རྟའུ།

རུས་པ།

ཚེ་རིང་བཀྲ་ཤིས། པིར་མིང་ལ་རུས་པ། མཚོ་ལྷོ་མང་རྫོང་བྱ་མདོ་ཆོས་ཚ་སྡེ་བ་རུ་སྐྱེས། མཚོ་སྔོན་ཞིང་ཆེན་རྩོམ་པ་པོའི་མཐུན་ཚོགས་ཀྱི་ཚོགས་མི། ད་ལྟ་མཚོ་སྔོན་རྒྱང་སྒྲོག་བརྙན་འཕྲིན་ཁང་བོད་སྐད་རླུང་འཕྲིན་དུ་བྱ་བ་སྒྲུབ་བཞིན་མཆིས། ལས་ཞོར་དུ་གསར་རྩོམ་བྱས་པའི་རླུང་འཕྲིན་འཁྲབ་གཞུང《པ་སངས་ཀྱི་རྨི་ལམ》དང《གསར་འགོད་པ་ཞིག་གི་ཉིན་བཅུའི་ཟིན་ཐོ》《གྲོང་ཁྱེར་གྱི་འཚོ་བ》《རྒྱང་རིང་གི་ཉི་མ་སྡེ་བ》བཅས་རླུང་འཕྲིན་འཁྲབ་གཞུང་ལྔ་ལ་རྒྱལ་ཡོངས་བོད་སྐད་རྒྱང་སྒྲོག་བརྙན་འཕྲིན་རིག་རྩལ་ལེ་ཚན་བརྗེ་རེས་སྟེང་སོ་སོར་བྱ་དགའི་འབྲས་བཟང་ཐོབ་མྱོང་། འཐུས་ཚབ་དུ་འོས་པའི་སྙན་ངག་ལ། 《མཐའ་མཇུག་གི་རྩྭ་ཐང་དང་དེའི་རྫི་བོ》《བུ་ལ་གནང་བའི་སྙན་ངག》《བདེ་བློན་བང་སོར་མཇལ་བ》《འཕྱོངས་རྒྱས་ཟླ་བ་སྒྲོལ་མ》 སོགས་ལས་གཞན། གཞས་ཚིག་བརྩམས་ཆོས་ལའང 《ཧི་མ་ལ་ཡའི་སྲས་མོ》 སོགས་དྲུག་ཅུར་ཉེ་བ་ལྷག་ཡོད། ༢༠༡༨ལོར་སྦྲང་ཆར་རྩོམ་སྒྲིག་ཁང་གིས་གཙོ་སྒྲིག་བྱས་པའི་སྨིན་དྲུག་དེབ་ཕྲེང་ལས༼རྡོ་ལས་བཞད་པའི་ལྷ་ས༽ཞེས་པ་པར་བསྐྲུན་འགྲེམས་སྤེལ་བྱས།

