སྙན་ངག་གསེར་གྱི་སྒྲོན་མེ།

སྒ་ལུང་བློ་བཟང་བསྟན་འཛིན་གྱིས།

རྣམ་དཔྱོད་རིག་པའི་རྩལ་གྱིས་བརྟག་པའི་འཛམ་གླིང་གོ་ལའི་རྩེ་མོ་ན།།

ཤེས་ལྡན་སྟོང་གི་སེམས་པ་བཀུག་པའི་བོད་ཀྱི་སྙན་ངག་བདུད་རྩི་འདིས།།

གངས་ཅན་བོད་པའི་སྐད་དང་ཡི་གེ་གཉིས་ཀྱི་རྩ་བའི་རྨང་གཞི་ཡིན།།

འདི་ལ་སྦྱོང་ནས་འདི་ཉིད་འབྲི་བ་རྩོམ་པ་པོ་ཡི་རྒྱན་ཆ་ཡིན།།

ངུར་སྨྲིག་ན་བཟའ་སྤྲིན་གྱི་གསེབ་ནས་ཉི་ཟླ་གཉིས་ལ་ལྟད་མོ་བསྟན།།

སྙན་ངག་ལེགས་བཤད་གསེར་གྱི་སྦྲང་ཆར་མི་སེམས་ཁྲ་ཁྲའི་ཡིད་དབང་འཕྲོག།

གྲེ་འགྱུར་སྣ་ཚོགས་མཉམ་དུ་འཛོམས་ཏེ་དགའ་བ་སྟོང་གིས་འཛུམ་དཀར་བཞད།།

འདི་ཡང་དུས་རབས་ཁྲོད་ལས་བྱུང་བའི་སྙན་ངག་བུ་མོའི་ལེགས་སྐྱེས་རེད།།

རི་ལུང་ཐམས་ཅད་མེ་ཏོག་བཀང་བའི་དབྱར་ཟླའི་ནང་གི་ཆུ་ཕྲན་ང་།།

རྫ་མགོ་མཐོ་པོའི་སྒང་ནས་མ་བཞུར་རྩྭ་ཐང་སྔོ་མོའི་འདབས་ནས་ཡོང་།།

རྩི་ཤིང་མེ་ཏོག་ཕྲེང་སྒྲིག་བྱེད་དེ་བསུ་མ་སྟོང་གིས་འཛུམ་དཀར་བཞད།།

གཡོ་སྒྱུའི་འཁྲབ་སྟོན་རྩ་ནས་དོར་ཏེ་ཚེ་སྲོག་འབྲེལ་བའི་ལམ་ནས་གུས།།

ཉན་འདོད་རྣ་བའི་དབྱངས་རྟའི་ཁྲོད་ལས་མི་རིགས་བདེ་སྡུག་ཕྲག་ཏུ་ཁུར།།

གསུང་གཏམ་གླེང་བའི་གཏམ་རྒྱུད་ཀློང་ནས་མེས་པོ་གོང་བའི་རྔུལ་ཆུ་བརྗོད།།

ཕྱིར་དྲན་ནང་གི་རྗེས་དྲན་འདབས་ནས་ལོ་རྒྱུས་གསོན་པོ་སེམས་གཏིང་ཟུག།

བརྗེད་མེད་དོན་རྐྱེན་བྱུང་བ་དེ་དག་སྙན་པའི་དབྱངས་དང་འགྲོགས་ཏེ་གྱེར།།

རྨི་ལམ་གྱི་ཕ་ས།

སྒ་ལུང་བློ་བཟང་བསྟན་འཛིན་གྱིས།

མཁས་པའི་བྱ་བ་འཆད་རྩོད་རྩོ་གསུམ་ལ།།

མོས་པ་ཙམ་གྱིས་གོ་འཕངས་ཐོབ་མི་འགྱུར།།

བརྩོན་འགྲུས་ལྕགས་ཀྱི་རྟ་ཕོ་ཞོན་བྱེད་ནས།།

དབྱར་དགུན་ཆར་ཆུ་ལ་སོགས་བརྒལ་བར་འབད།།

འོན་ཀྱང་བསམ་བློ་མི་གཅིག་འཚོ་བའི་ཁྲོད།།

