ང་དང་མི་རྟག་པ།

ང་དང་མི་རྟག་པ།

དུས་ཚོད་མྱུར་པོ་རླུང་བཞིན་རྒྱུག་སོང་།

དུས་ཚོད་དལ་མོ་ཆུ་བོ་བཞིན་བཞུར་སོང་།

ཧ་ལས་པ་ཞིག་ནི།

རང་ཉིད་ངོས་མ་ཟིན་པ་དེ་ཡིན།

མིག་ཟུང་ཆ་གཅིག་གིས་མ་རིག་མུན་པ་དེ། སེལ་ཐབས་མེད་པར་རྟོགས་སོང་།

ཆེས་འཇིགས་སུ་རུང་བ་ནི།

འགྱུར་བའི་རང་བཞིན།

མི་རྟག་ལས་མ་སད་པའི་རྨི་ལམ་ནག་ལྡོག་ཅན།

མགྲོན་ཁང་གི་ལུས་གཟུགས་ལ།

སྐྲ་ལོ་དཀར་པོས་གོ་ལ་གོར་གོར་ཐོག་ལ་རྐང་རྗེས་འཇོག

དབུ་རྐང་བར་གྱི་ལུས་གཟུགས་དེ་མདའ་གཞུ་ལྟར་གྱུར་སོང་།

ཚུགས་པོ་ཤ་རྗེན་ད་ནི་རུས་པགས་རྗེས་སུ་རྒྱུག

སྨྲ་ལྕེ་བདེ་མོ་བརྡར་བརྡར་བྱས་ནས་ད་ནི་ནར་ནར་ལོག་ཏུ་བསྒྱུར།

སྒྱུ་མ་མཁན་གྱིས་ཁྱོད་རང་ལ།

དུས་ནི་རྟག་པ་ཡིན་པར་སེམས་སུ་འཁྲུལ།

དཔྱིད་ཀྱི་མེ་ཏོག་བཞད་པ་ཧ་ཅང་མཛེས།

འུར་འུར་རླུང་གིས་བསྐྱོད་ཐེངས་སྐད་ཅིག་ནང་།

ཁྱོད་རང་ག་སོང་འགྲོ་བ་ངས་མ་ཤེས།

དབྱར་གྱི་ཆར་བ་ཤག་ཤག་སྐད་ཅིག་ཙམ།

ཆུ་མེད་ཟམ་འོག་རྩྭ་དང་མཉམ་དུ་ས་གཞི་རླན་དང་འཁྱམས།

ཉི་ཟེར་གཅིག་གིས་ཁྱོད་ཅག་གང་དུ་གནས་པ་སུ་ཡིས་ཤེས།

སྟོན་གྱི་སྡོང་བོ་ལོ་སེར་ཅན་ལ་འཚུབ་རླུང་དྲག་པོ་ཚུགས་ཐེངས་གཅིག

ནང་གོས་ཕྱི་གོས་ཟད་ནས་བུ་མོ་སྒྲེན་མོར་གཉིས་སུ་མེད།

དགུན་གསུམ་ཁ་བ་རི་ལུང་ཀུན་ལ་ལྡང་སོང་།

དར་གྱི་རས་གོས་དཀར་བོ་ས་ལ་ས་ལ་མཛེས།

རྟ་བདུན་འོད་ཟེར་ཅན་གྱི་དྲོད་གཤེར་ངེས།

ཁྱོད་རང་སྤྲིན་མིན་དུ་མིན་ག་སོང་ཆ་མེད་གྱུར།

ཨ་ཁ་ཁ།

འདི་དག་ནི།

ངའི་མི་ཚེའི་བགྲང་བྱ་རྩིས་མཁན་རེད་འདུག

ཁོང་ཚོས།

ང་ལ་མི་རྟག་གིས་གཟུགས་བརྙན་གསལ་མོ་མིག་ལ་བཏང་སོང་།

མི་རྟག་མི་འདུག་དུས་ཀྱིས་རྗེས་ས་རྒྱུག

ང་ནི་མི་འདུག་མི་རྟག་རྗེས་སུ་རྒྱུག

འགྱུར་བའི་རང་བཞིན་འཇིག་རྟེན་ཆོས་ཉིད་ཡིན།

ལ་ཁའི་ཉི་མ་འཆར་ཐེངས་རེ།

དགུང་མོའི་ཟླ་བ་ནུབ་ཐེངས་རེ།

རྨི་ལམ་འདྲ་བའི་ཆོ་འཕྲུལ་དེས།

མི་རྟག་དྲན་པའི་སྙིང་ནོར་ཡིན།

འབའ་ར་འབྱུང་ཆོས་ཀྱིས་བྲིས་པ་དགེའོ།