སྙན་ངག་ཚན་པ་འགའ་ཞིག

[ རོལ་སྐུད ] དངོས་མིང་འོད་གསལ་སྙིང་པོར་འབོད་ཅིང་།མིང་གཞན་ལ་འཆིང་ཞགས་ཞེས་ཀྱང་འབོད།ཉིས་སྟོང་གཅིག་ལོར་རྡོ་ཁོག་རི་ཐང་ཕྱུག་མོའི་འབྲོག་ཐང་ཞིག་ཏུ་སྐྱེས། 2014ལོའི་ལོ་སྨད་ཙམ་ལ་རྩོམ་རིག་འབྲི་བའི་ལམ་ལ་ཞུགས་ཏེ་ད་ལྟའི་བར་ལོ་ངོ་ལྔའི་རིང་སྙན་ངག་ཐར་ཐོར་རེ་བྲིས་ཤིང་། ཀྲུང་གོ་བོད་ཀྱི་དྲྭ་བ། བཙན་པོ་མགར་གྱི་དྲྭ་བ།མཐོང་གྲོལ་དྲྭ་བ།ཚྭ་འདམ་དྲྭ་བ།མཚོ་སྔོན་པོ་དྲྭ་བ་སོགས་དྲྭ་ཚིགས་འགའ་རེ་དང་། གཞན་ཡང་།རྔ་བའི་ཚགས་པར།ཁམས་པའི་ཚགས་པར།གཞི་ཀ་རྩེའི་ཚགས་པར་སོགས་སུ་བཀོད་མྱོང་། ད་ལྟ་གསེར་ཐང་བླ་རུང་ལྔ་རིག་ནང་བསྟན་སློབ་གྲྭར་སློབ་སྦྱོང་བྱེད་མུས་སུ་མཆིས།སྙན་ངག་ནི་རང་གི་ཤེས་རབ་ཀྱི་གཤོག་རྩལ་མཐོ་རུ་འདེགས་པའི་ལམ་གྲོགས་ཤིག་གམ། ཡང་ན། སྙན་ངག་ནི་རང་གི་དཀའ་སྡུག་བརྗོད་ཆོག་སའི་སྙིང་ཉེ་བའི་ཨ་མ་ཞིག་ཡིན་པར་སྙམ།

