དབྱངས་ཅན་སྐྱབས་ཀྱིས་སྙན་ངག་བདམས་བཀོད་ །

དབྱངས་ཅན་སྐྱབས། དངོས་མིང་ལ་རྡོ་རྗེ་ཚེ་བརྟན་ཞེས་འབོད་ཅིང་། གཅིག་དགུ་དགུ་བཅུའི་ལོ་སྟོད་ཙམ་ལ་གསེར་རྟའི་འབྲོག་ཁྱིམ་ཕལ་བ་ཞིག་ཏུ་སྐྱེས། 2015ལོ་ནས་ཡིན་ལ་མིན་པའི་སྙན་ངག་ཐར་ཐོར་རེ་འབྲི་བའི་ལས་སུ་ཞུགས། ངས་སྙན་ངག་འབྲི་དོན་ནི་སྨྲ་བསམ་བརྗོད་འདས་ཀྱི་གཉུག་མའི་དགའ་སྐྱོ་དང་མི་སྒེར་གྱི་བརྩེ་དུངས་མཐའ་དག་ཐ་སྙད་ཀྱི་རོལ་དབྱངས་སུ་དཀྲོལ་འདོད་པས་ཡིན།

གངས་འདབས་ཀྱི་དྲན་པ།

དབྱངས་ཅན་སྐྱབས། (དཀར་མཛེས།)

