གསེར་རྟ་བ། ཤར་རྣོ་ཚེར་གྱིས་སྙན་རྩོམ་ཚན་པ་གཉིས།

ཁུ་སིམ་ནང་གི __ བརྩེ་འདང་བཞད་ཚུལ།།

གསེར་རྟ་བ། ཤར་རྣོ་ཚེར་གྱིས།།

ལོ་ཟླ་རིང་བོ་ཞིག་ཐུག་འཕྲད་ཐུང་གི།

བརྩེ་འདང་གཏིང་ཟབ་ཅིག་མཉམ་འཛོམ་དཀའ་མོ།།

ཟླ་བ་བསིལ་འཇམ་ཞིག་མུན་པ་རིང་བོ།།

རྨི་ལམ་བྱེ་ཐང་གི་ཁུ་སིམ་མེ་ཏོག།

སྟོན་ཟླ་དགུ་བ་ཞིག་ཚེས་དུས་དྲན་གི།

ལོ་འབྲས་སྡོང་ལོ་དེ་ས་ལ་འཐོར་དུས།།

སྙིང་སྡུག་འདང་མ་ཡང་ལྷག་ཏུ་དྲན་གི།

དགུན་ཟླ་རིང་བོ་ཞིག་ད་རུང་བསྐྱལ་དགོས།།

ཁོ་གཉིས་མ་འཕྲད་འདི་མི་ལོ་གཉིས་ཙམ།།

དུས་ཡུན་དེ་ཙམ་གྱི་བར་དུ་འདང་བརྩེ།།

སྐུད་མེད་གཟུགས་འཕྲིན་གྱི་སྐུད་ལམ་རྒྱུད་ནས།།

སྙིང་གཏམ་མང་མང་ཞིག་ཕན་ཚུན་གླེང་ཡོད།།

གཞིས་ཁྱིམ་གཅིག་འདོད་ཀྱི་སྨོན་ལམ་རྒྱབ་ཡོད།།

ཚེ་གང་དུས་ཀྱི་ཡི་གཏན་གྲོཊ་བཅོལ་ཡོད།།

སྐྱིད་སྡུག་མཉམ་ཁུར་གྱི་རྟ་ཕོ་གཤིབ་ཡོད།།

ཤི་ན་མཉམ་ཤི་ཡིན་གསོན་ན་མཉམ་གསོན།།

དགུང་ནས་སྐར་འཆར་ན་རང་གི་འཛའ་ན།།

ལྷོ་ཡི་སྤྲིན་འགུལ་ན་རང་གི་འཛའ་ན།།

ཁྲུང་ཁྲུང་ལྷོ་འཕུར་ན་སྙིང་གི་འཛའ་ན།།

མདོར་བསྡུས་ཡོད་ཚད་ནས་ཡོད་ཚད་འཛའ་ན།།

ལུས་ལ་དྲི་ཞིམ་ཞིག་ལྡན་པ་དྲན་གི།

ངོ་ལ་སྨེ་ཤ་ཞིག་ཡོད་པ་དྲན་གི།

མདངས་ལ་སྒེག་གཟུགས་ཤིག་ལྡན་པ་དྲན་གི།

ཡོད་ཚད་ང་རང་གི་སེམས་ལ་དཔར་ཡོད།།

བྲོ་བ་ཞིམ་མངར་གྱི་མཆུ་གཙང་དྲན་གི།

ཡོད་ཚད་ཁོ་བོ་ཡི་སྟེར་བ་དྲན་གི།

ཐམས་ཅད་ཐམས་ཅད་ཀྱི་བདག་པོ་ང་ཡིན།།

ཞེ་འདང་ཁུ་སིམ་གྱི་དྲན་པ་ཁོ་མོ།།

ནམ་ཞིག་འཆི་བྲལ་གྱི་ལ་རྩར་ཕེབས་དུས།།

ཆུང་རོགས་ལྷ་དཀར་གྱི་མིག་ཆུ་ཐིགས་པ།།

ཕྱི་མའི་ལམ་སྣེ་ནས་མ་བགོམ་གོང་ལ།།

སེམས་གཏིང་མིག་ཆུ་ཞིག་ཡོད་ན་དེས་ཆོག།

༢༠༡༩ ༡༠ ༡༥

ཁྱུང་ཕྲུག་ཅིག་ནམ་མཁར་འཕུར་བ།།

གསེར་རྟ་བ། ཤར _ རྣོ་ཚེར་གྱིས།།

དགུང་སྔོན་གནམ་འཕང་གཅོད་པའི།།

ཁྱུང་ཕྲུག་གཤོག་རྩལ་ཅན་པོ།།

སྤྲིན་པ་དཀར་དམར་བར་གྱི།།

ཕྱིར་མིག་ལན་གསུམ་ལྟོས་དང་།།

འདང་ཆེན་བྱམས་པའི་འཇོལ་མོས།།

སེམས་རྩ་སྡུག་གི་མནར་བ།།

སྟོན་གྱི་ན་ཐུན་ཁྲོད་དུ།།

རྨོངས་བའི་ངག་རྩ་འདར་འདར།།

ཁྱོད་ལ་སེམས་ཤིག་ཡོད་ན།།

ཉམ་ཆུང་འཇོལ་མོ་ང་རང་།།

གར་འགྲོ་ས་ལ་ཁྲིད་དང་།།

ཚེ་གང་མཉམ་འདུག་བྱེད་ཆོག།

མེ་ཏོག་སེར་ཆེན་ཅིག་གིས།།

ད་ལོ་མི་འདུག་བུད་འགྲོ།།

སང་ལོ་དབྱར་ཟླ་མགོ་མ།།

སླར་ཡང་མཉམ་འཛོམ་བྱེད་ཆོག།

དུས་སྐབས་དེ་ཡི་བར་ལ།།

བར་ཆད་གང་འདྲ་མི་བྱུང་།།

གལ་ཏེ་ལེགས་པར་མ་བྱུང་།།

སང་ལོ་ཟེར་ནས་ཅི་ཆ།།

༢༡༩ ༡༠ ༡༥