ཁ་བྱང་གཅིག་པའི་མཉམ་བྲིས་རྗེས་དྲན་རྩོམ

ཁ་བྱང་གཅིག་པའི་མཉམ་བྲིས་རྗེས་དྲན་རྩོམ།

ནམ་ཡང་གཟིམ་པ་མེད་པའི་སྒྲོན་མེ་སེར་བོ།

གྲུ་བ།

བརྩེ་ཆེན་ཐུགས་རྗེ་ཆེན་པོའི་ཀྱོ་བ་ཡིས།།

འགྲོ་ཀུན་མི་རྟག་སྡུག་བསྔལ་རྒྱ་མཚོ་ལས།།

འདྲེན་པའི་སྤྱན་རས་སྐད་ཅིག་མི་གཡོ་བ།།

སྐྱབས་མགོན་དོན་གྱི་བདག་པོར་སྙིང་ནས་གུས།།

འཇ༵མ་དཔ༵ལ་ཐུགས་རྗེའི་འོ་མཚོ་བསྲུབས་པ་ལས།།

ལེགས་པར་འཁྲུངས་པ་བློ་༵གསལ་བྱེ་བའི་གཉེན།།

རྨོངས་མུན་མཐའ་རུ་སྐྲོད་པའི་ཤེས༵་རབ་མཛོད།།

བཤེས་ཁྱེད་དྲན་པའི་གདུང་བ་སྙིང་ལ་ལྕི།།

འཕགས་ཡུལ་མཁས་མང་བྱེ་བའི་མདུན་ས་ནས།།

ལེགས་བཤད་རིན་ཆེན་འཕྲེང་བས་མགུལ་བརྒྱན་ཏེ།།

འཆད་རྩོད་རྩོམ་པའི་གཏེར་འཆིང་དམ་པའི་བཤེས།།

ཁ་བའི་ལྗོངས་སུ་དགྱེས་ཞལ་མངོན་པའི་ཚེ།།

འདི་ན་གངས་རིའི་ཕྲེང་བ་ཚར་དུ་དངར།།

ཁ་བའི་འདབ་མ་དཀར་ཞིང་གཙང་མོད་དེ།།

རྨོངས་པའི་མུན་པ་སྟུག་པོའི་ཡོལ་བ་ཡིས།།

བདེན་པའི་དེ་ཉིད་མཐོང་ལ་ཆེས་ཆེར་རིང་།།

ཆོས་དང་ཆོས་མིན་དབྱེ་བའི་བློ་མིག་ལྡོངས།།

ཐོ་ཅོའི་སྤྱོད་པས་འཇིག་རྟེན་རྣམ་པར་དཀྲུག།

ཡང་དག་རིག་པའི་གནས་ལ་མུན་པ་རུབ།།

རྨོངས་པའི་དད་པ་སྤེལ་ལ་ནམ་མཁའ་ལངས།།

སྐྱ་མིན་སེར་མིན་ཕུང་བོ་གསུམ་པ་འགས།།

གཞས་ཚིག་རེ་ཡིས་མཁས་པའི་སྒྲོབ་ཉམས་སྟོན།།

རང་ལ་ལྟ་བའི་བློ་མིག་རུབ་ན་ཡང་།།

གཞན་ལ་བསླབ་བྱའི་ལྕེ་ཡི་ཟློས་གར་མྱུར།།

སྐབས་རེར་གོ་རྟོགས་སད་པའི་སྟངས་ཀ་དང་།།

ལན་རེར་གཞན་རྐུབ་ལྡག་པའི་སྦྱོར་བ་ཡིས།།

རང་གི་ཁ་ཕོར་ཅུང་ཟད་བརྟན་པ་ལ།།

ཅི་ཡང་སྒྲུབ་པའི་ཟློས་གར་ཅིར་ཡང་མཐོང་།།

དེ་འདྲའི་དུས་སུ་ཐུགས་རྗེའི་གཏེར་ཆེན་ཁྱེད།།

བྱམས་དང་བརྩེ་བས་ཉེ་བར་བསྐྱོད་པ་ཡིས།།

འགྲོ་བློའི་རྨོངས་པ་སེལ་བའི་ཁུར་བསྣམས་ནས།།

ཤེས་བྱའི་མཛོད་ཀྱི་སྒོ་འཕར་ཡངས་པོར་ཕྱེས།།

