།།

དྲ་མའི་མིག་ལས་བསྲིངས་པའི་སེམས་ཀྱི་རྒྱང་མཐོང་ཆག་པོས།།

ཁྲོམ་གྱི་གཡོ་ཟོལ་འགོས་པའི་ཞལ་འབག་ཁྲ་ཁྲ་མཐོང་སོང་།།

ཡང་དག་དཔེ་ཡི་རྡང་ནས་དེ་ཉིད་མར་མར་དཔྱང་སྟེ།།

སྒྱུ་མའི་ལྕང་ལྕུག་ཕྲ་མོས་བརྩེ་བས་གཞུ་རྒྱུ་བྱུང་ན།།

ཐ་སྙད་གཏེར་རྡོ་ཅན་ལས་འདོད་པའི་གསེར་ཕྱེ་བཙགས་ཤིང་།།

ཚིག་མཛོད་ལྕགས་ར་ཅན་ལས་ལན་མང་ཕྱི་ལ་བྲོས་ཏེ།།

སྨྲ་བསམ་བརྗོད་འདས་རེ་ལ་ཉམས་ཀྱི་ཁྲལ་རེ་འཇལ་བ།།

ཁ་ཤུལ་ཉི་མ་དྲོ་བའི་སྨོན་ལམ་རྒྱག་སྟངས་གཞན་ཞིག །

རྫས་ཀྱི་ཟངས་སྐུད་ཕྲ་མོར་ཚོར་བ་གློག་གི་སྙིང་བོ།།

གཤིས་ཀྱི་ཚེར་ཕུང་རྩེ་ལ་རེ་བ་བལ་ལུ་དཀར་འཇམ།།

ཡས་གཏམ་ལྷ་ལ་མཆོད་ཀྱིན་མས་གཏམ་གྲོང་ནས་བསྐྱུར་བ།།

རྨི་ལམ་ཤེལ་གྱི་ཕོ་བྲང་ཁྱེད་ལ་དབུལ་བའི་ཆེད་ཡིན།།

ང་རང་ཁྱེད་སར་བགྲོད་པར་མདུད་པའི་ལམ་ཡིག་དགོས་ཀྱང་།།

སྐུ་ཉིད་ང་སར་སྤྱོན་པར་དེ་འདྲའི་ངལ་བ་མིན་ཏོ།།

རྟོག་པ་ཆུ་ལ་བཤལ་ཏེ་ཟུར་མིག་གཡོ་ཙམ་བྱུང་ན།།

ང་ནི་རྣམ་པ་ཀུན་ཏུ་ཁྱེད་ཀྱི་ཁྱིམ་མཚེས་ཡིན་ཏོ།།

ཡོད་མདོག་ཁྱེད་ལ་ལྡན་ཀྱང་གྲིབ་མར་ལྷན་པ་དགུ་བརྩེགས།།

མེད་མདོག་ང་ལ་ཤར་ཀྱང་སྣང་བ་ཁྲི་ཁའི་གདན་ཆ།།

རང་བཞིན་རྡུལ་ཙམ་མེད་ན་སོ་སོར་དབྱེ་དགོས་མེད་རུང་།།

དབུལ་བོ་ང་ཡི་མགྲིན་པར་ཁྱེད་ཀྱི་མི་ཚེ་ལྐུགས་འདུག །

མཉན་དཔོན་གྱི་གླུ

གཙང་བོའི་ཟུར་མིག ངའི་གྲུ་ཤན་འདོགས་སའི་ཕུར་བ་ཡིན།

རབ་ཁའི་རྨ་རྙིང་། ངའི་གླུ་ངག་འཁྱུག་སའི་མགྲིན་པ་ཡིན།

ཆུང་དུས། ཐན་པས་གཤེར་བའི་སྐོམ་གདུང་དེའི་དྲིན་ལ།

གཞོན་དུས། ལྷ་སྐད་ཀྱི་ཟིལ་བ།

གཙང་པོའི་གཞུང་ནས་འཚེར་བར་སྒུག

པང་གཅལ་ལ་བཞད་པའི་ཞབས་སོར་གྱི་མེ་ཏོག

ཞེ་སའི་བུང་བ་དང་མ་བྲལ་བར་གཙང་འགྲམ་ལ་བག་གསར་བཞིན་བསྐྱལ།

ཕ་རིའི་རྡུལ་འཚུབ་ཀྱིས་གཡོས་པའི་དར་ལྕོག་ཁྲ་བོ།

