སྐར་མ་ཨ་བརྟན་གྱི་སྙན་ངག་གསར་བ་གཉིས།

ན་བུན་ཁྲོད་ཀྱི་སྟོན་ཁ།

སྐར་མ་ཨ་བརྟན།

ཟླ་བཅུ་བའི་ཟླ་མཇུག་བསླེབས་པ་ན།།

རི་མཐོན་པོའི་བརྗིད་ཉམས་ཤོར་སོང་སྐད།།

ཆུ་དྭངས་མོས་སྐྱོ་བའི་གཞས་ཆུང་གྱེར།།

སྟོན་རླུང་འཁྱག་གློ་བུར་སྙིང་ལ་ལྡང་།།

གཏམ་ངན་པ་ཐོས་པས་སྙིང་རེ་ན།།

ལས་སྐལ་ངན་ངེད་ཅག་ཉམ་རེ་ཐག།

ཁྱེད་བཞུད་པའི་གདུང་བ་ལྕི་མོ་ནི།།

ས་ཆེན་པོ་ཡིན་ཡང་ཐེག་རེ་དཀའ།།

དགོན་འདི་ཡི་གསེར་ཏོག་སྔར་བཞིན་མཛེས།།

ནང་གྲྭ་མང་འཚོགས་པས་གླིང་འདི་བརྒྱན།།

དགོན་འདི་ན་སུ་བཞུགས་སུ་མི་བཞུགས།

དགོན་འདི་ན་སྐྱེས་ཆེན་གང་མང་བཞུགས།།

དེ་ཡིན་ཡང་གང་གི་གདུང་འཚོབ་ཏུ།།

བགྲང་ཆོག་པ་གཅིག་ཀྱང་མ་རྙེད་དོ།།

དེ་བསམ་ན་ཞེ་ནི་ལྷག་པར་སྐྱོ།།

ཞེ་སྐྱོ་རུང་མི་འདུག་རང་དབང་ཅི།།

ཕར་བལྟས་ཚེ་གཅོང་ཁྱུས་སྐོར་འཕུར་གནང་།།

དེས་ཡིད་ལ་མཆི་མ་ཡང་ཡང་སློང་།།

སྟོན་ན་བུན་འཁྲིགས་པའི་གཞིས་ཀ་འདིར།།

སྡུག་མྱ་ངན་མཚོ་མོ་སྐྱིལ་མཁན་མང་།།

འདང་བརྒྱབས་ན་བོད་པ་སྤྱི་ཡི་གྱོང་།།

མི་ངེད་ཅག་བསོད་ནམས་དམན་པས་སོ།།

སྒོས་བུ་སློབ་སྟོང་གི་སྒྲོན་མེ་གཟིམས།།

གླིང་འདི་ཡི་སྣང་བ་ནུབ་སོང་ངོ་།།

༢༠༡༩ ༡༠ ༡༩ དགོང་མོ་གློ་བུར་བས་དོན་རྐྱེན་དེས་ང་ཡང་གློ་བུར་དུ་བསྒུལ།

ཧ་ཅང་སྐྱོ་བའི་མགུར།

ཁ་ཏྭའི་སྐད་ལ་འཁུ་བ་ཡི།།

གཏམ་ངན་རྣ་བར་ལྷུང་བའི་ཚེ།།

འདི་ན་མཆི་མའི་འབབ་རྒྱུན་ནི།།

རྫ་ཆུ་སྔོན་མོའི་གཞུང་དུ་འདྲེས།།

གང་སྐུ་གཤེགས་པའི་སྙིང་གི་ནད།།

ཚིག་གིས་མཚོན་པར་མི་ནུས་མོད།།

གང་ཞལ་དྲན་པའི་གདུང་བ་ནི།།

སྨྲ་བའི་སྒོ་ལས་དབང་མེད་འཆོར།།

བར་ཆད་སློབ་འབངས་སྤྱི་མཐུན་ལས།།

དེ་ལ་བཟློག་ཐབས་ཅི་ཞིག་མཆིས།།

དེ་བས་ཚེ་རབས་རྗེས་འཛིན་གྱི།།

གདུང་དབྱངས་གསོལ་བ་དྲག་ཏུ་གདབ།།

འོན་ཏེ་འགའ་རེས་དགའ་བའི་གཏམ།།

ཚིག་གི་མཚོན་ཆ་སྙིང་ལ་འདེབས།།

ཀྱེ་མ་མི་སེམས་རྡོ་ཡི་འཁྱག།

འདི་འདྲ་མཐོང་ཚེ་ལྷག་ཏུ་སྐྱོ།།

འདི་ཀོ་བྱིས་པའི་ངང་ཚུལ་ལས།།

མཐོང་རྒྱ་ལེགས་པས་མ་ཡིན་མོད།།

ད་དུང་རང་ཉིད་མཁས་མདོག་གིས།།

བླུན་པོར་བརྫུས་འདི་སྙིང་རེ་རྗེ།།

གསུང་གི་བདུད་རྩི་རེག་མྱོང་ཞིང་།།

ཞལ་གྱི་སློབ་བུར་གྱུར་མྱོང་བའི།།

མི་རྣམས་སྐྱོ་བ་ལོས་ཆེ་སྟེ།།

གཟུར་གནས་མཁས་པའང་གདུང་བས་མནར།།

འདི་ན་ཐམས་ཅད་སྨྲེང་སྐྱོས་གཟིར།།

སྙིང་གི་ན་ཚ་བརྗོད་མི་ལངས།།

བདག་གིས་དེ་དག་མཐོང་བ་ན།།

ཡ་ཁོག་མཆི་མས་ཡང་ཡང་སྦང་།།

༢༠༡༩ ༡༠ ༢༠ ཉིན།