སྡེ་སྣོད་གསུམ་ལ་མཁྱེན་པ་ནམ་མཁའི་མཐོངས།།

བསླབ་གསུམ་གཙང་མའི་དྲི་བཟང་ཙན་དན་ལྗོན།།

རིགས་ཀྱི་ཞེན་པ་དཀར་བོ་དུང་གི་སྤུན།།

ཀུན་འདུས་དཔགས་བསམ་ལྗོན་པའི་དབང་བོ་ལགས།།

ཉིད་ཀྱི་འཕྲིན་ལས་འོད་བརྒྱ་འགྱེད་པ་རུ།།

དམ་པ་དགྱེས་པའི་མཆོད་སྤྲིན་དཔག་མེད་ཀྱང་།།

མི་ཤེས་རྨོངས་པའི་མིག་ལ་ཤོང་དཀའ་བས།།

སྒྲོ་སྐུར་ཕྱོགས་སུ་ལྷུང་ལ་ཡུས་ཀྱིས་ཅི།།

དོན་གྱི་བདག་པོའི་འཁྲུལ་བྲལ་ཐུགས་ཀྱི་བཅུད།།

ལྗོངས་འདིར་ཅི་དགར་སྩོལ་བའི་སྐབས་ཤིག་ལ།།

སྐུ་ཚེ་བཏང་བའི་གཏམ་ངན་གནམ་ལྕགས་མདས།།

སྙིང་གི་འདབ་ལོ་ཚལ་བ་ཚལ་བུར་གཏོར།།

རི་བོ་དག་ཀྱང་ན་བུན་མོག་པོས་བཏུམ།།

ལྷུང་ལྷུང་འབབ་པའི་ཆུ་མོས་གཅོང་སྐད་འབྱིན།།

བྱེ་འུའི་མགྲིན་པ་གཉོམ་ཞིང་འཕུར་རྩལ་ཞན།།

ཡུལ་འདིའི་སྣོད་བཅུད་གཉིས་ཀ་ཏབ་ཅིག་བརྒྱལ།།

རིགས་ཀྱི་འདུ་ཤེས་ཅན་དག་རིམ་ཀྱིས་འདས།།

ངོ་དགའ་སྤྲེལ་ལད་མཁན་ནི་ཉིན་བཞིན་འཕེལ།།

དུས་ཀྱི་གཉན་འཕྲང་འདི་ལ་ཁྱེད་ཀྱང་ཕེབས།།

ཁ་བའི་མདུན་ལྗོངས་ཁ་དོག་ནག་པ་ལ།།

བསྟན་པ་ཤེས་ནས་འཛིན་པའི་དམ་པ་ཁྱེད།།

ཉེས་སྐྱོན་གསོང་བོར་སྨྲ་བའི་མེ་ལོང་ཁྱེད།།

ཆོས་དང་རིགས་ལ་སྙིང་ནས་གཅེས་པ་ཁྱེད།།

འདི་ལྟར་བཞུད་པ་སུ་ཡིས་དྲན་པར་ཕོད།།

སྐྱེ་བོ་མང་དག་གསོན་ཡང་སྔར་ནས་ཤི།།

ཁྱེད་ཉིད་ཞིང་ལ་གཤེགས་ཀྱང་སྔར་བཞིན་བཞུགས།།

བདེ་ནས་བདེ་བར་བཞུད་པའི་བཤུལ་ལམ་ན།།

ཤེས་རབ་སྣང་བའི་གཟི་མདངས་འོད་དུ་འཚེར།།

༢༠༡༩ ༡༡ ༥ ཉིན།

ནམ་ཡང་གཟིམ་པ་མེད་པའི་སྒྲོན་མེ་སེར་བོ།

སྐར་མ་ཨ་བརྟན།

འཕགས་ཡུལ་མཁས་པ་ཡོངས་ཀྱི་གཙུག་གི་རྒྱན།།

ང་ཅག་བུ་སློབ་སྟོང་གི་སེམས་ཀྱི་འོད།།

སྐར་མདའ་བཞིན་དུ་གློ་བུར་གཤེགས་པ་དེས།།

བརྣག་པར་དཀའ་བའི་ན་ཟུག་ཡིད་ལ་བཞག།

དོ་ནུབ་ལྷིང་འཇགས་མུན་པས་ཁོར་ཡུག་ཟ།།

