ཤེལ་དཀར་པོའི་བཅད་རྩོམ་ཚན་པ་ལྔ་།

U%VZPBS}_V~@$S1655NR1AN.png

ཤེལ་དཀར་པོ། དངོས་མིང་ལ་རྒྱལ་མཚན་འབོད། དར་རྩེ་མདོ་ནང་སྐོར་སྡེ་བའི་འབྲོག་ཁྱིམ་ཞིག་ཏུ་སྐྱེས། དམའ་འབྲིང་གསུམ་པ་ནས་སྙན་ངག་ཐར་ཐོར་རེ་འབྲི་འགོ་བརྩམ། ད་ལྟའི་བར་དུ་སྙན་ངག་ཁག་བོད་ཁུལ་གྱི་དུས་དེབ་༼གངས་དཀར་རི་བོ༽༼ མགར་སྟོང་བཙན༽ ༼ ཁམས་པའི་ཚགས་པར༽ སོགས་དུས་དེབ་འགའ་དང་འཕྲིན་སྟེགས་གང་མང་གི་ཐོག་ཏུ་སྙན་ངག་བཀོད་མྱོང་། སྙན་ངག་ནི་ཁོ་བོའི་དགའ་སྡུག་གི་ཚོར་བ་མཐའ་དག་བརྗོད་སའི་དགའ་མ་ཞིག་ཏུ་འཛིན།