མགུར།

རིག་པ་གཞི་ཡི་དཀྱིལ་འཁོར་ཏེ།།

གསལ་སྒྲིབ་བྲལ་བའི་ཆུ་ཤེལ་འདྲ།།

རྣམ་རྟོག་དུག་གི་སྡོང་བོ་ལ།།

རིང་དུ་གྱེས་བའི་བྱ་བཏང་པ།།

ངེས་མེད་བྲག་སྐྱིབས་རི་ཁྲོད་ན།།

ཉམས་ལེན་མགུར་ཆུང་ལྷོད་དཀྲོལ་ཏེ།།

ཨ་འཐས་ཞེན་པའི་དུག་ལྔའི་གར།།

རྫུན་པར་ཤེས་ཏེ་སྒྱུ་མའི་གྲོང་།།

མི་གཙང་འདམ་རྫབ་མཐོང་ངམ་ཅི།།

དག་པ་གཞི་ཡི་ཡེ་ཤེས་ལ།།

འཕོ་ལྟུང་མི་མངའ་འོད་ཀྱི་གུར།།

རང་སེམས་མེ་ལོང་ཡེ་ཤེས་ངོར།།

ཆུ་ལ་ཆུ་ཐིམ་ཚུལ་གྱིས་ནི།།

ཞི་ཁྲོའི་ལྷ་ཞལ་མངོན་འཆར་ན།།

སངས་རྒྱས་ས་ལ་རེག་གམ་ཅི།

བག་ཆགས་ལྟ་བུའི་མགུར།

སེམས་ཉོན་མོངས་ནད་ཀྱིས་གཟིར་བ་ཡིས།།

ལུས་སྒྱུ་མའི་ཚིགས་དྲུག་འདར་ལྷབ་ལྷབ།།

ཆོས་གདམས་པའི་ཆར་ཆུས་སྐོམ་མ་སེལ།།

དགྲ་རྣམ་རྟོག་འདྲེ་མོས་གར་ལ་ཞེན།།

རྒྱུད་མི་དུལ་གླང་ཆེན་ཆང་གིས་མྱོས།།

ཕྱི་འབྱུང་བཞིའི་རྒུད་པའི་སྔོ་རུད་རུད།།

ནང་སྲེད་པའི་བྲེད་ཤ་ཕེ་དིར་དིར།།

ཡིད་དམ་ཚིག་མེ་ལོང་ནག་སང་ངེར།།

ཕ་དམ་པའི་ཞལ་གདམས་གསལ་མ་ནུས།།

ལས་དུག་ལྔའི་ལམ་ལ་བརྩོན་པ་ཡིས།།

ལམ་མཐར་ཐུག་བགྲོད་པའི་སྒོ་གླེགས་བཀག།

ཚེ་རླུང་ནང་མར་མེ་ནུབ་པ་ཡིས།།

སྡང་འཆི་བདག་འཇིགས་རྔམས་ཤིག་གེར་ཐོན།།

བློའི་འཇིག་རྟེན་ཡངས་མོ་སྟོང་ལྷང་ལྷང་།།

ལྷོ་ཛམ་བུའི་ཞིང་ནས་ཚེ་འཕོས་སོ།།

རླུང་དང་སྤྲིན་པ་ལ་བསྐུར་བའི་འཕྲིན།

ཡིད་ཀྱི་ཁུད་དུ་གཟུགས་མེད་ཀྱི།།

སྣང་བའི་ཆོ་འཕྲུལ་ཅི་མཐོང་བ།།

བདག་ལ་ཤིན་ཏུ་མཛེས་པ་སྟེ།།

ཞེན་པའི་འཆིང་ཞགས་ཁྱེད་སར་ཕྱོགས།།

ཨུཏྤལ་སྔོན་པོའི་མདངས་ཆགས་ཤིང་།།

ག་བུར་དྲི་ངད་ལྡང་བ་མོ།།

སོ་སྐྱེས་གསང་བའི་སྙིང་སྒྲོམ་དུ།།

ཟླ་བ་ལྟར་ལྟའི་འོད་ཀྱིས་འཛུམ།།

བས་མཐའི་གྲོང་དུ་སྡོད་གྱུར་ཡང་།།

བརྩེ་ཞེན་ངག་གི་མེ་ཏོག་ཆར།།

རླུང་དང་མཁའ་རུ་རྒྱུ་བ་ཡི།།

སྤྲིན་པའི་ཚོགས་ལ་བསྐུར་བར་བྱ།།

ཀ་ཡེ་ཡིད་འདྲེས་གཞོན་ནུ་མ།།

སེམས་ལ་པདྨའི་རྡུལ་འཛིན་ཅིང་།།

ང་ཡིས་བསྐུར་བའི་འཕྲིན་པ་ཀུན།།

སྙན་པའི་སྐད་ཀྱིས་བཀླགས་སམ་ཅི།།

དྲི་ངད་འཕུར་བའི་མེ་ཏོག་ལ།།

བུང་བའི་བློ་ནི་ཆགས་པ་བཞིན།།

ཡོན་པོའི་མིག་གི་ཟུར་མདའ་ཡིས།།

སྐྱེ་དགུའི་མི་རྣམས་བཀུག་པར་བྱས།།

218*10*30

བརྩེ་ལྡན་སེམས་ཀྱི་ཁྱེའུ།

རོལ་སྐུད།

ཀོ་ཀོའི་གདང་ལས་སྙན་པའི་ངག།

རྣ་བའི་བུ་གར་འཛུལ་བ་ཡིས།།

རླུང་གིས་འཁོར་བསྐྱོད་ཤིང་རྟ་ཡང་།།

དལ་བའི་འགྲོས་ཀྱི་རྒྱུ་བར་བྱས།།

སྨུག་པ་ཁུར་བའི་རི་ཁྲོད་དེར།།

དཀའ་ཐུབ་སྤྱོད་པའི་ནགས་སྲུང་པའི།།

ཏིང་ཤག་ལྟ་བུའི་མགུར་ཆུང་གིས།།

རྣམ་རྟོག་རྟ་ཕོ་རྨས་པར་བྱས།།

བརྩེ་ལྡན་སེམས་ཀྱི་ཁྱེའུ་ཡིས།།

མཛའ་བ་རིང་ནས་མ་བཏང་བས།།

སྐྱེ་བའི་སྐྱེ་བར་དྲི་མེད་ཀྱི།།

ངག་རིག་གང་གཱ་འཛད་མེད་གྱུརད།།

བདག་ཡིད་ཆགས་པའི་དགའ་སྟོན་དེ།།

མཛེས་པའི་གཟུགས་དང་སྙན་པའི་སྒྲ།།

སིམ་པའི་དྲི་དང་མངར་བའི་རོ།།

འཇམ་པའི་རེག་བྱའི་དཔལ་དང་འགྲོགས།།

བརྩེ་བའི་པད་མ་འཁྲུངས་པའི་ཚལ།།

སྦྲང་ཆུང་བརྟུལ་ཞུགས་ལུས་སྐྱེས་ན།།

མེ་ཏོག་རལ་བའི་ཡལ་ཀ་ལྟའི།།

ཞི་འཇམ་ཆར་གྱི་རྒྱུན་ཐག་སྩོལད།།

2018:9:19

དབེན་པའི་བས་མཐའ།

སྟོན་ཀའི་རླུང་བུ་ལྡང་བ་ཡིས།།

མེ་ཏོག་འདབ་མ་རིང་རུ་འཕུར།།

མགྲིན་པ་དབྱངས་ཀྱི་ཟིལ་བ་ཡིས།།

བླན་པའི་བུང་བ་གང་སར་ཕྱོགས།།

ཡལ་གའི་གྲེ་འགྱུར་ངག་གི་དཔལ།།

ཁུ་བྱུག་དག་ཀྱང་རྒྱང་དུ་གྱེས།།

རང་བྱུང་དངུལ་དཀར་མེ་ལོང་ལ།།

འཕོ་འགྱུར་ཆོ་འཕྲུལ་ཅིར་ཡང་མཐོང་།།

སེམས་ཀྱི་པདྨའི་ཟེའུ་འབྲུ་ལ།།

འོ་སྤྲིས་ཆགས་པའི་དགའ་མ་མོ།།

བས་མཐའི་ས་རུ་གནས་བཅས་པ།།

མེ་ཏོག་རལ་བའི་ས་ལས་ཅི།།

2018.8