ང་ཚོས་མཛེས་སྡུག་གི་སང་ཉིན་བསུ་ཐུབ་པར་སྨོན།

ཆང་གཞོན་ནུ། [མཚོ་ལྷོ]

ནད་ཡམས་ཀྱི་དྲག་རླུང་མཐོ་སྒང་དུ་མཆེད་པ་ནས་བཟུང་།

ང་ཚོས་གཞན་གྱི་འཇབ་རྒྱུག་ལ་བསྒུགས་འདུག་པ་འདྲ།

ངའི་སེམས་པར་བདེ་ཐབས་བྲལ་བའི་བྲེད་ཤ་ལངས་བྱུང་།

འཆི་བདག་གི་ཞགས་པ་ང་ཚོའི་སྐེ་ལ་བསྐོན་པ་འདྲ།

འཆི་བ་ང་ཚོ་དང་ཉེ་བར་བཅར་བས།

ང་ལ་འཇིགས་དངངས་སྐྱེས་བྱུང་།

དེ་དང་ལྷན་དུ་དོགས་ཟོན་གྱི་སྟ་གོན་བྱས།

རིགས་མཐུན་གྱི་སྤུན་ཟླ་སྡུག་གི་རྒྱ་མཚོར་ལྷུང་།

ངས་སྨྲེ་ངག་དང་ཆོ་ངེ་བཏོན་ཡང་ཕན་པ་ཅི་ཡོད།

ཁྱེད་ཅག་ལ་བཅངས་པའི་གདུང་སེམས་མཚོན་བྱེད་ཙམ་ལས།

ངས་རྒྱང་རིང་རྒྱང་རིང་འདི་ནས།

ཁྱེད་ཀྱི་དོན་དུ་གསོལ་འདེབས་དང་སྨོན་ལམ་ཙམ་ལས།

ཅི་ཡང་མ་ནུས་སོ། །

ཅི་ཡང་མ་ནུས་པའི་སྡུག་བསྔལ་ཞིག་གིས་ཡོངས་སུ་གཙེས་པས།

རང་ཉིད་ལ་སྡང་སེམས་དྲག་ཏུ་སྐྱེས།

དོ་ནུབ། ཁྱེད་ཅག་ཁོ་ན་དྲན་ཡོད།

རིགས་མཐུན་གྱི་ཕུ་ནུ།

ངའི་མིག་ལམ་དུ།

ཆ་ཡོད་འདྲ་ལ་ཆ་མེད་འདྲ་བའི་ངོ་གདོང་དག་མངོན་བྱུང་།

ངས་མཉམ་འཇོག་བྱས་པའི་ཚེ།

ངོ་གདོང་དེ་དག་ང་དང་ཤིན་ཏུ་མཚུངས་པ་ཚོར།

འོན་ཀྱང་། ངས་ངོ་གདོང་དེ་དག་ལས།

འཛུམ་མདངས་དང་སྤྲོ་སྣང་མ་མཐོང་།

དེ་ཡང་ལོས་ཡིན་ཏེ།

འཆི་བདག་གི་ལག་པ་ལྟ་བུའི་ནད་ཡམས་ཀྱི་མདུན་དུ།

སུ་ཞིག་གིས་སྤྲོ་དགའི་འཛུམ་མདངས་མངོན་ཐུབ།

ཡིན་ནའང་།

ཤིན་ཏུ་མི་བདེ་བའི་དུས་སྐབས་འདིར།

ང་ཚོས་ཆེས་མཐའ་མཇུག་གི་ཚེ་སྲོག་རྟ་རྔ་འདྲ་བོར་ཡང་།

ཡིད་ཆེས་དང་རྒྱུན་འཁྱོངས་མ་ལྷོད་པར།

དབུགས་དབྱུང་ཐོབ་ཏུ་འཇུག་དགོས།

ང་ཚོས་རང་ཉིད་ལ་བགྲོད་ལམ་བསྐྲུན་ཏེ།

རེ་ཐག་དང་ཡི་ཐང་མི་ཆད་པར།

མཚར་སྡུག་གི་སང་ཉིན་བསུ་དགོས།

ཁྱེད་ཀྱི་སྙིང་སྤོབས་བག་ལ་མ་ཞ་ཨང་།

ཁྱེད་ཀྱི་དཔའ་གདེང་ཞུམ་པར་མ་བྱེད་ཨང་།

སྙིང་ཉེ་བའི་ཁྱེད་ཅག

ང་ཚོས་མཛེས་སྡུག་གི་སང་ཉིན་བསུ་ཐུབ་པར་སྨོན།