ཤ་གསེང་ན་ལུས་པའི་བུ་ལོན་ཞིག་དང་འདྲ་ཡང་།

སྲོག་གི་རྒྱང་མཐོང་གཡར་ནས་ལྟ་དུས།

སྙིམ་པའི་ནང་གི་ཡོན་ཆབ།

གངས་རི་མཐོང་བྱེད་ཀྱི་མེ་ལོང་དང་འདྲ།

ཁྱེད་ཀྱི་དུས་ཚོད་ལ་ལྕེ་ལྡག་བྱ་བཏུབ་སའི་གཙང་ངོགས་འདི་ནས།

ནམ་ཡང་ཕྱིར་བལྟས་སློག་མཁན་གྱི་གཏམ་རྒྱུད་བསྒྲུགས་ཏེ།

རྒྱུ་སྐར་གྱི་གསེང་ལ་རྩིས་ཁྲ་བཟོས།

སྤྲིན་པ་ས་ཁྲས་ངལ་བ་ཅན་དེར།

ཡིད་ངོར་བསྙལ་པའི་ཞོ་གསར་འབུལ་མ་ཐུབ་ནའང་།

གཙང་བོའི་ཕར་ཚུར་ནས།

རྨི་ལམ་གྱི་ལྗང་པ་ས་ཁར་བུད་བྱུང་།

གྲུ་ཤན་རྟ་མགོས་ང་ལ་ངག་སྨྲས་བྱུང་།

བློས་བསླངས་དཀར་པོ།

དེ་རིང་། འདྲིས་པའི་ཡུལ་ལ་ས་བཀྲ་ཞིག་འབྲི་འདོད་སྐྱེས།

ཆུང་ཆུང་ལག་མཐིལ་ལྟ་བུའི་ས་བཀྲ་ཞིག་འབྲི་འདོད་སྐྱེས།

གོམ་པ་སྤོ་ས་མེད་ས་མེད་ནའང་།

གསང་བའི་ཞེ་ཚིག་ཅིག་ཤོང་ན་ཆོག

ཐོག་མར་སྡོང་རྒན་ཞིག་བྲི་བར་བྱ།

བྱ་ཚང་དང་གྲིབ་བསིལ་རླུང་བུས་འཁུར་ནའང་།

གཤོག་སྒྲོ་ཁ་ཤས་སྡོང་རྩར་ཡོད་པ་ཞིག་བྲིས་པས་ཆོག

བར་དུ་ནས་སྙེ་ཞིག་བྲི་བར་བྱ།

སྦྲ་ནག་དང་ཞིང་སར་ལྟེབས་ཆག་ཤོར་ནའང་།

རྩམ་དྲིས་མ་བཏང་བའི་སོག་མ་ཞིག་བྲིས་པས་ཆོག

མཐའ་མར། གཙང་པོ་ཞིག་བྲི་བར་བྱ།

ཀོ་གྲུ་དང་རབ་ཁ་ཤྭ་འོད་ཀྱིས་འཁྱེར་ནའང་།

ཆུ་རྒྱུན་དང་ལྡོག་སྟེ་འཁྱུག་པའི་ཉ་མོ་ཞིག་བྲིས་པས་ཆོག

ད་དུང་། རི་ལ་དབུ་འཕང་ཞིག་ཀྱང་བྲི་བར་བྱ།

མི་མགོ་དམའ་དུས།

ལྷ་ལ་ཡོན་ཆབ་འདྲེན་ས་དེ་ཉིད་ཡིན།

ལྷ་སའི་མཚན་མོ།

མིག་རྐྱེན་ཁྲ་ཁྲ་ཡི་ཞགས་པ་གཅོད་བཞིན།།

ཡི་གེ་ནག་ཆུང་གི་སྐྱེ་གནས་གསོ་བཞིན།།

སྣང་བ་རང་ཡན་གྱི་གླུ་ལ་བསྙེས་ཏེ།།

ལྷ་སའི་མཚན་མོ་ཡི་གྲལ་ལ་འཚང་ཡོད།།

རི་དྭགས་ཕོ་མོ་ལ་ལྟེམ་རྐྱང་མེད་པར།།

གླང་སྣ་རླུང་གཤགས་ལ་ཡ་ཡོམ་མེད་པར།།

སྤེན་རྒྱན་སྨུག་པོ་ལ་ལྷོད་བག་མེད་པར།།

