དྲན་མགུར་གྱི་རླུང་བུ། (མུ་འབྲེལ་སྙན་ངག )

ཁམས་པ་རབ་དབྱངས། (རྫ་སྟོད།)

སྙན་ངག་དྲན་མགུར་སོ་མ་འདི། །

ཚིག་རྒྱན་སིལ་མའི་སྒྲ་དབྱངས་ཡིན། །

སྤྲོས་པའི་ཚིག་གི་རིག་བྱེད་དག །

མུན་པ་རུབ་དུས་མཐོང་བ་མེད། །

སྙན་ཚིག་ལོ་མ་སྤར་གང་འདི། །

ཚེ་མཇུག་སྣང་བའི་ཉེར་བསྡོག་ཡིན། །

དགའ་དང་སྐྱོ་བའི་འདུ་བྱེད་ཀྱིས། །

མིག་གིས་བལྟ་པར་གྲངས་མི་ལངས། །

གངས་རི་དབུ་ཐོད་ཤེལ་གྱི་རི། །

ཤེལ་ལ་ཉི་རྩེ་རྒྱབ་རྗེས་སུ། །

རྩྭ་མགོ་ཟིལ་བའི་ཁ་རླངས་ཡང་། །

སྨུག་རླུང་བཞིན་དུ་གནམ་ལ་ལངས། །

དྲན་པ་མཚོ་ཡི་གཏིང་རིམ་ནས། །

མིག་ཆུ་སྦར་མོ་གང་རེ་གཏོར། །

སེམས་ཀྱི་སྣང་བ་བྱིལ་བྱིལ་དག །

ཁྱེད་ཀྱི་ལུས་སྟེང་མི་ཤོང་ངམ། །

མི་ནི་དར་ལྕོག་ངོས་ཤིག་སྟེ། །

གང་དུ་གཡོ་བ་མ་ངེས་པས། །

འཚོ་བ་ཉམས་སྣང་ཤོར་རྗེས་སུ། །

སྲིད་པའི་ཐང་ཆེན་གཡུལ་ས་ཡིན། །

སེམས་འདི་དབྱར་གྱི་གནམ་ངོ་སྟེ། །

དགའ་སྡུག་སྣང་བ་ཁོལ་ཁོལ་བྱེད། །

དྲན་ཚུལ་གཉེར་མའི་ཕུང་པོ་འདི། །

རླུང་གི་མཚོ་གྲུ་གཏང་བ་འདྲ། །

ད་ཞག་ཉི་མ་རྒྱང་ཤར་ནི། །

ཚེ་དྲོད་ལུས་སྟེང་མི་གཡོ་བ། །

སེམས་ལ་འཁྱག་སྣང་བྱུང་རྗེས་སུ། །

ཉི་ཟེར་མཐོང་ན་སེམས་འདར་བྱེད། །

སེམས་ཀྱི་གཙང་པོ་བརྒལ་རྗེས་སུ། །

གཙང་འགྲམ་མེ་ཏོག་སྤར་གང་བཏུས། །

གཙང་པོའི་གཡུ་ཆུང་མེ་ཏོག་ལ། །

རྐང་ཅིག་ཕུལ་བ་མ་རག་སོང་། །

དྲན་པ་མང་བའི་དགུན་གཞུག་དེར། །

དྲན་སེམས་ངག་གི་སྨྲེང་བ་འཐོར། །

དྲོད་སྣང་བོར་བའི་མི་སེམས་ལ། །

ཁྱེད་ཀྱི་སེམས་དྲོད་མཐོང་མི་ནུས། །

སྐྱེ་བ་ད་རེས་ལུས་སྟེང་ལ། །

སྐྱོ་སྣང་རི་རབ་སྐྱ་མོ་འདི། །

ང་ཡི་ལུས་སྟེང་བབ་རྗེས་སུ། །

ཁྱེད་ལ་ཅི་ཞིག་སྣང་བ་བྱུང་། །

ཉིན་མཚན་གཉིས་ཀྱི་སྲིབ་ངོགས་ཏུ། །

ང་ནི་དགུན་གྱི་སྡོང་ལོ་ལྟར། །

ས་རྡུལ་འོག་ནས་གནས་པའི་ཚེ། །

ཤར་གྱི་རླུང་གི་ཁུར་རན་འདུག །

སྙན་ངག་རླབས་ཀྱི་ཚོར་འདུ་དག །

ཁྱེད་ལ་བྲིས་པ་མང་ཀྱང་རུང་། །

མི་སེམས་འཁྱག་རིམ་འདྲ་བོ་འདིའི། །

སྨྲེང་བའི་ངག་ཁྱལ་སུ་ལ་སྨྲ། །

སེམས་ཀྱི་སྤྲོས་པ་ཇེ་དལ་རེད། །

དྲན་པའི་བསྡུས་བརྗོད་ཆུ་རུ་ཁུར། །

དྲན་སེམས་སྤྲིན་དཀར་འདྲ་བོ་འདི། །

མི་ཚེའི་འགྱུར་བ་ཡིན་པ་འདྲ། །

ཉི་རྩེ་རི་ལ་རྒྱབ་རྗེས་སུ། །

སེམས་ཀྱི་དྲོད་སྣང་འོང་གིན་འདུག །

ས་སྲོད་གྲིབ་མ་གཡོལ་རྗེས་སུ། །

འཚོ་བའི་ཉམས་སྣང་ཁྱེད་ལ་ཤོར། །

ཕ་མ་དྲན་པའི་གླུ་ཆུང་འདི། །

སེམས་ཀྱི་གདུང་བ་མ་གཟོད་ཐལ། །

རྒྱང་རིང་ཡུལ་གྱི་སྒང་ཁ་ནས། །

འཕྲིན་ལམ་ནང་ནས་སྐད་ཅིག་གཏང་། །

དབྱར་དགུན་འགྲོས་ཀྱི་མི་ཚེ་འདི། །

འདི་ལྟར་ལུས་སྟེང་མངོན་རྗེས་སུ། །

བྱིས་པའི་དུས་ཀྱི་ཟློས་གར་དག །

སྒྲུང་རིང་ཞིག་གིས་བསྡུས་བརྗོད་འདུག །