2018ལོའི་སྦྲང་བུའི་སྙན་ངག་བདམས་བཀོད།

སྦྲང་བུ།དངོས་མིང་ལ་ཏྲེ་སྲས་བློ་བཟང་བསོད་ནམས་འབོད།དཀར་མཛེས་སུ་རོང་ཁྱིམ་ཞིག་ཏུ་སྐྱེས།༢༠༡༦ལོ་ནས་འགོ་བཟུང་ནས་རྩོམ་རིག་གི་ལམ་དུ་ཞུགས་ནས་སྔ་གཞུག་ཏུ་སྙན་ངག་ཁག་བོད་ཁུལ་གྱི་དུས་དེབ་༼ གངས་དཀར་རི་བོ་༽ ༼ ཁམས་པའི་ཚགས་པར་ ༽དང་༼ རྔ་བའི་ཚགས་པར༽་དང་༼ གཞིས་རྩེའི་ཚགས་པར་ ༽དང་དུས་དེབ་སོགས་འཕྲིན་སྟེགས་གང་མང་ཞིག་ནང་ཁོ་བོའི་སྙན་ངག་མཇལ་རྒྱུ་ཡོད། ཁོ་བོའི་སྙན་ངག་ནི་ནད་པའི་ལྷ་མོའམ་རྣམ་ཤེས་ཁེར་འགྲོ་མ་ཞིག་ཏུ་འཛིན།

