རྟའུ་གྲོགས་པོ། ཞོགས་པའི་རྩྭ་ཐང་སྟེང་དུ་ཤོག

སྦྲང་བུ

ཟླ་འོད་བསིལ་མའི་ངོགས་སུ་བྱོན་སོང་།།
སྐར་མ་ལྗོན་པའི་རྩེ་ནས་ཤར་བྱུང་།།
ནང་སེམས་གཡའ་ཞིང་དྭངས་བའི་དུས་དེར།།
རང་བཞིན་འཁྱག་པ་ཞིག་ཏུ་འགྱུར་སོང་།།

སྐྱ་རེངས་གསལ་ཐག་བྲལ་བའི་ནམ་མཁའ།།
ཁེར་རྐྱང་གླུ་རུ་མགུར་བའི་གཞས་པ།།
རྟོག་ཚོགས་རྨི་ལམ་དཀྲུགས་པའི་མཚན་གཞུང་།།
ཐམས་ཅད་རླུང་ལྟར་ཡང་བའི་སེམས་པ།།

ང་ལ་གཟིགས་ཙམ་གནང་དང་ལྷ་ཚོགས།།
ཡངས་ཤིང་ཁད་ཅིང་སྙོམས་པའི་ཁྱེད་རང་།།
དུར་སའི་སྨོན་ལམ་གྲང་བའི་ནམ་མཁའ།།
སྤྲིན་པས་འོད་ཟེར་གཡོགས་པའི་ཉིན་མོ།།

སྐྱོ་གར་གངས་སུ་འཐིམས་པའི་དུས་ཚོད།།
ཐ་སྙད་དལ་གྱིས་སླེབས་པའི་གཞིས་ཀ།
སྨྲེང་བས་ལ་གཞས་བཀུག་པའི་ཞིང་ས།།
སྙན་ངག་རྟོག་ཚོགས་འཁྲུངས་བའི་ནགས་ཚལ།།

བརྡ་ཡི་རི་དྭགས་འཚུབ་པའི་གྲོང་ཚོ།།
ཁྱེད་ཀྱི་སྤོབས་པ་བརླབས་པའི་ལྷ་ཚོགས།།
ང་ཡི་སྙན་ངག་འབུས་པའི་སྦྲུམ་མ།།
ཁྱེད་ལ་མེ་ཏོག་བཤམས་པའི་དུར་ཁྲོད།།

གོས་དཀར་ལྷ་ཚོགས་འདུལ་བའི་རྟའུ།།
སྙན་ངག་ལྷ་མོ་དྲངས་བའི་དུར་ས།།
ང་ཡི་སྙན་ངག་འཁྲུངས་སའི་རྟའུ།།
ཁྱེད་ལ་འབུལ་ཆོག་ཁྱེད་རང་འབྲི་ཆོག།

འདི་རུ་ཤོག་དང་རྟའུ་གྲོགས་པོ།།
ཞོགས་པའི་རྩྭ་ཐང་ཁད་སྙོམས་ཅན་དུ།།
མཁའ་རླུང་མེ་ཏོག་ཞལ་གྱིས་ཕྱེས་དང་།།
ཕྲ་ཕུང་ཚོགས་ལ་བདུད་རྩི་གཏོར་ངེས།།

བགེགས་དང་སྡིག་སྒྲིབ་གས་ཆག་ཤོར་སྲིད།།

སྙན་ངག་ལྷ་མོ་འདི་རུ་དྲངས་ཏེ།།

སྐྱོ་གར་པོ་ཏི་ཆུ་རུ་བསྐུར་ཏེ།།

སྨྲེང་བའི་མཚོ་མོ་སྐམ་དུ་བཅུག་སྟེ།།

རྟའུ་གྲོགས་པོའི་དངན་པ་རིང་མོ།།

གཙང་བོ་ཞིག་གི་མཐའ་རུ་བཏགས་ཏེ།།

སྐྱོ་གར་བོར་བའི་སེམས་པ་བཙལ་ཡོང་།།

རྟའུ་གྲོགས་པོ་སེམས་པ་མ་སྐྱོ།།