ལ་ལ་སྙན་ངག་ཕྱོགས་སུ་གོམ་པ་སྤོ།།

ལ་ལ་གཞུང་ཆེན་པོད་ལ་ཐོས་བརྩོན་བསླབ།།

གང་ལྟར་རང་རང་དགའ་ཕྱོགས་བརྩོན་པར་བྱ།།

ལང་ཚོའི་དཔལ་ཡོན་རིག་པའི་ལམ་དུ་རྒྱས།།

མེ་ཆུའི་འཐབ་རྩོད་ཞི་བདེར་མགོ་བོ་སྒུར།།

འདྲ་མཉམ་དུས་རབས་རྣམ་དཔྱོད་ཚལ་དུ་བཞད།།

འདི་ལྟར་རྫོགས་ལྡན་གསར་བའི་ཡན་ལག་རྒྱས།།

སྒྱུ་རྩལ་རྨི་ལམ་ལྟ་བུའི་ཞིང་ཁམས་ནས།།

ཚན་རིག་ཉི་མ་བཞིན་དུ་འཆར་བའི་དུས།།

རང་གི་ཕུགས་བསམ་ཆེད་དུ་འབད་པ་འདི།།

སུ་ཞིག་མ་དགའ་སོང་ཡང་བཀོད་པ་མེད།།

ལས་ལམ་མི་གཅིག་རི་རྩེ་རི་འོག་རེད།།

བར་ཐག་མི་གཅིག་ལེར་བ་སྟོང་གི་མཚམས།།

བསམ་བློ་མི་གཅིག་གསར་རྙིང་གཉིས་ཀྱིས་དབྱེ།།

ཁ་ཕྱོགས་མི་གཅིག་གནའ་དེང་ཁྱད་པ་ཡོད།།

རྟེན་འབྲེལ་ཚབ་མཚོན།

སྒ་ལུང་བློ་བཟང་བསྟན་འཛིན་གྱིས།

སྤྲིན་པའི་ལང་ཚོའི་ཡན་ལག་རབ་རྒྱས་ཤིང་།།

རྣམ་དཔྱོད་འཇིག་རྟེན་འགྲིམ་པའི་སློབ་བུ་ངས།།

དྲི་བྲལ་ལྷག་བསམ་མ་ལུས་སེམས་ཀྱི་ངོགས།།

འཆར་བའི་དགེ་རྒན་ངག་དབང་སྐུ་དྲིན་ཞུ།།

རིག་པའི་ཁྱིམ་དུ་ནོར་བུ་སྩོལ་མཁན་པའི།།

གངས་ལྗོངས་ཤེས་རིག་དར་རྒྱས་སློབ་གླིང་འདི།།

མིང་དོན་སྙན་གྲགས་ལྡིར་ཞིང་སྐྱ་རེངས་ཁྲོད།།

འཇམ་པའི་ཉི་ཟེར་བསུ་བཞིན་ཡང་དར་ཤོག།

ལོ་མང་ངུ་བགད་མཉམ་དུ་འཚོ་བའི་མི།།

ཁང་ཆུང་གྲུ་བཞིའི་ནང་གི་སློབ་གྲོགས་ཏེ།།

དགེ་བའི་འབྲས་དང་རིག་པའི་བང་རྩལ་དང་།།

སངས་རྒྱས་ས་རུ་སྣེ་ཁྲིད་ཆོས་ཀྱི་གྲོགས།།

གཞུང་ལུགས་སློབ་པར་ངེས་པར་མཁོ་བའི་མཆོག།

གྲོགས་པོ་ནང་གི་གྲོགས་པོ་རྩེ་མོ་སྟེ།།

གསོན་པོ་ཁྲོད་ཀྱི་གསོན་པོ་དངོས་མ་ཞེས།།

བདག་གི་མགྲིན་པའི་ལམ་ནས་བཙན་གྱིས་ཐལ།།

རྟེན་འབྲེལ་ཀུན་འདུས་བཀྲ་ཤིས་དགེ་མཚན་དཔལ།།