སེམས་བསྐྱེད།

སྦྲང་བུ། དཀར་མཛེས།

སེམས་སུ་བཏགས་པའི་ཕོ་བྲང་དེ་དང་རྒྱང་དུ་གྱེས།།

ཡོངས་སུ་སྤྲུལ་བའི་ཆོས་ཉིད་དེ་དང་རྒྱང་དུ་གྱེས།།

མ་བརྟག་མ་དཔྱད་འཇིག་རྟེན་ཞིག་ནས་རྒྱང་དུ་གྱེས།།

མཐའ་མེད་གཙང་བོ་བཞུར་ལམ་ཁྲོད་དུ་རྒྱང་དུ་གྱེས།།

བསམ་པའི་དཔལ་ཡོན་ལྗོན་པ་འགུལ་བ་རྒྱང་དུ་གྱེས།།

ཟུར་ཟའི་འཇིག་རྟེན་ལྷུང་ལྷུང་འབབ་པ་རྒྱང་དུ་གྱེས།།

ལྷ་མོའི་ཚོགས་སུ་ཆོ་འཕྲུལ་དཀར་ནག་རྒྱང་དུ་གྱེས།།

ཅི་ཡང་མ་ཡིན་རྟོག་པའི་གསེབ་ནས་སེམས་ཚོར་བྱུག།

སེམས་སུ་འཕྲོ་བའི་འོད་ཟེར་མ་ཡིན་དྲོད་དུ་བཅུག།

ནམ་ཞིག་འཆི་བའི་བློ་འདས་མོད་པོའི་རྟོག་འགྱུ་འཁྲུངས།།

རྒྱང་དུ་གྱེས་ཁའི་རྨི་ལམ་འཁྱག་པོའི་ཟླ་གྲིབ་འཆར།།

སྨུག་པའི་དབྱངས་སུ་ལ་གཞས་བླངས་བ་ཅི་ཞིག་མཚོན།།

གནའ་གཏམ་སྨྱོན་པའི་བཟི་ཁར་འཆོར་བའི་དོན་ཞིག་གོ།

ཐག་རིང་ཞིག་ལ་བྱད་གཟུགས་ནག་པོའི་མེ་ལོང་དེ།།

ཡུན་དུ་བཏང་བའི་དོན་དམ་སེམས་བསྐྱེད་ཞིག་ཏུ་འདྲ།།

བསམ་པའི་འཆར་ཡན་རླུང་འཚུབ་ཞིག་ལྟར་མཁའ་རུ་གྱེས།།

སྨྲེང་བ་གཙང་མའི་འཇིག་རྟེན་བཀྲུས་བའི་ནམ་མཁའ་ཡག།

སེམས་སུ་འདང་བའི་འཇིག་རྟེན་ཕྱེད་ཀར་བུ་ལྟར་གཅེས།།

བློ་བཅོས་མིན་པའི་གདོང་མའི་ཡན་ལག་སེམས་སུ་འཁྲུངས།།

ཐམས་ཅད་ནང་ནས་ཐམས་ཅད་བཟང་བའི་སྐབས་ཤིག་ལ།།

འདོད་བློ་ཟབ་མོའི་སྙིང་རྗེ་ཞིག་ལ་བྱམས་པ་འཁྲུངས།།

བཟི་ཁ་དྭངས་བའི་སྒེའུ་ཁུང་ཞིག་ནས་འདི་ལྟར་བསམས།།

2018 9 20 ཉིན།

ས་སྲོད་ཀྱི་སྣང་བ།

མུན་པ་གཏོང་བའི་ས་སྲོད་འཇིག་རྟེན་ཀུན།།

ཞེ་འདྲིས་དམར་པོའི་མེ་ལོང་གཡས་གཡོན་ན།།

སེམས་སུ་ཕྱུག་པའི་སྨྲེང་བ་དཀར་ནག་འཁྱིལ།།

ང་ཡི་རྒྱང་རིང་ཕྱུག་པའི་ཉིན་སྲིབ་ཀུན།།

ཡུན་དུ་གཏོང་བའི་སྒྲུང་གཏམ་བྲིས་ནས་ཡོད།།

སྨྲེང་བ་ཐམས་ཅད་སེམས་སུ་དྲེག་པ་ཆགས།།

མིག་ཏུ་མཛེས་པའི་སྔ་མོའི་གནའ་གཏམ་ལ།།

ཞེ་འདྲིས་གཙང་བོའི་ཕ་རོལ་ཡུལ་དེ་མཛེས།།

ནུབ་མཐའི་ཉི་མ་ཐག་རིང་ཕྱོགས་སུ་ལྷུང་།།

རབ་མཛེས་མེ་ཏོག་སླར་ཡང་སེམས་སུ་འཐིམ།།

