ཤེལ་དཀར་པོའི་སྙན་ངག་འགའ།

E1EW8WUAP31OI@W_Y_}DFJG.png

ཤེལ་དཀར་པོ། དངོས་མིང་ལ་རྒྱལ་མཚན་འབོད། དར་རྩེ་མདོ་ནང་སྐོར་སྡེ་བའི་འབྲོག་ཁྱིམ་ཞིག་ཏུ་སྐྱེས། དམའ་འབྲིང་གསུམ་པ་ནས་སྙན་ངག་ཐར་ཐོར་རེ་འབྲི་འགོ་བརྩམ། ད་ལྟའི་བར་དུ་སྙན་ངག་ཁག་བོད་ཁུལ་གྱི་དུས་དེབ་༼གངས་དཀར་རི་བོ༽༼ མགར་སྟོང་བཙན༽ ༼ ཁམས་པའི་ཚགས་པར༽ སོགས་དུས་དེབ་འགའ་དང་འཕྲིན་སྟེགས་གང་མང་གི་ཐོག་ཏུ་སྙན་ངག་བཀོད་མྱོང་། སྙན་ངག་ནི་ཁོ་བོའི་དགའ་སྡུག་གི་ཚོར་བ་མཐའ་དག་བརྗོད་སའི་དགའ་མ་ཞིག་ཏུ་འཛིན།