ལྷ་སའི་མཚན་མོ་ལ་རྒྱང་བཀྲག་བཏོད་འདུག།

མཆོད་མེ་ལམ་ལམ་ནི་ཡིད་ཀྱི་སྡོང་རས།།

དྲ་བ་དྲ་ཕྱེད་ནི་དཔུང་གི་ཟེ་བ།།

རྡོ་གཅལ་སྔོན་མོ་ནི་རིགས་པའི་གདན་ཆ།།

ལྷ་སའི་མཚན་མོ་ཡི་བཀོད་པ་མཛེས་པ།།

མཐའ་བཞིའི་རི་བོ་ལ་མགོ་འཕང་བསྐུར་ཡོད།།

སེམས་ཀྱི་ཁྲབ་རྨོག་དེ་ཞོར་ལ་བསྐུར་ཡོད།།

སྐྱིད་ཤོད་གྲོག་ཆུ་ལ་བཞུར་མཚམས་བསྐུར་ཡོད།།

ཁོང་ཟོན་རྣོན་པོ་དེ་ཞོར་ལ་བསྐུར་ཡོད།།

རྡོ་ཁང་གྲུ་བཞི་ཡི་རྩིག་པའི་ངོས་ཀྱི།།

སྨག་གི་ཤེལ་ཏོག་ལ་དཀར་རྩི་བབས་འདུག།

སྒེའུ་ཁུང་ཆུང་ཆུང་གི་ཟུར་མིག་ཕྲ་མོར།།

མ་འོངས་སྒྲུང་མཁན་གྱི་ཉམས་བཟང་ཤར་འདུག།

མཛེས་པའི་ལྡེབས་རིས་ཀྱིས་གསུང་སྐད་བསྐྱོན་པས།།

བརྗིད་པའི་གླེགས་བམ་གྱིས་ཟིང་ཆ་མནན་པས།།

སྙན་པའི་སྟོད་གཞས་ཀྱིས་ཡིད་གདུངས་བསལ་བས།།

ལྷ་སའི་མཚན་མོ་དེ་གཞན་ལས་མཚར་བ།།

ཆང་གི་མཚན་མོ་ལ་ཆར་བ་འཛུམ་སོང་།།

ཆང་མ་སྣང་གསལ་གྱིས་དྲ་ཡོལ་བརྒྱབ་སོང་།།

ཆང་གི་བཟི་ཁ་ནས་ཡིད་གཉིས་བཙེམས་པ།།

ཆང་མའི་སྐྱིད་སྡུག་གི་སྐུད་པའི་དྲིན་ཏོ།།

མི་འགྱུར་དཔུང་རྡང་གི་རྡོ་རིང་ངོས་ཀྱི།།

ལུང་པའི་ལྡེ་མིག་གི་རི་མོ་མཛེས་པ།།

སྐར་འོད་ཆེམ་ཆེམ་གྱི་ཐ་གུ་ཕྲ་མོ།།

ལྷ་སའི་ལྕགས་རི་ཡི་རྡང་ལ་དཔྱངས་འདུག།

སྐྱིད་ཆུའི་རབ་ཁ་ནས་དུས་ཚོད་བཙགས་དུས།།

ཉ་མོའི་གཤོག་རྩེ་ལས་འཕྲིན་ལན་འཁྱུག་སོང་།།

མུན་པའི་ཡིག་སྐོགས་དེ་ཆུ་ལ་བཏབ་པས།།

ང་དང་གྲམ་རྡོ་ལ་ཧབ་ཆ་ཞིག་ཤོར་སོང་།།

བོར་བའི་རྣ་ལུང་གིས་སྡུག་ལ་སྦྱར་ཀྱང་།།

ལྷ་སའི་མཚན་མོ་ལས་ཁོང་ཤེད་བསགས་ཡོད།།

ས་ཚིགས་ཕ་རོལ་གྱི་ཟླ་སྣང་དཀར་པོ།།

ཟིམ་ཟིམ་འཇོ་བ་ལ་སྨོན་ལམ་ཞུས་ཡོད།།

ཆིག་ལབ།

-----སྙན་ངག་རྩེ་གྲ་ལ་གོ་བ་ལེན་སྟངས་ཤིག

སེམས་ཅན་དོན་གང་རྨོངས་པ་དེ།།

