དྲན་འཛིན་གྱི་རྡོ་རིང་།

ཐོག་རྒོད།

ཕྱི་ཡི་ངུར་སྨྲིག་གོས་ཀྱི་ཀླུབ་པ་དང་།།

ནང་དུ་བསླབ་པ་གསུམ་གྱིས་རབ་ཏུ་མཛེས།།

ལེགས་ཡོན་ཕུན་ཚོགས་བྱེ་བ་འཛོམས་པའི་དཔལ།།

ཐུབ་བསྟན་ལེགས་བཤད་བསོད་ནམས་རྒྱ་མཚོར་འདུད།།

ཁྱེད་ལ་ཞེན་པའི་སྨྱུག་གུ་མ་འཕྲུལ་ལ།།

སྒྲོ་སྐུར་འུད་ཚོད་བྱ་ན་ཅི་ཞིག་ཕན།།

རང་གཤིས་སྨྱུག་མདའ་འཁྱོག་པོས་མ་བྱས་ནས།།

དྲན་འཛིན་རྡོ་རིང་འདྲ་བ་བདག་གིས་བཙུགས།།

ཐུགས་ཉིད་ཉ་གང་ཟླ་བ་རྒྱས་པ་ཡི།།

བྱམས་དང་བརྩེ་བའི་རེག་འཇམ་འགྲོ་ལ་བྱིན།།

སློབ་བུ་ཀུ་མུད་མེ་ཏོག་སྐྱེད་ཚལ་ལ།།

དྲིན་གྱི་འོད་ཟེར་གནང་བའི་བཀའ་དྲིན་ཅན།།

ཟོལ་པོའི་ལས་ལ་སུན་སྣང་རབ་ཏུ་སྐྱེས།།

འཁྱོག་བཤད་ཅན་གྱི་གཏམ་ལ་ཐུགས་མི་བཏད།།

མཛད་པ་དྲང་བདེན་ལམ་ན་བགྲོད་མཁས་པའི།།

སྐྱེས་བུ་ཁྱེད་ཉིད་གཡོ་མེད་རི་རྒྱལ་བཞིན།།

དྲི་མེད་ལྷག་བསམ་དྭངས་མ་ཕྲག་ཏུ་ཁུར།།

བསྟན་པ་སྤྱི་དང་ཁྱད་པར་རྒྱལ་དགོན་པའི།།

ལུང་དང་རྟོགས་པའི་འདུས་སྡེ་ཡོངས་རྫོགས་ནི།།

དབྱར་དུས་རྐང་མཐུང་ཡ་འདབ་རྒྱས་དང་མཚུངས།།

བཤད་སྒྲུབ་སྡེ་ལ་ཐོས་བསམ་དར་བ་ཡིན།།

བསླབ་པ་རྣམ་གསུམ་འཛིན་པའི་གྲྭ་བཙུན་མང་།།

ཀ་ཐོག་མཁན་རྒན་བསོད་ནམས་བསྟན་པ་གཙོས།།

རྒྱལ་སྲས་ཉི་ཟླ་གཉིས་སོགས་ཐུགས་བསྐྱེད་དང་།།

འོས་འགན་ལྕི་མོ་དང་དུ་ལེན་པ་ཡི།།

སྐྱེས་བུ་ཁྱེད་ཀྱི་བཀའ་དྲིན་འབའ་ཞིག་སྟེ།།

རྒྱལ་དགོན་བསྟན་པ་ཉག་མ་ཕྲ་བའི་སྐབས།།

བསྟན་དོན་རྩེ་གཅིག་སྒྲུབ་མཁན་ཉུང་ཉུང་འདྲ།།

ཆོས་ཀྱི་ཕན་དང་སྡིག་པའི་གནོད་པ་དག།

ཇི་བཞིན་མང་ཚོགས་རྣམས་ལ་སྟོན་མཁས་ཤིང་།།

ལྷ་སྡེ་རྣམས་ཀྱང་དགེ་བའི་ལས་ལ་རེམ།།