ང་དང་འདྲ་བའི་ཆོས་པ་ཨེ་ཡོད།

ཤེལ་དཀར་པོ།

སྤྱོད་པ་བྱང་ཆུབ་ཀྱི་ཚུལ་དུ་འཛིན་ཡོད།།

སེམས་པས་ཚུལ་འཆོས་ཀྱི་འདྲ་འབག་གྱོན་ཡོད།།

ལུས་སེམས་གནམ་ས་ཡི་བར་ཐག་ཆོད་པའི།།

ཆོས་པའི་ཐལ་མོ་དེ་སྙིང་ཁར་སྦྱར་ཡོད།།

མ་ཎི་ཡིག་དྲུག་དེ་ངག་ནས་དཀྲོལ་ཡོད།།

ལག་པའི་འཁོར་ལོ་དེ་ཉམས་ཀྱིས་བསྐོར་ཡོད།།

ཡིད་སེམས་རྒྱ་ལྕང་གི་ལོ་མ་སེར་པོ།།

འཇིག་རྟེན་ཆོས་བརྒྱད་ཀྱི་རླུང་ལ་སྤུར་ཡོད།།

ཐུན་བཞིའི་རྣམ་འབྱོར་དེ་འཁྲུལ་བས་སྐྱོང་ཡོད།།

འབུམ་ལྔའི་གྲངས་ཀ་དེ་གཡེང་བས་གསོག་ཡོད།།

ཡུན་རིང་དཀྱིལ་ཀྲུང་དེས་པུས་མོར་རྡེག་དུས།།

ངལ་བ་ལྕི་མོ་ཞིག་སེམས་སུ་དཔྱངས་ཡོད།།

སྙིགས་མ་ལྔ་བདོ་ཡི་དུས་དམན་ཚེས་ཡོད།།

རྣམ་རྟོག་སེམས་བྱུང་གི་འདུ་འཛི་འཕེལ་ཡོད།།

དགའ་སྡིག་འགག་འཕྲེང་གི་བཤུལ་མལ་ནང་ནས།།

སྙིང་རྗེའི་མིག་ཟུང་དེ་ཀེམ་ཀེམ་འགུལ་ཡོད།།

དབེན་པའི་བྲག་རི་ཡི་སྐེད་པར་ལུས་ཡོད།།

དུག་གསུམ་རྒྱུ་བ་དེ་ཡོལ་བས་སྒྲིབ་ཡོད།།

རྒྱུ་དང་འབྲས་བུ་ཡིས་རང་གཟུགས་སྟོན་དུས།།

མིག་ཆུ་འཛར་བ་ཡི་ཆོས་པ་ཨེ་ཡོད།།

༢༠༡༨ / ༡ / ༡༦ ལ་བྲག་མཁར་ནས།

སྟོང་བ་རེད།

ཤེལ་དཀར་པོ།

འཇིག་རྟེན་མི་ནི་ཚེ་ཡི་གཡོག་པོ་རེད།།

ཚེ་འདི་མ་དག་ལས་ཀྱི་བརྡ་ཞིག་རེད།།

བརྡ་དེ་ཚོར་བས་མ་ཟིན་མ་རིག་པས།།

སེམས་པ་ངན་ལང་ཤོར་བའི་རླུང་བུ་རེད།།

རླུང་དེ་སྡིག་པ་སྤུར་བའི་བྱེ་རྡུལ་རེད།།

རྡུལ་འདི་དྲག་ཏུ་ལྡང་བའི་ཉིན་ཞག་རེད།།

མི་ཡི་ཚེ་འདི་ལོ་དང་ཟླ་བ་རེད།།

ལོ་དང་ཟླ་བ་ཉིན་མཚན་རེས་མོ་རེད།།

ཉིན་གྱི་སྣང་བ་མཚན་གྱི་རྨི་ལམ་རེད།།

རྨི་ལམ་དཀར་ནག་དོན་ལ་སྟོང་བ་རེད།།

༢༠༡༧/༣/༡༨

ཁེར་རྐྱང་གི་དོ་ནུབ

ཤེལ་དཀར་པོ།

ས་སྲོས་གྲིབ་མ་བསྲིངས་བའི་བར་གླགས་ནས།།

མཚམས་སྤྲིན་མེ་ལ་ཤོར་བའི་སྔངས་པ་དེ།།

དུས་ཡུན་རིང་བོར་ཞིག་ལ་མ་འཇགས་པའི།།

སྣང་བ་བ་ཟ་ཟི་ཞིག་གིས་དམ་དུ་འཁྱུད།།

སྡོད་ཤག་དཀྱིལ་གྱི་གློག་ཏོག་རབ་རིབ་ཀྱི།།

དྲོད་དང་འོད་ལ་ལྷག་ཏུ་རྔམ་པ་ཡི།།

སྲིན་བུ་མེ་ཁྱེར་འཕུར་བའི་གཤོག་སྒྲ་དེ།།

ཁོ་བོའི་རྣ་བར་ལྷུང་བ་གསལ་ལམ་མེར།།

རྒྱུ་སྐར་གྲང་འདར་འཕེལ་བའི་དོ་ནུབ་ལ།།

སུ་ལ་སྒུག་པའི་སྣང་བ་བན་བུན་ཞིག།

སེམས་ཀྱི་དཀྱིལ་ལ་ངང་གིས་ལྷུང་ནས་ནི།།

ངལ་བ་ལྕི་མོ་ཞིག་གིས་ཁུར་དུ་བསྣན།།

དོ་ནུབ་གང་ལ་འདྲ་མེད་མཚན་མོ་ཞིག།

ལོ་དང་ཟླ་ལ་སྤྲུལ་བའི་ནུབ་མོ་ཞིག།

ལྷིང་འཇགས་སེམས་ལ་ལྷུང་བའི་ནམ་གུང་ཞིག།

ཁེར་རྐྱང་འདར་སིག་འཕེལ་བའི་མུན་ནག་ཞིག།

སྣང་བའི་གཡུལ་འགྱེད།

ཤེལ་དཀར་པོ།

ཉི་མའི་འོད་དཀར་མུན་པས་ཟོས་ནས།།

མཁའ་མཐའི་མཚམས་སྤྲིན་ཁྲག་གིས་བརྫད་ལ།།

སྐར་མ་སྨག་གིས་བཙོན་དུ་བཅུག་པས།།

ཁོ་བོའི་ཡིད་ལ་ཞེད་སྣང་འཁོར་བྱུང་།།

སྒོ་ཁྱི་གཅོང་སྐད་སེམས་སུ་ཟུག་པས།།

ངལ་དུབ་སྣང་བ་ཡེ་ནས་སྟོངས་ལ།།

བསམ་གཞིག་སྒྱེ་བོ་ཀླད་དུ་བསྐོར་ཡང་།།

གྲང་མོའི་རྨི་ལམ་རླུང་གིས་ཁུར་སོང་།།

ཆར་ཞོད་དྲག་པོ་མུ་རུ་འབྱོ་ལ།།

རླུང་བུ་ངུར་ལ་ནམ་མཁའ་ངུ་འདྲའི།།

ཚག་ཚག་སྒྲ་ཡིས་སྒེའུ་ཁུང་རྡེག་དུས།།

ཚོར་བས་བྲང་ལ་རྡོག་ཐོའང་གཏོང་བྱུང་།།

སྐར་མའི་འོད་ལ་རེ་འདུན་འཆོར་ཡང་།།

རེ་བའི་སྣང་བ་མུན་པས་འཇོམས་སོང་།།

ཉིན་མོའི་སྣང་བར་སྐྱབས་སུ་བཅོལ་ཡང་།།

མཚན་ལམ་རིང་མོ་ལོ་ཟླའི་ཡན་རེད།།

༢༠༡༨/༥/༩དགོང་མོར།

ཟླ་བ་བཞི་ཡི་དྲན་པ་དཀར་པོ།

ཤེལ་དཀར་པོ།

ལི་ཆུའི་འགྲམ་ནས་སྙན་པོའི་གླུ་ཞིག་བླངས།།

ཡངས་མོའི་སྤང་ནས་ལྡེམ་མྱུར་བྲོ་ཞིག་བཀྲབ།།

ཚོར་བའི་གསེབ་ན་ཚོར་བ་མངར་མོ་མ།།

ཟླ་བ་བཞི་ལ་བྲིས་པའི་སྙན་ངག་ཡིན།།

སེམས་པ་ཕྱི་ནང་མེད་པར་འཛུམ་གྱིས་བགད།།

དགོད་སྒྲར་བསླུ་བྲིད་བྲལ་བས་སེམས་ལ་འཛུལ།།

སེམས་དང་བསམ་པ་འདྲེས་བའི་ཟླ་བ་བཞི།།

དམར་ཆུང་སྙིང་ལ་བརྐོས་བའི་དྲན་ཤིང་ཡིན།།

དྲན་པའི་ངོགས་ན་དྲན་པ་དཀར་པོ་ཞིག།

སྣང་བའི་ཁམས་ན་སྣང་བ་བསོར་མོ་ཞིག།

སེམས་ཀྱི་མཐིལ་ལ་ལྷུང་བའི་དྲོད་ཁོལ་འདི།།

ཟླ་བ་བཞི་ལ་བཙལ་བའི་ཚོར་བ་ཡིན།།