ཕུན་ཚོགས་འཁོར་ལོ་བརྩེགས་བརྒྱད་བར་མེད་འཁོར།།

དུས་བཟང་སློབ་གྲོགས་མཐར་ཕྱིན་དགའ་བསུ་རུ།།

ལེགས་སྐྱེས་ཚབ་མཚོན་གླུ་ཞིག་ལེན་འདོད་སོང་།།

གླུ་སྣེ་ཆུ་འབྲེལ་ཆུ་བོ་འཛད་མེད་བཞིན།།

ཁྱེད་རྣམས་སྐུ་ཚེ་བརྟན་ཞིང་མཛད་འཕྲིན་རིང་།།

གླུ་དོན་ཆོས་འབྲེལ་ཆོས་གཞུང་རྫོགས་སངས་རྒྱས།།

ཁྱེད་རྣམས་འགྱུར་མེད་ལམ་ཁར་འཚོལ་རྙེད་ཤོག།

གཟུར་གནས་དབྱར་གྱི་རྔ་གསུང་དལ་གྱིས་ལྡིར།།

ལྷག་བསམ་སྤྲིན་དཀར་དབྱིངས་ལས་ལྷོད་ཀྱིས་རྒྱུ།།

གཞན་ཕན་དངོས་གྲུབ་སྦྲང་ཆར་ཟིམ་ཟིམ་བབས།།

རིག་གསར་མྱུ་གུའི་མཛད་འཕྲིན་མྱུར་རྒྱས་ཤོག།

དྲན་པ་སྟོང་ཕྲག་ཚེ་ཡི་མི་རྟག་ཏུ།།

དུང་སེམས་རི་མོ་འཚོ་བའི་ཀློང་ལ་འཚེར།།

རྨི་ལམ་ནང་གི་རྨིས་གྲོགས་མཚོ་བྱུང་མ།།

ཇི་བཞིན་འདོར་མེད་སློབ་གྲོགས་སེམས་ལ་འཛུལ།།

མཁྱེན་པའི་རླབས་རིས་འཆད་རྩོད་རིག་པའི་གཞུང་།།

རྩོམ་གྱི་མཁའ་དབྱིངས་བསྐྱོད་དེ་གཤོག་ཟུང་བརྐྱངས།།

འཕུར་རྩལ་མ་ལུས་ཕན་བདེའི་འགྲོ་བའི་དོན།།

གཟན་སྣེ་དམར་པོ་མ་ཡལ་གཡོ་ཤོག་ཨང་།།

སྡོམ་ཁྲིམས་མིག་འབྲས་བཞིན་དུ་སྲུང་བ་ལ།།

ཉིན་མཚན་དུས་དྲུག་བརྩོན་པའི་ཆོས་ཀྱི་གྲོགས།།

དགེ་འབྲས་གཡུར་དུ་ཟ་བའི་བྱ་ལམ་ནས།།

མ་འོངས་འཕུར་བཞིན་འཛོམ་པའི་སྨོན་ལམ་ཞུ།།

ཕ་ཡུལ་ཤེས་ལྡན་མི་ཡིས་བྱིན་རླབས་འཐིམ།།

རི་ལུང་སྙན་ངག་ལུགས་ཀྱིས་འཁྱུད་ནས་བརྒྱན།།

དབེན་གནས་དགོན་ཆེན་འཆད་རྩོད་གཞུང་གིས་སྐོར།།

ཁྱེད་རྣམས་མཛད་འཕྲིན་ཕྱོགས་མཐར་རྒྱས་གྱུར་ཅིག།

དབྱུ་གུ་ཟླ་བའི་དཀར་ཕྱོགས་ཀྱི་སྟོང་བ་གཉིས་པ་ཉིན་གྱི་ནམ་གུང་དུ་ཟིལ་དགོན་གྲྭ་མཐའ་བ་སྒ་ལུང་བློ་བཟང་བསྟན་འཛིན་ཞེས་འབོད་པའི་ཕྲན་ཆུང་དེས་བྱང་ཉི་མ་བླ་བྲང་ནས་མཐར་ཕྱིན་སློབ་གྲོགས་རྣམས་ལ་སྦྱར་བར་དགེའོ།།