སྐྱེ་འཆི་མང་པོའི་སེམས་པ་དུག་གིས་ཟིན།།

བགྲང་བྱ་ནག་པོའི་སེམས་པ་བརྐུས་ཐེངས་ན།།

ཡིད་བརྙན་བང་རིམ་སྟེང་ན་ཁྱེད་རང་ལྷག།

ཡོད་ཚད་སེམས་སུ་བཀལ་བའི་ཞག་དེ་ཡིན།།

སེམས་པ་ཉིན་སྲིབ་གཉིས་ཀ་ངོ་བོ་མཛེས།།

ས་སྲོད་ཉི་མ་དེ་ཡང་ག་ལེར་ངང་།།

འཇིག་རྟེན་གཞན་དུ་ཆས་པའི་སྣང་ཚུལ་ཞིག།

ག་ལེར་ག་ལེར་ངང་དུ་བྱམས་པ་བྲིས།།

བྱམས་པའི་མཁུར་ཚོས་དམར་པོ་སེམས་སུ་བྲིས།།

ཐག་རིང་ཐག་རིང་ཞིག་ལ་འདི་ལྟར་ལབ།།

2018 9 19

ཝེ། ང་ཡི་ལས་གཙང་མ།

སུ་ལ་ཡང་མི་ཕོད་པའི་སྣང་བ་ཞིག།

ཡུན་རིང་དང་ཡུན་རིང་ལ་གསང་བ་དེ།།

རྩྭ་ཐང་ཞིག་གི་བས་མཐའ་རུ་བཟུང་ཞིང་།།

གོ་མེད་ངང་ཁྱེད་ཀྱི་པང་དུ་ལུས་ཡོད།།

སྣང་བ་ཙག་ཙིག་གིས་ཁྱེད་རང་བསྡམས་ལ།།

ནམ་མཁའ་རིང་བོའི་འདིས་ཁྱེད་རང་བོར་ལ།།

ཆུ་བོའི་མཐའ་ངོགས་ནས་ཁྱེད་རང་བཞེངས་ལ།།

ཐ་སྙད་ཙག་ཙིག་གིས་ནགས་ཚལ་བསྐྲུན་ཆོག།

མུན་པའི་གསང་བ་དེ་ལ་ལྐོག་ཏུ་ཉན་ཡང་།།

མཚན་མོའི་འུག་པ་ཞིག་ལས་ཅི་ཡང་མེད།།

མཚན་མོའི་འཇིག་རྟེན་བོར་བའི་ཉིན་མ་དེར།།

བདག་ཉིད་སྲང་ལམ་དེ་རུ་ཆས་བཞིན་འདུག།

རང་ཉིད་སྐྱ་བོ་ཞིག་ཏུ་ངོས་བཟུང་ཞིང་།།

མ་འོངས་སྒེའུ་ཁུང་ངོས་སུ་ང་རང་འབྲི།།

ང་རང་བྱིས་པ་ཡིན་པའི་སྣང་བ་འབྲི།།

སྣང་བས་འཇིག་རྟེན་བཟུང་བའི་རྒྱལ་བོ་འབྲི།།

2018 8 3

ཀྱེ། ནམ་ཞིག་གི་གླུ་གཞས།

ཟླ་བའི་ཟོལ་གྱིས་མུན་པ་གྱོན་པའི་ས་སྲོས་དེ།།

མིག་གིས་མཐོང་བའི་རྒྱང་རིང་ཞིག་གི་སྤྲིན་པ་ཡང་།།

གམ་དུ་སླེབས་ཤིང་ནམ་མཁའི་ངོས་གཅིག་ཡོལ་བ་ན།།

སྨུག་པ་རྒྱས་པའི་ཟླ་བའི་མི་དེ་གང་ལྟར་ཕྱིད།།

མེ་ཏོག་ཆར་ཞོད་ཆེ་བའི་དཔལ་རིས་སྨུག་ལྗོངས་ཀྱང་།།

རླུང་བུ་རྟ་རུ་བཞོན་པའི་བདག་ཉིད་རྟོག་པ་དེས།།

ཞེ་རུ་འཚེ་བའི་གུར་ཀུམ་མེ་ཏོག་སེམས་སུ་བཅིངས།།

སྣང་བ་དེ་ཡང་ཞེ་རུ་བཀོད་པའི་གཟུགས་འདས་སུ།།

རླུང་བུ་ཞིག་ལ་གློག་དམར་འཁྱུག་པའི་མི་ཞིག་ལ།།

སྣང་བ་རལ་བའི་སྐུད་པ་དེ་ཡང་འགུལ་བ་བཞིན།།

གླེགས་བམ་སེར་པོའི་མི་ཚེ་དེ་ཡང་མེད་གྱུར་ན།།