སྙིང་ལ་བབ་པའི་མུན་པ་དེ་བས་སྟུག།

ད་ནི་མུན་ཁྲོད་འཚོ་བ་བསྐྱལ་དགོས་ཕྱིར།།

སྐྱོ་བ་བརྩེགས་མས་སེམས་ཀྱི་ཕྱི་ནང་ཕུག།

དྲི་མེད་ཆོས་རིག་དྲི་ཡིས་བསླད་པའི་སྐབས།།

ལོག་སྨྲའི་ཁ་ལ་རྡོ་རྗེའི་རྒྱ་ཡང་བྱིན།།

མདོ་དང་སྔགས་ཀྱི་ཆོས་ཚུལ་མ་ལུས་པ།།

ཇི་བཞིན་འགྲེལ་བའི་བདག་གི་བཤེས་ཁྱོད་དྲན།།

རྩོད་པའི་མཆེ་སྡེར་རྐྱོང་ལ་མངའ་བརྙེས་པ།།

དྲེགས་པའི་ཁེངས་པ་མཐོ་བའི་སེང་ཆེན་དག།

གང་གི་ཐལ་ངག་གཅིག་གིས་བག་ལ་ཞ།།

དུས་ཀྱི་ཉི་མ་ཆེན་པོ་ཁྱེད་ཁོ་ན།།

ཤེར་ཕྱིན་གཞུང་ལས་དཀའ་གནད་མདུད་པའི་རྒྱ།།

དགྲོལ་ལ་མི་འཇིགས་སྤོབས་པའི་གདེངས་ཐོབ་པ།།

ལུང་རིགས་འབུམ་གྱི་སྒོ་མོ་འབྱེད་པའི་གཉེན།།

སྨྲ་བའི་སྐྱེས་མཆོག་ཁྱེད་ཉིད་ཡང་གཅིག་དྲན།།

ངོ་མཚར་ལེགས་བཤད་རིན་ཆེན་ནོར་བུའི་གཏེར།།

གངས་ལྗོངས་ཕྱི་རབས་གཞོན་ནུར་སྐྱེས་སུ་བཞག།

བོད་ཡུལ་མཁས་གྲུབ་དབུས་ན་ལྷམ་མེར་མངོན།།

དུས་ཀྱི་མཐའ་འདིར་བཙུན་པའི་དཔུང་རྒྱན་ཁྱེད།།

བདག་ཅག་དགེ་སློབ་སྟོང་གི་གྲལ་དབུས་སུ།།

གངས་ཀྱི་སེང་གེ་ལྟ་བུ་ཁྱེད་བཞུགས་པས།།

ཉིད་ཀྱི་གཟི་བརྗིད་ཁོ་ན་ང་རྒྱལ་དུ།།

རློམ་སྟེ་ངེད་ཅག་ཁེངས་པས་བཟི་བའང་མང་།།

གང་གི་ཤུལ་བཞག་ཤེས་རབ་རིན་ཆེན་ནོར།།

གཏན་དུ་ནུབ་འགྲོའི་དོགས་པ་བདག་ལ་མེད།།

འོན་ཀྱང་ཞལ་མཇལ་གསུང་ཐོས་བྱེད་པའི་དུས།།

ད་ནི་མེད་དོ་སྙམ་ཚེ་སྐྱོ་བ་བྱུང་།།

ཆོལ་གསུམ་ཡུལ་ལས་འདུས་པའི་བུ་སློབ་དག།

སྐྱོང་ཕྱིར་ཐུགས་ངལ་གསོ་ཁོམ་མ་བྱུང་བར།།

སྐུ་ལ་སྙུན་གཞི་དྲག་པོས་ཟིན་པ་དེ།།

ཐོས་པའི་མོད་ལ་བདག་ཡིད་རབ་ཏུ་ནོངས།།

ས་ཆེན་བསོད་ནམས་དམན་པས་གང་གི་དཔལ།།

མ་ཐེག་གླིང་འདི་རེ་ཞིག་མུན་པས་བསྒྲིབས།།

ཡིན་ཡང་གསེར་གྱིས་བྲིས་པའི་མཛད་འཕྲིན་ནི།།

བསུབ་ཏུ་མེད་པའི་ལོ་རྒྱུས་རྡོ་རིང་ཞིག།

༢༠༡༩ ༡༡ ༦ ཉིན།