གྲང་འདར་རྒྱག་པའི་ནམ་གུང་།

གཟུགས་མེད་རླུང་བུ་ཡི་ལྡིང་སྐོར་ཁྲག་ཁྲིག་བར་ན།།

འདབ་དྲུག་དངུལ་དཀར་གྱི་ཁ་བ་མགོ་ཡོམ་འཁོར་དུས།།

སྐྱེ་དངོས་རྒུད་པ་ཡི་རང་མདངས་སྐྱ་བོར་ཆགས་བཞིན།།

སེམས་ཀྱི་ཉི་མ་ལ་གྲང་རང་རྣོན་པོས་འཚེས་འོང་།།

མདུན་གྱི་རི་བོ་ལ་སྨུག་པའི་སྒྲིབ་ཡོལ་དཔྱངས་ནས།།

ཆ་མེད་ལྷགས་པ་ཡིས་གློ་བུར་ལུས་ལ་རྡེག་དུས།།

ཨ་མའི་བྱམས་བརྩེ་དང་མཉམ་པའི་དབྱར་ཁ་དྲན་བྱུང་།།

དྲན་པའི་མིག་ཆུ་དེ་སྐྱོ་བའི་དར་ལ་འབྱར་སོང་།།

ཨོང་བའི་མེ་རླབས་ལས་མཆེད་པའི་དྲོད་ཀྱི་ལག་པས།།

ལུས་ཀྱི་ཕྱི་ནང་ལ་བྱམས་བརྩེས་བྱོལ་བྱོལ་བྱས་ཀྱང་།།

སྒེའུ་ཁུང་ཕ་རོལ་གྱི་མཁའ་རུ་རྩེན་པའི་ཁ་བ།།

སེམས་ཀྱི་སྣང་བ་ལ་འཁོར་བས་ད་དུང་གྲང་བྱུང་།།

སྒོ་ཁྱིའི་གཅོང་སྐད་ཀྱི་བྲག་ཆ་དབྱིངས་ལ་འཐོར་ཞིང་།།

ཁང་བྱེའུ་ཀྱུར་ཀྱུར་གྱི་སྨྲེ་སྔགས་རླུང་གིས་ཁུར་ཏེ།།

སེམས་ཀྱི་ཟབ་ས་ཡི་རྣ་བའི་གཡང་དུ་ལྷུང་བས།།

དགུང་ཁའི་རྒྱུ་སྐར་ཡང་གྲང་བའི་འདར་འདར་རྒྱག་བྱུང་།།

རླུང་བུ་ངུ་དབྱངས་དང་ལྷན་དུ་འདུར་རྒྱུག་འཕེལ་ལ།།

ཁ་བ་ཚག་ཚག་གིས་སྒེའུ་ཁུང་ཤེལ་ལ་རྡུང་དུས།།

མལ་ཁང་གྲུ་བཞི་ལ་འཁྱགས་རླུང་བར་མེད་འཁོར་བས།།

མཚན་ལམ་རིང་མོ་དེ་དངན་པས་ཀློང་ནས་བསྐྱལ་བྱུང་།།

༢༠༡༨ / ༢ / ༢ ནམ་གུང་ལ།

གྱེས་ཁའི་སྨོན་ལམ།

བདེ་མིན་སྡུག་བསྔལ་འཁོར་བའི་གཏིང་མཐའ་ལས་འཕགས་པའི།།

དབེན་པའི་རྫ་རིའི་སྐེད་པའི་ལྷིང་འཇགས་དང་འགྲོགས་ཏེ།།

ཐུན་བཞིའི་རྣམ་འབྱོར་སྐྱོང་བའི་མཆེད་གྲོགས་ཀྱི་དབུས་ནས།།

ཟླ་གསུམ་ཉུལ་བ་དེ་ཡང་བསོད་ནམས་རང་རྨད་དོ།།

གནས་མཆོག་དགའ་བ་བརྒྱད་ལྡན་འོག་མིན་གྱི་ཞིང་དུ།།

འདུག་པའི་སྐལ་བ་དེ་ཡང་ངང་ཐུང་དུ་མཆིས་པས།།

གྱེས་བའི་སྐལ་བ་ཞིག་ལ་མིག་ཆུ་ཡིས་འཇུས་སོང་།།

འདི་ཡང་ཚོགས་གཉིས་ཕྲ་བོ་རྫོགས་པ་དེ་ལོས་ཡིན།།

ཆོས་བརྒྱད་རླུང་གིས་བསེད་པའི་སྐད་ཅིག་གི་སེམས་བྱུང་།།

འཇིག་རྟེན་འདུ་འཛིའི་ཉེས་དམིགས་ཉི་ཤུ་ཡིས་བཟས་འགྲོ།

དེ་དུས་ད་དུང་དབེན་པའི་རྫ་རི་ནས་ཉུལ་འདོད།།

གྱེས་ནས་འཇའ་ཚོན་བདའ་བའི་འཚོ་བ་དེ་མི་འདོད།།

འོན་ཀྱང་ལས་ཀྱི་བཤུལ་ལམ་བཅོས་ཐབས་རང་དཀའ་བས།།

ནམ་མཁའི་གྲུ་དང་འགྲོགས་པའི་ཉི་ཟེར་གྱི་མཐའ་ནས།།

