དུས་ཆེན་བསུ་བའི་ཀ་རྩོམ།

ལྷ་ཐོག ཕོ་ལྷ།

ཀ་ཁའི་དབྱངས་ལ་འདྲེས་པའི་བསླུ་མེད་ཀྱི་སྙིང་གཏམ། །

ཁ་ཁོག་མཚུངས་པའི་ངང་ནས་རྒྱུན་ལྡན་དུ་བཤད་པའི། །

ག་སོང་ས་ཆ་ཀུན་ནས་བརྗེད་པ་རང་མེད་པའི། །

ང་ཡི་སྙིང་སྡུག་མཛའ་མོ་མཚོ་ཡག་དེ་དྲན་བྱུང་། །

ཅ་ཅོའི་འུར་གྱིས་ཁེངས་བའི་སྤོས་ལྡན་གྱི་གྲོང་ནས། །

ཆ་ཡོད་སྙིང་ཉེ་གྱུར་པའི་མཚོ་ཡག་ཁྱོད་དྲན་དུས། །

ཇ་ཆང་བཟའ་བཏུང་སྣ་ཚོགས་མཉམ་གཅིག་ཏུ་རོལ་ནས། །

ཉ་དང་གཙང་བོ་བཞིན་དུ་འགྲོགས་པ་དེ་འདོད་སོང་། །

ཏཱ་ལའི་བླ་མ་ལ་སོགས་ལྷ་ཚོགས་ཀྱི་མདུན་ནས། །

ཐ་ཚིག་འགྱུར་བ་མེད་པའི་ཁྱོད་རང་དང་འུ་གཉིས། །

ད་ལྟའི་མི་ཚེ་འདི་ལ་མཉམ་གཅིག་ཏུ་འཛོམ་པར། །

ན་གཞོན་ཕོ་ལྷ་བདག་གིས་སྨོན་ལམ་ཞིག་བཏབ་ཡོད། །

པ་སངས་སྒྱུ་སྐར་མཚུངས་བའི་ལྷད་མེད་ཀྱི་བརྩེ་སེམས། །

ཕ་བུ་ཕན་ཚུན་ལས་ཀྱང་ལྷག་པ་ཞིག་ལྡན་པས། །

བ་བྱུང་འོ་མ་བཞིན་དུ་དཀར་དཀར་གྱི་འཚོ་བ། །

མ་བཟང་བུ་མོ་ཁྱེད་ཀྱིས་གནང་བ་ཡང་དྲན་ཁི། །

ཙ་རི་གངས་རི་ལ་སོགས་མཉམ་གཅིག་ཏུ་སྐོར་ན། །

ཚ་གྲང་བཀའ་སྡུག་ཟེར་བ་ཡོད་པ་ནི་ཅི་སྲིད། །

ཛ་ཡ་སྙིང་སྡུག་ཁྱོད་རང་ཡོད་པས་ནི་ཅི་མིན། །

ཝ་ལེར་ཡིད་ལ་འཆར་རྒྱུ་ཁྱོད་རང་ལས་མི་འདུག །

ཞ་ལུ་ལོ་ཆེན་རྣམས་ལས་དགའ་དད་ནི་ཟབ་པས། །

ཟ་མའི་མཆོད་པ་ལ་སོགས་གཏན་དུ་ནི་ཕུལ་སའི། །

འ་འུར་རབ་ཏུ་དབེན་པའི་སྙིང་སྡུག་གི་འཁྲི་ཤིང་། །

ཡ་རབ་འདི་ཙམ་ཡོད་ཅེས་བརྗོད་པ་ནི་མི་ཚར། །

ར་མ་ལུག་ཏུ་གྱུར་བའི་ཕོ་མོ་ཡི་བརྩེ་དུང་། །

ལ་ལུང་གང་ལ་བལྟས་ཀྱང་ཉུང་བ་ཞིག་མིན་རུང་། །

ཤ་གསེང་རུས་པའི་སྟེང་ནས་ལྷད་མེད་ཀྱི་བརྩེ་དུང་། །

ས་སྟེང་སྲིད་པའི་གྲོང་ན་འུ་གཉིས་ལས་མི་འདུག །

ཧ་ཅང་དྲང་པོའི་གཏམ་ཞིག་བྱམས་པ་ཡི་ཕྱོགས་ལ། །

ཨ་མཚར་ཚུར་དུ་མ་ཡིན་ཁོ་བོ་ཡིས་ཕུལ་ལོ། །

༢༠༡༩/༢/༡༤/མཛའ་གྲོགས་དུས་ཆེན་ཉིན་ཁྲིན་ཏུའུ་ནས་བྲིས་སོ། །