ང་ཡི་གཙང་འགྲམ་གྱི་མེ་ཏོག

ཡོང་ཁུངས། : ཁམས་པའི་སློབ་ཁྲིད་ཐོན་ཁུངས་དྲ་བ། རྩོམ་པ་པོ། : ཇེང་། ཀློག་གྲངས །: སྤེལ་དུས། : 2020-02-24

ཇེང་།

ཚིག་གི་རོལ་རྩེད་ཀྱིས་བསླས་པའི་དབྱངས་དང་གསལ་བྱེད།

ལག་པའི་མཐིལ་གྱི་ཞེ་འདང་གི་ཐ་སྙད་དེ་ཚོ།

སྟག་མོའི་འཛུམ་ཀོང་གི་གདོང་ལ་ལྷུང་བའི་མེ་ཏོག

ཉི་ནུབ་འཆར་ཡན་གྱི་རྒྱུ་བའི་མཁར་རྫོང་སྟུག་པོ།

ཞེ་ལ་བརླན་པའི་བག་ཆགས་ཀྱི་རི་མོའི་རྐང་ཡིན།

འཁྲེང་སེམས་ཀྱི་དྲུག་འགྱུར་གདངས་ལ་ཆགས་པའི།

སྒེའུ་ཁུང་འགྲམ་གྱི་ཚངས་མགུར་གྱི་རོལ་དབྱངས།

མགྲིན་པའི་གསེང་ནས་སྙན་སྙན་གྱི་སྙིང་པོ་ཁྱོད་ཀྱིས་སིམ།

དྲན་སྙིང་གི་མཁའ་རུ་ཚེས་པའི་འཛུམ་གྱི་ཟླ་བ།

མིག་མདངས་ཀྱི་རྒྱབ་གཟུགས་འཚོལ་བའི་སྙིང་གི་ཚི་ལུ།

ཚེ་རབས་འདིར་བརྟན་ཅིང་བརྗིད་པའི་མགུལ་གྱི་བླ་གཡུ།

དྲན་གདུང་གི་ཁ་བ་དེ་ཚོས་དགུན་གཞུང་མཛེས་པར་བྱས།

རྒྱ་མཚོའི་གཏིང་དུ་ཟུག་པའི་གཏམ་རྒྱུད་ཀྱིས་བཞེངས་བའི་ཡིག་འབྲུ།

ལོ་ཟླའི་བྲང་གཞུང་ནས་རླབས་ཀྱིས་སྐྱོམ་པའི་ངག་སྒྲོས་ཀྱི་དབྱ༵ངས།

སེམས་ཀྱི་ལྗོན་པའི་ཚལ་དུ་ཡིད་འོང་གི་འདབ་ལོ་སྨིན་བཞིན་འདུག

ཆར་འབྲུ་བསིལ་མོ་རེ་བྱོ་ནས་དབྱར་གྱི་མཛེས་སྡུག་མངོན་འདུག

ང་ཡི་ལོ་ཟླའི་དྲན་གདུང་གི་རྟ་ཕོ་རྔོག་རིང་།

ཚོར་བའི་ཡིག་འབྲུ་རབ་མེད་དེ་ཁྱོད་ཀྱི་ཕྱོགས་སུ་བཞུར།

2020 2 14

རྩོམ་སྒྲིག་པ། : lalong1985