ཁྱེད་ཉིད་ཡུལ་སྡེ་དག་ལ་བཀའ་དྲིན་ཆེ།།

ལ་ལུང་ཇག་པ་མང་བའི་ཡུལ་གྲུ་ན།།

ཆང་རག་རྐུན་སོགས་གོམས་གཤིས་ངན་པ་རྣམས།།

རང་གཤིས་དྲང་པོས་ངང་ནས་རེ་བསྐུལ་གྱིས།།

རང་ཡུལ་ལྷ་སྡེ་གཙང་བ་ཁྱེད་ཀྱི་དྲིན།།

ས་དང་རྩྭ་རྩོད་བྱེད་པའི་རྒན་པོ་ལ།།

བདེན་པ་སྨྲ་བས་ཀུན་གྱི་གུས་པ་བྱས།།

ཡུལ་ལུང་དཀྲུག་ཤིང་ཅན་ལ་སློབ་གསོས་དུལ།།

ཁྱེད་ཉིད་ཡུལ་འདིའི་ཞི་བདེའི་རྒྱལ་སྲས་ཡིན།།

ལྷག་པར་བདག་དང་བདག་འདྲའི་སློབ་བུ་འགར།།

ཟས་གོས་སྤྱོད་སྟངས་བསླབ་ཅིང་ཡིག་རྨོངས་སེལ།།

མན་ངག་གནང་ཞིང་བྱ་སྤྱོད་ཀུན་གྱི་ཐོག།

གོ་བརྡ་ལེགས་པ་སྤྲོད་པས་བཀའ་དྲིན་ཅན།།

ཕ་མ་ལས་ཀྱང་ཁྱེད་ཉིད་བཀའ་དྲིན་ཆེ།།

གསེར་དངུལ་ལས་ཀྱང་ཁྱེད་ཉིད་རིན་ཐང་ཆེ།།

ལེགས་ཡོན་ཀུན་གྱི་ཕྱུག་པའི་བླ་མ་ལགས།།

ཁྱེད་ཉིད་བདག་གི་སྤྱི་བོའི་གཙུག་ཏུ་བཀུར།།

ཁྱེད་ཀྱི་ཡུལ་དགོན་རྣམས་ལ་བཞག་པ་ཡི།།

མཛད་རྗེས་བླ་མེད་ངག་སྒྲོས་བྱས་བཞག་ན།།

སྐབས་རེ་སྒྲོ་བཏགས་ཙམ་ལས་མ་འདས་པ།།

སྐབས་རེ་ཤིན་ཏུ་དབེན་བའི་ཉེན་ཁ་ཆེ།།

དེའི་ཕྱིར་དྲན་འཛིན་རྡོ་རིང་བདག་གིས་གཉེར།།

མདོར་བསྡུས་ཙམ་གྱི་སྐད་ལས་མེད་ན་ཡང་།།

དོན་གྱི་མཛད་རྗེས་ཕལ་ཆེར་འབོད་པ་ལགས།།

མ་རེད་མ་རིག་གང་ཡོད་བཤགས་པར་བགྱིད།།

འདི་ཉིད་དགེ་བའི་ཚོགས་སུ་མཆིས་འགྱུར་ན།།

བླ་མའི་སྐུ་ཚེ་བསྐལ་བརྒྱར་གནས་པ་དང་།།

མཛད་འཕྲིན་མཐའ་གྲུ་ཀུན་ལ་རབ་ཏུ་ཁྱབ།།

གདུལ་བྱ་སེམས་ཅན་རྣམ་མཁྱེན་ཐོབ་གྱུར་ཅིག།

ཅེས་གོང་གི་སློབ་བུ་ཐ་ཆད་པ་སྨྱུག་མིང་ཐོག་རྒོད་ཀྱིས་ཀ་ཐོག་བཅུ་ཕྲག་རིག་པའི་སློབ་གླིང་ནང་དུ་གྲུབ་པའོ།།

༢༠༡༨-༡༡-༢༦ཉིན།