སྨག་རུམ་འཁྱིལ་ཞིག་སེམས་སུ་བབས་ན་ཅི་ཞིག་ཚོར།།

ཟླ་བའི་ནང་གི་མི་ཚེ་དེ་ལ་བསམ་གཞིགས་དེ།།

མཚན་མོ་དྲན་པའི་མཇུག་གཏམ་དེ་ཡང་ཤར་བས་ན།།

སྔོན་འགྲོ་རྐང་དྲུག་ཁྱེང་རང་བསུ་བ་ཅི་ཞིག་བདེན།།

བདེན་པའི་ནང་ནས་མི་ཚོགས་སྐག་པ་ངང་གིས་ཤེས།།

བྱེ་རླུང་སྤུར་བའི་ངོ་གདོང་ཞིག་ལ་བལྟས་ཐེངས་རེར།།

དྲི་མ་ཀློང་གི་འཇིག་རྟེན་གསར་བའི་མི་ཞིག་ཀྱང་།།

འོད་ཟེར་འཁྱིལ་བའི་གཞས་ར་ནང་གི་ཁྱེད་རང་ཡང་།།

ང་དང་རྒྱང་བའི་ཁོང་མོའི་སྐྲ་ལོ་ཞེ་རུ་འཐོམས།།

དུས་ཚོད་ནག་པོའི་ལས་དབང་གོན་པའི་དུམ་བུ་དེ།།

མེ་ཏོག་གཏོར་བའི་བློ་གཞོང་དེ་ལ་ཚུགས་པ་འདི།།

བགྲང་བྱའི་བག་ཏུ་གླེགས་བམ་སེར་པོའི་ཐ་སྙད་ལ།།

བརྩེ་མགུར་ཞེན་པའི་གཙང་འགྲམ་དེ་ན་ཆར་བ་འབབ།།

བརྒྱ་ཆའི་དབང་གིས་མི་ཚེ་ཕྱེད་ཀ་འདར་བ་འདི།།

རོང་ཁྱིམ་ཞིག་ན་ལང་ཚོའི་དཔལ་ཡོན་ལྷན་ཏུ་བཞད།།

ཞོགས་པ་ཞིག་ལ་མཐའ་མཇུག་དྲངས་བའི་མཚན་མོ་ཡང་།།

ཡིད་ཀྱི་བང་རིམ་གསེར་སྒ་དེ་ཡང་གདན་ཏུ་སྟན།།

ལང་ལོང་འབབ་པའི་རླུང་བུ་ནག་པོ་ཅི་ཞིག་ལགས།།

སིང་སིང་བཅིངས་བའི་འཚོ་བ་ལྗང་གུ་ཅི་ཞིག་ལགས།།

ཏག་ཏག་མིན་པའི་རི་སྒང་དྭངས་མ་ཅི་ཞིག་ལགས།།

ཞེ་འདྲིས་བཅངས་བའི་ལྷོད་མེད་ཆུ་བོར་ཅི་ཞིག་ལགས།།

2018 5 24 ཉིན།

སྨྲེང་བའི་གཙང་བོ།

རྒྱང་རིང་སྤྲིན་པ་མཐོང་བའི་སེམས་ཀྱི་གཡས་ཕྱོགས་ན།།

ཡིད་འགྱུ་དམར་བོ་གློད་ཀྱི་སྤྲིན་པས་གཞས་ཤིག་བཏང་།།

རྒྱང་རིང་ངག་ཏུ་གྱེར་བའི་འཁྱག་པའི་གདངས་ཤིག་སྣང་།།

ག་ལེར་དབྱངས་སུ་བཏེགས་པའི་ཁྱེད་ཀྱི་མཚན་མོ་བྲིས།།

རྒྱང་རིང་ཤར་དུ་གཏོང་བའི་རྒྱང་རིང་ནམ་མཁའ་ལ།།

སྨག་རུམ་སྐད་ཅིག་གཏོང་བའི་མཐའ་ཡས་རྩྭ་ཐང་བྲིས།།

ཆོ་འཕྲུལ་དཀར་ནག་བར་གྱི་གླེང་མོལ་བས་མཐའ་ན།།

གྲིབ་མའི་འཇིག་རྟེན་སྟོང་བའི་བདག་ཉིད་ཡུལ་ཞིག་གྲུབ།།

རྒྱང་རིང་སྨྲེང་བ་ཞེན་པའི་རྣམ་སྨིན་དཀར་ནག་གམ།།

ང་རང་འཇིགས་པའི་དབང་གིས་ཉེས་པའི་འབྲས་བུ་ཡིན།།

ནམ་ཡང་ཅེར་བའི་བར་ཐག་ངོགས་ཀྱི་མེ་ཏོག་ལ།།