ལས་ཀྱི་འདྲེས་བའི་རྡོ་རྗེ་མཆེད་གྲོགས་དང་བྲལ་ཏེ།།

རྒྱང་རིང་ཕ་མཐའི་ཕ་མཐར་བག་ཡངས་ཀྱིས་ཆས་སོང་།།

དེ་རིང་ལས་ཀྱིས་གྱེས་བ་ལས་བཀོད་ལ་བསྒོམས་ནས།།

མིག་མཐའི་ཟིལ་བ་དེ་ཡི་ཕྲེང་ཐག་དེ་བཅད་བཞག།

སང་ཉིན་དབེན་གནས་འདི་རུ་མཆེད་གྲོགས་ཚོ་ལྷན་དུ།།

ལས་ཀྱིས་འཛོམ་པའི་ལས་སྨོན་རྣམ་དག་ཅིག་བཏབ་ཡོད།།

2018བོད་ཟླ་དང་པོའི་ཚེས་དྲུག་གི་སྔ་མོར།

དཔྱིད་མགོའི་སྙན་ངག

ཡང་ཞིང་འཇམ་པའི་རླུང་ཞིག་ལྷོད་དུ་རྩེན།།

ནོར་འཛིན་ལུས་ལ་དྲོད་ཅིག་ངང་གིས་འཁོར།།

ཁུག་རྟའི་གཤོག་རྩལ་རྒྱང་ནས་འདི་རུ་གཏད།།

འགབ་ཀྱི་ཆུ་ཕྲན་དགའ་བས་ཤང་ཤང་བཞུར།།

ཁ་བ་དེ་ལའང་བསིལ་བའི་རེག་བྱ་ཆགས།།

སྣང་བ་རབ་རིབ་སྐད་ཅིག་གཡའ་དག་གྱུར།།

སྤྲོ་བའི་གཞས་ཤིག་སེམས་ཀྱིས་བཏང་ནས་ནི།།

ཉིན་གྱི་ཤོག་ལྷེ་རེ་རེ་དལ་གྱིས་བསྐྱལ།།

ཁྲུང་ཁྲུང་བསྟར་ཕྲེང་འགྲིག་པོའི་འོག་རོལ་ནས།།

སྣ་བརྒྱའི་མེ་ཏོག་ལང་ཚོའི་མཛེས་པར་བལྟས།

དགའ་བ་མིག་ལ་འཛུལ་ཏེ་སེམས་སུ་བཞུར།།

སེམས་ཀྱི་སྙན་ངག་ཚིག་གི་སྲོག་ལ་སྦྲུམ།།

ཀྱེ་མ་ལྗང་མདོག་མྱུ་གུའི་འཕེལ་ཁ་མྱུར།།

འཇིན་རྟེན་རྒུད་པ་གསོ་བའི་རེ་བ་འཛུམ།།

བསིལ་རླུང་ལྗང་མདོག་ལྷན་དུ་ཡང་བསྐྱར་དུ།།

ལན་གཅིག་ལྡང་བས་དཔྱིད་དཔལ་སླེབས་པ་ཚོར།།

2018 / 4 / 5 ཉིན་གྱི་ནུབ་མོར་བླ་རུང་ནས།

ཡུལ་གྱར་བའི་གླུ

ལོ་ཟླས་རིང་དུ་ཕྱེས་བའི་བར་ཐག་ཅིག་ན།།

བདེན་རྫུན་ཆ་མེད་ཅིག་གི་རྣམ་རྟོག་བཞད་དེ།།

མདུན་གྱི་མེ་ལོང་དེ་ལ་བཙའ་ཞིག་ཆགས་པས།།

རང་ངོ་རང་གིས་མ་ཤེས་ལོ་ཟླ་འགོར་སོང་།།

བྱེ་རྡུལ་དྲག་ཏུ་སྤྲུག་པའི་འཁོར་བའི་གྲོང་ལ།།

སྨྲེ་སྔགས་རླུང་གིས་ཁུར་བའི་འདུ་འཛི་མཆེད་འདུག།

འཁོར་བ་ལྷག་ཏུ་འཁོར་བའི་གྲུ་གའི་ནང་ན།།

མིག་ཟུང་ཆུ་ལ་ལྷུང་བའི་ཉམས་ཤིག་དོད་འོང་།།

དངན་པ་དབྱིངས་ལ་སྤུར་བའི་ནོར་འཛོལ་ཁྲོད་དུ།།

ཚོར་བའི་ལྕག་གིས་བཞུས་བ་ལེན་གྲངས་མང་བས།།

གྲོལ་གླུ་ཐན་ཐུན་ཞིག་ལ་རྔམ་པ་འཆོར་དུས།།

སྡོང་ལོ་སེར་པོའི་ཁ་ཕྱོགས་ངེས་མེད་འགྱུར་སོང་།།

སྣང་བའི་ཆུ་ལ་འཇའ་ཡི་རི་མོ་བྲིས་ཏེ།།

སྙིང་གི་ལག་ཏུ་བསྐལ་བའི་དུས་ལ་གཉར་བས།།

སེམས་པ་དབྱངས་ལ་སིམ་པའི་སྨྲེང་ཉམས་དེ་ཡང་།།

སུ་ཞིག་ཞེ་ལ་ལྷུང་བའི་ནག་ཉེས་ལོས་རེད།།

༢༠༡༨ / ༤ / ༡ ནུབ་མོར་བླ་རུང་ནས།