࿐ལས་ཀྱི་མདངས་རིས།

གྱིན་འདའ་བ། ཁྲི་འདུ།

སྣ་ཚོགས་འཁོར་བའི་ཡོ་ལོང་རྒོད་པའི་སེམས་པ་འདི།།

བདག་འཛིན་བདུད་ཀྱིས་འཐབ་མོ་འགྱེད་པའི་སེམས་པ་འདི།།

ཉོན་མོངས་དུག་གི་ཁ་རླངས་འཐུལ་སའི་མཁར་རྫོང་ཡིན།།

འཕྲུལ་སྣང་བློ་ཡིས་ཟློས་གར་འཁྲབ་སའི་གར་སྟེགས་ཡིན།།

འཁོར་བའི་པང་ནས་ལས་ཀྱིས་བསྐོས་པའི་སྙིང་མཐུན་འདི།།

དུས་སེམས་འོ་མས་ཕབ་ཀྱིས་བསྙལ་བའི་སྙིང་མཐུན་འདི།།

དྲན་གདུང་ཁྲི་ཡིས་ན་ཟུག་བརྩེགས་སའི་མིག་ཆུ་ཡིན།།

ལོ་ངོ་སྟོང་གི་རྨི་ལམ་འཕྲི་སའི་ཞེན་ཆགས་ཡིན།།

སེམས་ཀྱི་སྣང་བ་གར་ལ་ཁྲིད་པའི་རོལ་དབྱངས་འདི།།

ཡིད་ཀྱི་དྲན་པ་གཡང་ལ་ཕབ་པའི་རོལ་དབྱངས་འདི།།

སྨྲེང་སེམས་ན་བུན་དབྱིངས་སུ་ཁྲིད་པའི་དཔྱིད་རླུང་ཡིན།།

དྲན་པའི་སྦྲང་ཆར་ཀློང་ན་ཕུབ་པའི་གཞའ་རིས་ཡིན།།

མ་ངེས་རྣམ་རྟོག་གཅིག་ཏུ་བཅེར་བའི་རྩོམ་རྙོག་འདི།།

མི་འདོད་སེམས་ཀྱི་རྔུལ་ཆུ་འཐོར་བའི་རྩོམ་རྙོག་འདི།།

འཁོར་བའི་བྱེ་ཐང་ཡུན་གྱིས་བརྒལ་བའི་རྐང་རྗེས་ཡིན།།

བགྲང་བྱ་དུ་མའི་རེག་ཟིག་བཀོད་པའི་ཉིན་ཐོ་ཡིན།།

ཚོར་བའི་ཚིག་གི་མེ་ཏོག་གད་པའི་སྙན་ངག་འདི།།

དྲན་པའི་མཐིལ་གྱི་ཕྱི་ནང་གསལ་བའི་སྙན་ངག་འདི།།

དགའ་སྐྱོ་སེམས་ཀྱི་སྣང་བ་རྩེན་སའི་རྒུན་ཆང་ཡིན།།

སྐྱིད་སྡུག་སྟོང་གིས་དྲན་པ་གླན་སའི་ཆུང་མ་ཡིན།།

ཐོགས་མེད་ལན་ཆགས་ལས་ཀྱིས་བསྲུབས་པའི་མིག་ཆུ་འདི།།

སྐྱེ་བ་ལྔ་བརྒྱའི་བག་ཆགས་བསྒྲིབས་པའི་མིག་ཆུ་འདི།།

སེམས་བྱུང་ཉོན་མོངས་དུག་གིས་སྦངས་པའི་ཁ་རླངས་ཡིན།།

ཡིད་འགྱུར་རྣམ་རྟོག་རབ་ཏུ་སྤྲུགས་པའི་ཟིལ་བ་ཡིན།།

སྣ་ཚོགས་ལས་ལ་ལད་ཟློས་བྲེལ་བའི་མི་ཚེ་འདི།།

སེམས་ཀྱི་སྡུག་སྒྲིབ་ཡོངས་སུ་གཏམས་པའི་མི་ཚེ་འདི།།

འཁོར་བའི་རྒྱ་མཚོའི་འདམ་དུ་བྱིང་པའི་ཚེ་སྲོག་ཡིན།།

སྣོད་བཅུད་འཇིག་རྟེན་པང་དུ་གཡེང་བའི་རྩེད་ཆས་ཡིན།།