བསྟོད་ཚིག་ཀ་ལ་པིང་ཀ (ཞར་བཀོད་གཅིག)

མཁན་ཆོས་སྐྱོང་དགྲ་འདུལ།

དུ་སྤྲིན། （ཡུལ་ཤུལ།）

བཅུ་ཕྲག་རིག་གནས་གང་གཱའི་བྱེ་མའི་ཁྱོན།།

ཡོངས་རྫོགས་སྐད་ཅིག་ལག་མཐིལ་རི་མོ་ལྟར།།

མ་འདྲེས་ཇི་བཞིན་ཐུགས་སུ་ཆུད་པ་པོ།།

འཆད་རྩོད་རྩོམ་གསུམ་དབྱར་གྱི་རྔ་བོ་ཆེས།།

གཏི་མུག་ལ་ཆགས་རི་དྭགས་གཉིད་ལས་དཀྲོག།

མཁས་མང་རྒྱུ་སྐར་བྱེ་བ་གྲངས་ཀྱི་དབུས།།

ཁྱེད་ནི་རྣམ་པ་གཅིག་ཏུ་རི་བོང་ཅན།།

རྣམ་དཔྱོད་འོད་ཀྱི་ཆ་ཤས་རེ་རེས་ཀྱང་།།

ལེགས་ཉེས་སྣང་བ་མུན་པ་གཉིས་སུ་འབྱེད།།

རྟག་ཏུ་ཞི་དུལ་བག་ཕེབས་ངང་གནས་པ།།

སྐྱེ་བོ་ཀུན་གྱི་མིག་དབང་ཅིག་ཅར་འཕྲོག།

ཐབས་དང་ཤེས་རབ་དབྱེར་མེད་ཟུང་འཇུག་གིས།།

ཐུབ་པའི་བསྟན་པ་གོ་ལའི་ཁྱོན་འདིར་སྒྲེང་།།

ཁྱེད་ནི་ཡུལ་འདིའི་རིན་ཆེན་དངོས་པོ་ཀུན།།

གཅིག་ཏུ་བསྡུས་ནས་བྱུར་བུར་གཏམས་པ་ཡིན།།

2019/9/16

མཁན་དགའ་བ་ཚེ་རིང་།

མདོ་སྔགས་གཞུང་ལུགས་རྒྱ་མཚོའི་ཕ་རོལ་ཏུ།།

བརྩོན་པའི་ཀོ་གྲུར་བརྟེན་ནས་སྐད་ཅིག་ཕྱིན།།

ཐོས་བསམ་ཤེས་རབ་མེ་དཔུང་ལྷབ་ལྷུབ་ཀྱིས།།

གཞུང་ལུགས་ངན་པའི་གཏམ་གྱི་ཚང་ཚིང་བསྲེགས།།

བཀའ་པོད་ལྔ་ཡི་དཀའ་གནད་ཟབ་མོའི་དོན།།

ཚུལ་བཞིན་འཆད་ལ་རིག་པ་རྣོན་པོའི་དབལ།།

སྐུ་གཟུགས་རི་རྒྱལ་ལྷུན་པོ་འགྱིང་ཉམས་ལ།།

ཡིད་འོང་སྤྱོད་ལམ་སྡུག་གུའི་རྒྱན་གྱིས་སྤྲས།།

རྟག་ཏུ་ཁྱེད་ཞལ་དམར་ནག་ཁྲོ་གཏུམ་འཁོར།།

སྤྱན་གཉིས་བུང་བ་ཟེའུ་འབྲུས་མྱོས་པ་བཞིན།།

དཀར་འོད་ཁྲ་མདངས་ཆིལ་ལེར་མས་ལ་གཟིགས།།

དྲག་པོའི་གསུང་ནི་བདུད་རྩི་ཆུ་ཡི་བཅུད།།

གང་ཞིག་སློབ་མའི་རྣ་བར་སིམས་གྱུར་ཚེ།།

དེ་ཡི་སྐྱོན་རྣམས་རྔུལ་ཆུ་དྲི་མ་འདག།

མཁན་མཆོག་ཁྱེད་ནི་སྒྲོན་མེའི་དཔལ་ལ་འགྲན།།

2019/9/17