བར་སྐོར་གླིང་གི་ཨ་ཅག་ལགས།

------- སྦྲང་བུ

བར་སྐོར་ནང་ནས་ང་ཡི་མིག་དབང་འཕྲོག།
ལ་གཞས་བླངས་ཤིང་གདོང་ཐུག་དེ་ནས་རྒྱག།
ཚངས་མགུར་བླངས་ཤིང་བསྐོར་བ་ལན་གསུམ་རྒྱག།
ཁེར་བཞུད་མགྲོན་པོ་ལྷ་སའི་ཡུལ་ལ་ཆགས།།
སྐར་ཚོགས་ཀློང་ནས་སྐར་མ་སྨིན་དྲུག་མཇལ།།
ཟླ་བའི་འགྲམ་ནས་ལེགས་ལྡན་མ་ཞིག་རྨིས།།
རྟོག་ཚོགས་རི་མོ་ཡར་ངོས་ཟླ་ལྟར་འཕེལ།།
ཨེ་མ་རྨད་ཅིང་དཀྱིལ་འཁོར་བཞིན་རས་མ།།
བར་སྐོར་ནང་ནས་རྨི་ལམ་ལན་གསུམ་འཇགས།།
གཡུ་ཡིས་བཟོས་པའི་སྣང་བའི་ཕོ་བྲང་ནང་།།
གཤོག་པ་ཐོགས་པའི་ནང་སེམས་འཇག་མ་གཅིག།
བར་སྐོར་གླིང་གི་སྙན་ངག་པ་ཞིག་ལ།།
ཚིག་གིས་བཞེངས་པའི་གཡུ་ཡི་ལྷ་ཁང་ནང་།།
ཚངས་མགུར་པོད་གཅིག་ཁྱོད་ལ་འབྲི་ཀྱིན་ཡོད།།
རྟིང་མའི་ཟླ་བའི་དཀྱིལ་གྱི་མཚན་མོ་ལ།།
ཡིད་དགའ་གླིང་བུ་འབུད་ཅིང་ཁྱོད་ལ་ཕུལ།།
གཡའ་དག་དྲི་མ་དབེན་པའི་ནང་སེམས་སུ།།
མཛེས་སྡུག་ལྷང་ངེར་འཁྲུངས་བའི་ཡིད་སེམས་དགྱེས།།

མཚན་གྱི་སྨག་རུམ་ཁྲོད་ནས་ཀི་ཞིག་བཏབ།།
བྱམས་པའི་སྐུ་ངལ་སོས་པའི་གཞས་ཤིག་བླངས།།
ང་ཡི་གྲིབ་གཟུགས་ཕོག་པའི་བར་སྐོར་དུ།།
ཁྱོད་ལ་དུང་བའི་མཛའ་གཞས་ལྷག་རོ་འདི།།
ཁྲུང་ཁྲུང་འཕུར་སའི་གཤོག་རྩེ་ལ་འཐམས་ཏེ།།
བར་སྐོར་གླིང་དུ་སྙན་ངག་སླར་ཡང་གྱེར།།
ནུབ་མཐའི་ཉི་མ་རྒྱ་ཕིབས་རྩེ་ནས་བཞུར།།
ཉི་འོད་ཕོག་སའི་ཕོ་བྲང་ཉམས་ཤིང་བརྗིད།