ཡིད་ཀྱི་སྤྲུལ་བས་བསལ་བྱས་པ།།

ཉ་མོ་ཆུ་ལ་འཇུག་པ་ལྟའི།།

སྣང་བའི་གར་གྱིས་ཁོ་བོ་སིམ།།

ལན་རེར་ཆོས་ཀྱི་དབྱིངས་ལ་སྙེག།

ལན་རེར་ཀུན་རྟོག་ཉམས་ལ་གཞིག།

རྟག་ཏུ་རང་གི་སེམས་ལ་ལྟ།།

ངག་རིག་སྒྱུ་མར་ཉམས་རྟོགས་འདྲེས།།

ཚིག་འབྲུ་མཛེས་ལ་དོན་བཟང་གིས།།

རྣམ་རྟོག་ཁུ་འཕྲིག་གཞོམ་པར་འབད།།

མགོ་བོ་དགྱེས་པར་མ་མཛད་ཀྱང་།།

ནམ་མཁའ་སེམས་ཀྱིས་མཐོང་དུ་ཡོད།།

ལམ་གྱི་རིམ་པའི་གཞུང་རྟ་ལ།།

སྙན་ངག་བློ་སྦྱོང་ཡལ་ག་མཛེས།།

གདོང་ལེན་པ་ཡི་སྙན་ངག་མཁན།།

རྟག་ཏུ་ངེས་འབྱུང་གྲིབ་བསིལ་བསྟེན།།

འཆི་བའི་བརྡ་ལས་གསོན་པ་གོ།

གསོན་པའི་ཉམས་ལས་འཆི་བ་མཐོང་།།

རང་བཞིན་འགགས་པའི་འཚོ་ཚིས་ནི།།

སྙན་ངག་བྱེད་པོས་གཡར་པོར་འཛིན།།

རྣམ་ཤེས་སྨྱོས་པའི་བཅོས་ཐབས་ལ།།

གཏམ་སྙན་དགོས་པ་རྒྱུད་བཞིར་གསལ།།

ཡིད་གདུངས་ནད་ཀྱི་སྲུབས་ཀ་ནས།།

ངག་སྙན་སྨན་གྱི་ལེགས་ཚོགས་འཕྲོ།།

སྙན་ངག་ཐག་པའི་རྡང་རིང་གིས།།

ངེས་མེད་ས་རྡུལ་མི་ཐེག་དུས།།

དྲན་དང་ཤེས་བཞིན་ལྡན་པའི་མིས།།

རབ་ཏུ་སྤྲུག་པར་སྡོང་གྲོགས་མཛོད།།

སྨོན་ལམ།

འཁོར་བའི་རྩིག་པ་འཛིན་པའི་འདམ་གྱི་ཤེས་རབ།།

དོན་གྱི་བང་རིམ་གཅོད་པའི་སྟོང་བའི་བཞིན་སྒྲ།

རེ་དོགས་ཐ་གུ་སྡོམ་བྱེད་རིགས་པའི་འཕང་ལོ།།

རྟིང་མའི་ལོ་ལ་ད་དུང་ཡོད་པའི་སྨོན་ལམ།།

ངག་གི་དར་ལྕེ་གཡོ་སའི་སེམས་འཕང་མཐོན་པོ།།

འདི་སྣང་ཕུག་པ་བརྟོལ་བྱེད་སྒྱུ་མའི་དབྱངས་རྟ།།

ཁྲོམ་གྱི་གཡོ་ཟོལ་ཕུད་སའི་སྒེའུ་ཁུང་ཆུང་ཆུང་།།

རྟིང་མའི་ལོ་ལ་ད་དུང་ཡོད་པའི་སྨོན་ལམ།།

སྨོན་ལམ་བཟང་བོ་བློ་ཡི་རྫིང་ཆུང་སྔོན་མོ།།

མི་ཚེའི་སྟོན་མཚན་བཀྲ་བའི་ངོ་བོར་ཤར་ཅིང་།།

དབྱངས་གསལ་དག་པའི་རི་མོ་ཐེངས་གཅིག་བྲི་བར།།

རྟིང་མའི་ལོ་ལ་ད་དུང་ཡོད་པའི་སྨོན་ལམ།།