ངའི་སྙན་ངག་གི་སེམས།

ཡོང་ཁུངས། : ཁམས་པའི་སློབ་ཁྲིད་ཐོན་ཁུངས་དྲ་བ། རྩོམ་པ་པོ། : འབའ་ར་འབྱུང་ཆོས ཀློག་གྲངས །: སྤེལ་དུས། : 2019-10-20

ངའི་སྙན་ངག་གི་སེམས།

སའི་གོ་ལ་འདི་ནི་ང་ཚོའི་མཐུན་མོང་གི་ཁྱིམ་གཞི་ཞིག

སྨག་རུམ་འདི་ནི་ང་ཚོའི་མཐུན་མོང་གི་མཚན་མོ་མཉམ་གཅིག

དེ་ལས་གཞན་པ་ལྡོག་གཅིག་ནི།

རང་ཁེ་རྐྱང་ལ་དབང་བའི་སྙན་ངག་ཞིག་དང་རྨི་ལམ་གཅིག

རང་ཉིད་ཀྱི་འཚོ་བ་རུ།

སྐྱིད་སྡུག་གི་ལོ་ཟླའི་ཚེས་གྲངས་སེམས་ལ་ཉལ་སྟངས་རེ།

མདུན་ཕྱོགས་ཀྱི་གོམ་པ་སྤོས་བཏང་རེ་དང་རྗེས་ཕྱོགས་སུ་རྐང་རྗེས་བཞག་བཏང་རེ།

མི་དང་མིའི་བར་ལ་སེམས་ཀྱི་བརྗོད་ཚིག་འགྲོ་ལུགས་རེ།

གངས་འདབས་དང་རི་ལུང་ན།

སྦྲ་ནག་པས་སྒོ་ཟོག་དང་མེ་ཏོག་ལ་བསྟོད་ཚིག་རེ་དང་ཞིང་པས་འབྲས་ནས་སོགས་ལ་བརྩེ་དུང་གི་སེམས་ཐག་འཐེན་བཏང་རེ།

བརྩེ་བའི་མི་ལ་སྙན་ངག་གི་སྨྱུག་ཁ་རེ་དང་གཏམ་རྒྱུད་ཀྱི་བྱུང་འཕེལ་རེ།

མི་རེ་རེ་ལ།

མ་བཤད་གྱི་གཏམ་ལ་ཇི་ལྟར་ཚོད་དཔག་རེ།

མ་མཐོང་མིག་ཟུང་གི་རྗེས་ལ་དྲན་དུང་གི་རྣམ་པ་རེ།

ང་རང་ལ་གཞན་སེམས་ཤེས་པའི་ནུས་སྟོབས་ལྡན་ན།

དྲོ་བ་མངར་མོའི་ངང་ནས་ཁྱོད་ཀྱི་འཚོ་བ་དེ་ངའི་སྙན་ངག་ཏུ་ཟིན་ཐོ་ཐེངས་གཅིག་བཀོད་ན་འདོད་བྱུང་།

ཕལ་ཁའི་སེམས་ལ་ཁ་བརྡ་གང་མང་ཞིག་བརྗོད་ན་འདོད་བྱུང་་་་་་་་་

འབའ་ར་འབྱུང་ཆོས་ཀྱིས་བྲིས་པ་དགེའོ།

རྩོམ་སྒྲིག་པ། : lalong1985