འཚོ་བའི་མཁར་གྱང་ངོས་སུ་བྲིས་པའི་སྤྲིན་དཀར།།

ཡིད་འོང་སྙིང་སྡུག་ང་ཚོའི་བརྩེ་བའི་སེམས་བསྐྱེད།།

ཞེ་མཐའི་གཙང་བོ་ཉུལ་བའི་ཁྲུང་ཁྲུང་དཀར་མོ།།

ལས་ཀྱི་རྨུ་ཐག་རྒྱང་ལ་ལྟུང་བ་མ་གནང་།།

མཚོ་མཐའི་ངང་ཆུང་ཁེར་འགྲོ་སྐྱོ་བས་བརྣང་ཡོང་།།

ས་སྲོས་ལྷས་སུ་འཕུར་བའི་བྱ་ཁྱུའི་ཚོགས་དག།

གངས་དང་གཙང་པོའི་འདབས་སུ་འཕུར་ལྡིང་མ་རྒྱག།

སྣང་བའི་སྨུག་ལོང་ནང་གི་རྒྱང་རིང་དྲན་ཡོང་།།

སྐར་ཆེན་མིག་ཟུང་མཐའ་རུ་ཆར་ཐིགས་འགྲིལ་ཡོང་།།

དྲན་པའི་གཙང་པོ་སྒུལ་ན་ཅི་འོང་ཅི་ཤེས།།

གཉུག་མའི་དབྱིངས་སུ་བབ་པའི་སྐར་འབྲུ་མེ་ཏོག།

འཛུམ་ཆུང་ཟེའུ་འབྲུ་ཚོར་བའི་གཤིས་སུ་འཐོར་བ།།

སྐལ་བའི་སྙན་ངག་ཅིག་གི་རྒྱུ་མཚན་ཡིན་ལ།།

གང་གིས་མཚོན་ཐབས་མེད་པའི་བརྩེ་འདང་འདི་ག།

ནམ་ཞིག་ཁ་དན་དམར་པོའི་རྟེན་དུ་བྲི་ཆོག།

2018-10-28ཉིན།

སྒྱུ་འཕྲུལ་གྱི་ཉམས་གླུ།

དབྱངས་ཅན་སྐྱབས།

འབྱམས་ཀླས་ངག་གི་རླུང་པོ་གཡོ་བ་ཡིས།།

བདག་ཉིད་ནང་སེམས་རྣམ་རྟོག་དྲུང་པོ་རུ།།

སྙན་ཚིག་པད་མོ་ཉེ་བར་མི་བཞད་ཀྱང་།།

འཆི་འཕོ་བྱེ་བ་ཕྲག་བརྒྱའི་རྡུལ་ཕྲན་རེེར།།

ངོས་ཀྱི་སྐྱོ་གདུང་སྨུག་ཆེན་ལྡང་མགོ་བརྩམས།།

ཚོར་ཤེས་འདུ་ལོང་འཁྲིགས་པའི་སྤང་ཐང་དུ།།

བག་ཆགས་སེམས་ཀྱི་འཆར་སྒོའི་མེ་ཏོག་རྒྱས།།

སྣང་བ་སྤྲིན་ལ་བཏེགས་པའི་འབྲོང་ཆུང་རང་།།

རླུང་གི་རྭ་རྩེར་ངལ་བའི་ཟེ་བ་འཐོར།།

འཁྲུལ་ཞིང་རྨོངས་པའི་ན་ཟུག་ཐགས་སུ་སྦྲན།།

དགའ་སྐྱོའི་ན་བཟའ་མིག་མཐར་གཡོ་བའི་ཁྱོད།།

སྒྱུ་མའི་རྟ་གླང་ཆུ་ལ་འདེད་གྲབས་བྱས།།

འཁོར་བའི་ཚལ་དུ་ཡི་གེས་མེ་སྒོང་བརྒྱབས།།

སྐར་མའི་མིག་ཆུ་མཚོ་ལ་ཉིལ་བ་དང་།།

མིག་འབྲས་འཛུམ་ཆུང་བོར་བའི་ལོ་ཟླ་དག།

མི་ཚེའི་དགུན་ཁར་ཉེ་བའི་ཉམས་སྣང་ཡིན།།

༢༠༡༨-༡༠-༡༤ཉིན།

འཁྲེང་སེམས་སྤར་གང་།

དབྱངས་ཅན་སྐྱབས།

སྣང་བའི་མཚོ་ཁར་བབས་པའི་ངང་བ་སེར་པོ།།

དུངས་སེམས་མེ་ཏོག་སྤར་གང་འདི་ནས་བསྐྱུར་ཞིང་།།

ཐོག་མའི་གཏམ་རྒྱུད་མགོ་མ་འདི་ནས་བརྩམས་ཏེ།།

ཞེན་ཆགས་གཤོག་སྒྲོ་རྨས་མ་རླུང་བུས་སྐྱོར་བཞིན།།

རྒྱང་རིང་མཁའ་མཐའ་སྐོར་ནས་གང་དུ་ཆས་འགྲོ།

སྲིད་པའི་གངས་རྒན་རྩེ་ནས་ཕྱིར་མིག་འཕང་ན།།

ངའི་སེམས་ཁ་བའི་འདབ་མ་རེ་རེར་སྤྲུལ་ནས།།

ཁྱོད་ཀྱི་གམ་དུ་དལ་ཞིང་ལྷོད་ཀྱིས་འཕུར་འོང་།།

ཆར་རླུང་གྲང་རེག་འཐབ་པའི་མཐོ་སྒང་ཞིག་ཏུ།།

དཀར་དམར་རྩི་ཐོག་འཛོམས་པའི་འབྲོག་ཐང་དེ་རུ།།

ཞེ་འདང་དྭངས་གཙང་བྱིས་བློ་འདྲ་བོ་གཉོར་ཏེ།།

བརྩེ་སེམས་ཁམ་གང་བཟུང་བའི་སྦྲང་ཆུང་འཁྱམ་པོ།།

དྲན་འཛིན་ངོས་སུ་ཐོགས་པའི་མི་དེ་མེད་ཕྱིན།།

སྣང་བའི་ལུང་པར་ཤིང་གི་ཤིང་སྣ་འཛོམས་ཀྱང་།།

དུས་བཞིའི་འཁོར་བསྐྱོད་བར་ནས་ཚོར་བ་གྲང་གི།

རི་བོའི་སྐེད་ཀྱི་སྨུག་སྤྲིན་སྨྲེང་རོགས་ཡིན་འགྲོ།

2017:8:11ཉིན་གྲུབ།