མེ་ལོང་འཁྱག་པའི་ཉིན་སྲིབ་གཉིས་ལ་མི་ཞིག་བྲིས།།

སྒྲུང་གཏམ་ནང་བཞིན་སྐྱོ་བ་ཟབ་མོའི་རྒྱ་མཚོ་བྲིས།།

རྒྱང་རིང་ངོགས་སུ་མི་སྣ་གཉིས་ཀྱི་སྒྲུང་གཏམ་བྲིས།།

2018 8 9

ཐག་རིང་གི་སྤྲིན་པ།

མཚན་མོ་སྟོང་གི་བཞིན་རས་འཁྱག་པའི་རབ་རིབ་ནང་།།

ཡོལ་བ་ནག་པོའི་གླུ་གཞས་བཏང་བའི་སེམས་འདི་འཚུབ།།

སེམས་པའི་ཞག་ལ་ལྟད་མོ་ཡོང་བའི་སྐབས་ཤིག་ལ།།

བྱེ་ཐང་གསོན་པོར་མུན་པས་གཡོགས་ནས་སྨུག་པ་ཆགས།།

མར་མེ་བཞིན་དུ་སྐད་ཅིག་མཐའ་མའི་ལང་ཚོ་ཡང་།།

ཞག་གི་ཀློང་ནས་དགུན་ཁ་ཚེས་བའི་ངོ་གདོང་འདར།།

ཀྱེ་མ་འཛུམ་གྱིས་ནགས་ཚལ་སྟུག་པའི་ཡུ་མོ་ལགས།།

མེ་ལོང་འཁྱག་པས་མི་ཚེ་བསུ་བའི་སྐབས་ཤིག་མེད།།

དཀར་ནག་མོད་པོའི་མི་ཚེ་འཁྱོངས་བའི་ལས་དེ་འོ།།

ཐག་པ་རིང་པོའི་རྒྱང་རིང་འཐེན་པའི་དུས་ཚོད་འདི།།

ཐག་རིང་ཞིག་གི་རྟ་ཕོ་འདྲོགས་པའི་སྣང་བ་ཙམ།།

མཚན་མོའི་ཞག་ལ་གླུ་གཞས་འཁྱག་པའི་སེམས་དེ་ཡང་།།

ལྗོན་པའི་སྟེང་གི་ཆོ་འཕྲུལ་སེར་པོ་ཅི་ཞིག་ལགས།།

སྣང་བ་བཀུག་པའི་ཕ་ཡུལ་ཞིག་ལ་འདི་ལྟར་ལབ།།

2018 8 16

མཚན་མོའི་སྣང་བ།

སྒེའུ་ཁུང་འདི་ནས་ཆོ་འཕྲུལ་དཀར་ནག་འདབ་མ་གྲོལ་བ་ཅིས་མ་བདེན།།

རྒྱང་རིང་ཞིག་ལ་མེ་ཏོག་བཏབ་པའི་མཚན་མོའི་ལྟད་མོ་མིག་ཏུ་ལྷུང་།།

ཡིག་འབྲུ་སྐྱ་བོའི་གདོང་དུ་བྱུགས་པའི་ང་ཡི་འཆི་བ་དཀར་ནག་ཞིག།

འཆི་བའི་ངོགས་སུ་ཉིན་སྲིབ་གཉིས་ཀའི་མི་ཚེ་འབྲི་བཞིན་ད་བར་དུ།།

མེ་ལོང་འཁྱག་པོའི་སེམས་ཀྱི་སྟེང་ན་འདབ་མ་དྲུག་གི་མཚོ་མོ་འཕྱུར།།

རྒྱང་རིང་དེ་ཡི་མུན་པ་འཆར་བའི་མཚན་མོའི་སྣང་བ་འདམ་དུ་ཉུལ།།

ནམ་ཞིག་བཞད་པའི་མཚན་མོའི་སྣང་བ་བར་ཐག་ཞིག་གི་ལམ་དུ་གྱུར།།

ཆགས་སེམས་ཕྲ་མོས་རྨི་ལམ་དེད་པའི་ནམ་ཞིག་ནམ་ཞིག་ཉེ་བར་གྱུར།།

རྨི་ལམ་སྟེང་གི་མཚན་མོའི་གཞས་ཚིག་ཡང་དུ་ལེན་པའི་ཁྱེད་རང་ལ།།

སྒྲུང་གཏམ་ཞིག་གི་བས་མཐའ་བཟུང་ནས་ཨེན་ཙམ་ངང་གི་ཁྱེད་རང་འབྲི།།

2018 8 14

གྱང་།

མི་ལོ་བརྒྱད་བཅུའི་ཕར་ངོགས་ན།།

ཧི་མ་ལ་ཡི་སེམས་ཅན་ཞིག།

