ཟླ་བའི་འོག་གི་དྲན་པ་འགོག་མེད།

----------------མེ་ཟོར།

འདི་ནས་རྒྱང་ཐག་མི་རིང་འོམ་པའི་ལྗོངས། །

སྤྲིན་དཀར་འདབ་མ་གཡོ་བའི་ཕྱོགས་དེ་ན། །

བདག་གི་ཐོག་མའི་རྩ་ཐང་བཞད་ཁ་མ། །

སེམས་ཀྱི་གཏིང་ལ་ཟུག་པའིི་ཕ་ཡུལ་དྲན། །

སྐར་ཁོང་ནང་ནས་ཟླ་བའི་དགྱེས་ཞལ་བལྟས། །

འགྲམ་པ་ལག་པས་བསྐྱོར་ནས་བསམས་གཞིག་བཏང་། །

འདས་ཟིན་སྣང་བརྙན་གཅིག་གཅིག་གཉིས་གཉིས་འཁོར། །

དགའ་སྐྱོ་རུམ་ནས་མཚན་མོའི་གཉིད་ཀྱང་ཆགས། །

སྤྲིན་པ་ལང་ལོང་རྒྱུ་བའི་མཁའ་དབྱིང་ན། །

དར་ཅིག་ཀློང་གི་འཇོ་སྒེག་རབ་མཛེས་མ། །

ཁྱོད་ལ་ཆགས་པའི་ཞེ་རྩ་གཟིར་ན་ཡང་། །

ཅི་བཞིན་མཇལ་བའི་ལས་འཕྲོ་དབེན་པར་མོད།།

སྟོན་གྱི་སྡོང་ལོ་ཐོར་དུས་ཕ་ཡུལ་དྲན། །

རི་དྭགས་ནག་ལ་འཁོར་དུས་ཕ་ཡུལ་དྲན། །

སྔོ་ལྗང་སད་ཀྱིས་ཁྱེར་དུས་ཕ་ཡུལ་དྲན། །

རྩ་མགོ་ཁ་བའི་གཡོགས་དུས་ཕ་ཡུལ་དྲན། །

དེ་ལྟར་དྲན་པའི་གཏིང་ལ་ཚོད་མེད་དུ། །

རིམ་གྱིས་རྫོགས་པས་འདས་བྱ་ཐམས་ཅད་དྲན། །

དྲན་ཡང་མི་ཚེ་སྟོང་བས་སྣོན་མ་ཅིག།

སྐྱོ་ཡང་འཁྲུལ་བས་གཏད་པའི་སྣང་ཚོར་ཞིག།

སྣོད་བཅུད་སྲིད་པའི་རི་གླིང་གནས་ནའང་། །

རྩིག་པས་ཁང་ཁྱིམ་གནས་པའི་ངེས་པ་མེད། །

རྟོག་སྣང་སེམས་ཀྱི་འཆར་སྒོ་མང་ནའང་། །

བདོས་བཅས་ལུས་འདི་གནས་པའི་ངེས་པ་མེད། །

ཡུད་ཙམ་སོང་རྗེས་འགྱུར་བས་བསླད་ཞུགས་ནས། །

སྔར་གྱི་ཕ་ཡུལ་ད་ལྟའི་ཕ་ཡུལ་མིན། །

ཕན་ཚུན་ངོ་མི་ཤེས་པ་མང་པོ་འདུས། །

གཉེན་དང་མཛའ་བཤེས་ངོ་མི་ཤེས་པ་འདུག།

མཚོན་མོའི་འོད་ལ་ཁེན་པའི་བདག་གི་སེམས། །

ཕ་ཡུལ་འོམ་པའི་ཕྱོགས་ལ་གྲངས་མེད་ཤོར། །

ལི་ཆུའི་རླབས་སྒྲ་མ་གཏོགས་གཉིད་ལ་ཞེན། །

ཞེན་པའི་ཤུལ་དུ་བདག་ལ་སྐྱོ་བ་བཞག།

སྡོང་ལོ་ས་མཐོར་ཆུ་ཡིས་རླབས་སུ་བསྐྱུར། །

མི་ཟུང་ཅེར་ནས་ཡུད་ཅིག་དྲན་པས་བཟུང་། །

སྡོང་ལོ་མི་རིང་ཕ་ཡུལ་རྩ་ཐང་དུ། །

བཞུར་བའིི་སྣང་ཤེས་གསོན་པོ་ལྡོག་མེད་སླེབས། །

རེ་ཞིག་ལེ་བར་ཆོད་པའི་ཕ་ཡུལ་ན། །

ཕ་མའི་གཅེས་སྐྱོང་ཞིམ་པོ་སྔར་བཞིན་ཡོད། །

གནས་སྐབས་རང་རང་འཚོ་བའི་བདེ་རྔར་འཇུས། །

ད་ལོ་ཟླ་བ་འདུན་པར་ཕ་ཡུལ་འགྲོ། །

____________༢༠༡༩-༡༠-༨