དགེ་རྒན་ལ་བསྟོད་པའི་ཀ་རྩོམ་གསེར་གྱི་ཐགས་བཟང་།

བླ་མ་མེད་པའི་གོང་རོལ་ན།།

སངས་རྒྱས་ཞེས་པའི་མིང་ཡང་མེད།།

བསྐལ་བ་སྟོང་གི་སངས་རྒྱས་ཀྱང་།།

བླ་མ་དག་ལ་བསྟེན་ནས་བྱུང་།།

ཡོན་ཏན་ཀུན་གྱི་གཞིར་གྱུར་དྲིན་ཅན་རྗེ།།

ཚུལ་བཞིན་བསྟེན་པ་ལམ་གྱི་རྩ་བ་རུ།།

ལེགས་པ་མཐོང་ནས་འབད་པ་དུ་མ་ཡིས།།

གུས་པ་ཆེན་པོས་བསྟེན་པར་བྱིན་གྱིས་རློབས།།

ཀ་ཁའི་དབྱངས་རྟའི་འགྲོས་དང་འགྲོགས་ནས།།

ཁ་བ་རིག་པའི་མདུན་ལམ་ལྕག་གིས་སྐུལ།

ག་དུས་ཡིན་ཡང་ལྷད་མེད་སྲོལ་བཟང་གིས།།

ང་རང་སུ་ཡིན་ངོ་ཤེས་ཁྱེད་ཀྱི་དྲིན།།

ཅ་ཅོ་མི་དགའ་དོན་གྱི་གནས་ལ་མཁས།།

ཆ་ལུགས་བཟང་ཞིང་རིགས་ཀྱི་གོམས་སྲོལ་འཛིན།།

ཇ་ལན་ཇ་ཡིན་དཔྱོད་པའི་ཤེས་རབ་ལ།།

ཉ་གང་ཇི་བཞིན་དགེ་བའི་ཆ་ཡི་རྫོགས།།

ཏ་ལེ་མི་གཞིས་མི་ཆོས་རྗེས་མཐུན་པས་།།

ཐ་ན་རང་ལུས་ནད་ཀྱིས་གདུང་ན་ཡང་།།

ད་རུང་རང་གི་ལུས་ལྟར་གཅེས་པའི་བུ།།

ན་གཞོན་བློ་གསར་རྣམས་ལ་ལམ་རེ་སྟོན།

པ་ཕ་བ་མ་གཞན་ལས་དྲིན་ཆེ་བས།།

ཕ་དང་འདྲ་བའི་བཤེས་གཉེན་དམ་པ་ཡིས།

བ་ལང་རྐང་རྗེས་འདེད་པའི་གཞོན་བློ་དེ།།

མ་རིག་མུག་མུན་སེལ་བ་ཁྱེད་ཀྱི་དྲིན།།

ཙ་རིའི་སྨྱུག་མ་འདྲ་བའི་རང་གཤིས་ལ།།་

ཚ་ཚ་མེ་ལྟར་འབར་བའི་ཤེས་རབ་ཀྱིས།།

ཛ་ལང་ཅན་གྱི་སྤྱོད་པ་རབ་བཏུལ་ནས།

ཝ་ལེར་གསལ་བའི་རྣམ་དཔྱོད་ཁྱེད་ལ་ལྡན།།

ཞ་སྨྱུག་ཐིགས་རིས་དྲང་པའི་རྟགས་མཚན་དཀྱིལ།།

ཟ་ལུགས་འཐུང་ལུགས་བསླབ་པའི་དྲིན་ཆེན་མས།།

འ་ཅག་གདོང་དམར་ཚང་གི་སྲོལ་རྒྱུན་འདིར།།

ཡ་མཚན་ཉམས་པར་མེད་པའི་རྟགས་ཤིག་འགོད།།

ར་བས་བསྐོར་བའི་སློབ་རའི་གྲུ་བཞི་ནང།།

ལ་གཏམ་ལུང་བཤད་པའི་སློབ་བུ་ལ།།

ཤ་ཚ་སྙིང་རྗེའི་གཞན་ཕན་བསླབ་བྱ་སོགས།།

ས་སྟེང་མི་ཡི་ཀུན་སྤྱོད་ཡིན་ལུགས་སྟོན།།

ཧ་ཧ་དགོད་སྒྲས་ཁེངས་པའི་འཛུམ་མདངས་འདི།།

ཨ་མ་འདྲ་བའི་བཤེས་གཉེན་ཁྱེད་ཀྱི་སེམས།།

མདོར་ན།

དགེ་རྒན་ཁྱེད་ནི།

མི་རིགས་ཤིག་གི་ཚེ་སྲོག།

མདུན་ལམ་ཞིག་གི་སྒྲོན་མེ།

དགེ་བའི་ས་བོན་གསོན་པོ་དེ་ཡིན་ནོ།།

འབོ་སྒྲོམ་ཤེས་རབ་ཀྱིས་མ་རིག་རྨོངས་མུན་སེལ་བའི་དྲིན་ཅན་གྱི་དགེ་བའི་བཤེས་གཉེན་ཡོངས་ལགས།

ལྷག་བསམ་གཙང་མས་ངང་ནས་བཀྲ་ཤིས་པའི་རྟེན་འབྲེལ་གྱི་ཤིས་ཚིག་འདི་འཕྲིན་ཕྲན་གྱི་གྲོགས་ཚོམས་བརྒྱུད་ནས་ཕུལ།།