ཉིན་སྲིབ་གཉིས་ཀའི་གཏམ་རྒྱུད་གླེང་།།

དཀར་ནག་གཉིས་ཀྱི་ལག་པ་བསྲིངས།།

སྣང་བ་སྨག་པའི་ཡུལ་སྡེ་ནས།།

རྨི་ལམ་དཀར་པོའི་རྟ་ཕོ་ཞིག།

ཅི་ཡང་མེད་པའི་མཚན་མོ་བོས།།

མཚན་མོ་དེ་ཡིས་ཁྱེད་རང་གླེང་།།

གྲིབ་མ་ནག་པོའི་ཉེ་ས་ནས།།

ཁ་དོག་མེད་པའི་རུས་པ་ཞིག།

ཡུན་དུ་བྲིས་པའི་སྙན་ངག་ལ།།

མཐའ་མཇུག་ཞིག་གི་ཉི་མ་ལྡེ།།

འབྲི་དོན་མང་བའི་སྙིང་ཉེ་རུ།།

གསེར་བྲིས་ལོ་མས་ཁྱེད་རང་བྲིས།།

2018 7 14

པར་རིས་ནང་གི་ཞོགས་པ།

སྐྲ་ལོའི་པང་དུ་ཞོགས་པའི་རྨི་ལམ་ལ།།

ཅི་ཡང་འཁྲུལ་བ་ཡིན་པའི་རི་མོ་དོད།།

གཞན་གྱིས་བསླུ་བའི་གཙང་བོའི་ཕ་གི་ན།།

སྨུག་པའི་ཨ་ལོང་ཁྱེད་ཀྱི་ཉེ་སར་དུ།།

ཚིག་གི་ཕོ་བའི་འཇིག་རྟེན་གཞན་ཞིག་སྙེག།

"སེམས་ཀྱི་ཞོགས་པ"་ཁྱེད་ཀྱིས་མི་ཤེས་ཀྱང་།།

རྨི་ལམ་གཏོང་བའི་བདེ་སྐྱིད་ཕར་ངོགས་ན།།

ས་སྲོད་སྤྲིན་པས་ང་ཡི་གཞས་ཆུང་མགུར།།

ཕལ་བའི་སྟེང་གི་ཕལ་བའི་གཞས་ཆུང་དེ།།

ཕལ་བའི་རང་ལ་ཁྱེད་ཀྱི་གླུ་སྐད་འཚང་།།

2018 6 28 ཉིན།

རྡོ་ཡི་སྙན་ངག

ཟླ་བ་ཞིག་ལ་མུན་པས་གསང་ལན་རྒྱག།

ཉི་མ་ཞིག་ལ་གྲིབ་མས་ལྐོག་ལན་རྒྱག།

ཐ་སྙད་སྟེང་གི་ཉི་ཟླའི་ཟུང་གཅིག་ལ།།

རྡོ་རུ་བཞད་པའི་མཚན་མོའི་མེ་ཏོག་ཞིག།

ལྕགས་ཀྱིས་བསླུས་པའི་སྣང་བའི་ཞྭ་མོ་གྱུར།།

སྐྱ་རེངས་སློག་པའི་ཡར་ངོས་ཟླ་བ་འདི།།

བུད་མེད་ཞིག་གི་སྐེ་རྒྱན་བོར་བ་འདྲ།།

སྣང་བའི་ལག་མཐིལ་ཟླ་འོད་སིམས་དུས།།

བརྟུལ་ཞུགས་ཤིག་ལ་ང་རྒྱལ་བཞེས་ནས།།

ལུས་ཀྱི་ཁོག་ནས་ར་བཟི་མངའ་སོང་།།

ཐ་སྙད་དག་གིས་ང་རང་བཞེངས་ཤིང་།།

ཤ་རུ་ཟུག་པའི་སྣང་བའི་སྙན་ངག།

དོ་ནུབ་ཞིག་ལ་བྱད་གཟུགས་ཨེ་ཡིན།།

2018 1 28

ག་ལེར་ངང་གཞས་ཤིག་བླངས།

མེ་སྤྱང་ནག་པོའི་རི་རྒོད་ཐང་ནས།།

ཨ་ཁུ་ཉི་མས་ཁྱེད་རང་བཙལ་ཞིང་།།

གདོང་གི་ཕྱི་ནང་འཇིག་རྟེན་བོར་ནས།།

སེམས་པའི་ཀློང་ནས་རྡོ་བ་ཉུལ་སོང་།།

ང་ཡི་བག་འཁུམས་ཉིན་སྲིབ་གཉིས་ལ།།

ནུབ་མཐའི་ཀློང་ནས་ག་ལེར་འདས་སོང་།།

འཇིག་རྟེན་འདི་ཡང་ང་ཡི་ཁྱིམ་ཞིག།

དཀར་ནག་གཉིས་ལ་ཁྱེད་རང་བྲིས་ཚེ།།

གཟུགས་སུ་བཀོད་པའི་རྨི་ལམ་དེ་ཡང་།།

སྒྱུ་མའི་གཟུགས་སུ་མེ་ཏོག་སྐག་ནས།།

བཅུ་དྲུག་མ་དེའི་རི་ལ་བྲོས་སོང་།།

སྨྲེང་བའི་ལོང་བ་སེམས་སུ་བཞུར་བ།།

སྨུག་པ་སྐྱ་བོའི་ལང་ཚོའི་ཕག་ན།།

ཡོལ་བ་ནག་པོའི་ཁྱེད་རང་བསྐུངས་ནས།།

སྤང་རི་ནག་པོའི་ཁ་དོག་གུག་སོང་།།

རླུང་བུ་ལྡང་བའི་ས་སྲོད་དེ་ཡང་།།

ཁྲེལ་གཞུང་བོར་བ་ཅི་ཡིས་བདེན་ན།།

ག་ལེར་ངང་དུ་མི་ཞིག་བྲིས་ཡོད།།

སྒྱུ་འཕྲུལ་མ་དེའི་དངོས་གྲུབ་དཀོན་ཡང་།།

འབྱུང་བ་ལེགས་པའི་སྨོན་པ་གྱོང་མེད།།

སྲིད་གསུམ་སྐྱོང་བའི་ང་ཡི་བྱེད་པོ།།

རི་སྒང་མཐོ་བའི་མེ་ཏོག་གཙང་མ།།

རྐྱང་གཞས་ངན་པའི་ཁྱེད་རང་བཙོག་ཚེ།།

ཟླ་འོད་རལ་བའི་མི་ཚེ་འདས་སོང་།།

ཕ་གི་ཞིག་ལ་མེ་ཏོག་བཏབ་ཞིང་།།

ཁྱེད་ཀྱི་སྐྲ་ལོ་རྒྱང་དུ་རེག་དུས།།

སྒོ་ཡོལ་དཀར་ནག་ཁྱེད་རང་སྤྲུལ་ནས།།

མི་ཚེའི་ལོ་གྲངས་སྨྲེང་བ་བརྐོས་ཤིང་།།

ང་ཡི་ཁ་དོག་འཇིག་རྟེན་གཞན་ཞིག།

རྒྱང་ཐག་ཆོད་པའི་མི་དེ་དྲན་སྲིད།།

2018 5 23 ཉིན།

བྱིས་པའི་དུས་ཆེན།

སྨོན་ལམ་གྲང་བའི་ཡུལ་གྱི་ཕ་མཐའ་ན།།

ཨ་ཁུ་ཉི་མའི་བརྒྱུད་ཀྱི་རིགས་བཟང་ཞིག།

ཐག་རིང་ཞིག་ན་ཕ་མཐའི་གཞི་རུ་འཛིན།།

དེ་རུ་སྦྲུམ་པའི་བསྟན་འཛིན་གཡུལ་རྒྱལ་འདི།།

ཨ་ཁུ་ཉི་མའི་སྲོག་གི་འདུ་ཤེས་གྲགས།།

རིག་པའི་ཐང་ལ་ཆར་ཟིམ་དལ་མོ་ཞིག།

ལུས་ཀྱི་སྒྱུ་མའི་སྟངས་སྟབས་མྱུར་མོ་འདི།།

མ་ཡུམ་ཞིག་ལ་འཕངས་བའི་དན་རྟགས་སོ།།

བོད་ཀྱི་གཅེས་ཕྲུག་ཨ་ཁུའི་ཉི་མ་ཚང་།།

རིག་པའི་གནད་ལ་ཀ་ཁའི་རི་མོ་ཡོད།།

རི་མོ་དགུ་སྒྲིལ་བོད་ཀྱི་ཁྱད་ཆོས་དང་།།

དེ་རུ་བྱང་དགོས་ཨ་ཁུའི་གཅེས་ཕྲུག་ལགས།།

འཇིག་རྟེན་ཡངས་པོར་མིག་གིས་མ་ཚུད་ཀྱང་།།

མཐོ་དབུས་ཁམས་འདི་སེམས་སུ་ཤེས་པར་གྱིས།།

ཡུལ་གྱི་ལྟད་མོ་སྒོ་ཁར་བསླེབས་པའི་དུས།།

གཞན་དེད་ཆེན་མོའི་གསར་བརྗེར་མ་འགྱུར་བ།།

ཆུ་བཞི་སྒང་དྲུག་རིགས་སུ་ཤེས་པར་གྱིས།།

2018ལོའ་ཟླ་6ཚེས་1 ཉིན།