རྟའུ།

ལོ་ངོ་ཁ་ཤས་སྔོན་དུ།

དར་རྩེ་མདོ་ནས་མོ་ཏྲ་རྙིང་བ་ཞིག་ཉོས།

དེ་དུས་ཁྱེད་རང་བརྒྱུད་ནས་ཡུལ་ལ་ལོག

རི་ཆུའི་སྣོད་བཅུད་དྭངས་ཤིང་གསལ།

ནས་ཀྱི་འབྲས་བུ་ཁུར་དུ་ལྕི།

ཡུལ་མིའི་སྐུ་ཁམས་བདེ་ཞིང་ཐང་།

ཁྱེད་ཀྱང་ཆུང་ནས་འདྲིས་པའི་གངས་ལྗོངས་ཡིན་པས།

རྡོ་ཁང་གྲུ་བཞི་དག་ལ་དོ་སྣང་ཆེར་མ་བྱུང་།

གསར་འགྱུར་ལས།

མགྲིན་པ་བརྣངས་པའི་ཐ་སྙད་དག་མིད་པར་ཁེགས་ནས་ཡུན་རིང་འགོར།

མིག་ཆུ་ཁོ་ནས་ཞེ་ལ་ཐོགས་པའི་རི་མོ་འབྲི།

མིག་ཆུ་ཁོ་ནས་ཡུལ་གྱིས་བསྐལ་བའི་བར་ཐག་བསྐུམས།

ཉི་འོད་ཀྱི་གྲོང་ཚོ་ལ།

ནད་དུག་གི་སྨུག་རླངས་ག་ཙམ་འཁྱིལ།

མཆོད་རྟེན་གྱི་སྐོར་ལམ་ལ།

ནད་དུག་གི་འབག་རྡུལ་ག་ཙམ་འབབ།

བྱམས་དང་བརྩེ་བའི་ག་ཟུང་གི་མཐའ་ལ།

འདུ་འབྲལ་གྱི་གདུང་སེམས་ག་ཙམ་འཁྱིལ།

གཉིད་མི་འོང་བའི་ཉིན་དང་མཚན་ལ།

བདག་གིས་འདི་ལྟར།

ཝུའུ་ཧན་མིག་གིས་འཚོ་བཞིན་ཁྱེད་རང་ཞེ་ལ་ཐོགས་ཡོད།

དམིགས་བསལ་གྱི་དུས་འདིར།

ལས་དབང་ཞེས་པའི་ཡིག་འབྲུ་སྙིང་ལ་རྗེ་བོ་དེ།

རང་ཉིད་ཀྱི“དག་ཡིག་གསར་བསྒྲིགས”ལས་ཅིས་ཀྱང་དོར་དགོས།

ང་ཚོ་ཚན་རིག་གི་མིག་ཤེལ་གྱོན་པར་གོམས་དགོས།

ལྷ་རྗེ་ཡི་གདམས་ངག་གནང་བར་དད་དགོས།

གཙང་སྦྲའི་རྒྱུན་ཤེས་ཀྱི་བྱིན་རླབས་ལ་འཇུག་དགོས།

ཉིན་རེའི་གསར་འགྱུར་བལྟ་བར་ཡང་ཅིས་ཀྱང་མོས་དགོས།

སྟོད་ཀྱི་གངས་རི་དཀར་པོ་མ་ཞུ་ཚེ།

བར་གྱི་ནགས་རི་ཕྱུག་མོ་མ་བསྐམས་ཚེ།

སྨད་ཀྱི་གཙང་བོའི་རླབས་སྒྲ་མ་འཇགས་ཚེ།

ཁྱེད་ནི་ནམ་ཡང་ཕ་མེས་ཡང་མེས་ཀྱི་རྟའུ་དེ།

ས་ཁྲའི་སྟེང་གི་ཉག་ཆུའི་སྟོད་རྒྱུད་ཀྱི་རྟའུ་ཡིན།

སྙན་ངག་ཅིག་ལ་ཚན་རིག་གི་བདེན་པས་དབུལ་ཡང་།

སྙན་ངག་འདི་ནི་ཁྱེད་ཀྱི་མིག་ཆུ་དབྱི་བའི་ལག་པ་རློན་ནུ་ཞིག་སྟེ།

བདག་ལ་དེ་ལས་ལྷག་པའི་ནང་ནོམ་ཞིག་གཞར་ནས་མེད།

གནའ་མི་ཚོའི“སྐྱིད་ལ་འབོད་དང་སྡུག་ལ་འགྲོ”ཟེར་བའི་དཔེ་ལྟར།

དོ་ནུབ། ཁོ་བོས་མི་ཚེའི་མཛོད་ཁང་ལ་སེར་སྣ་ཏིལ་ཙམ་མེད་པར།

ཆེས་བྲིན་པའི་ལེགས་སྐྱེས་བསྣམས་ནས་ཁྱེད་རང་ཞེ་ལ་ཐོགས་བཞིན་འོང་གིན་ཡོད།

དེ་ནི་རྟའུ་ཞེས་པའི་སྙན་ངག་དེ་ཡིན་ལགས།

2020/2/11ཉིན་གྱི་ནམ་སྨད་བྲིས།

རྩོམ་སྒྲིག་པ། འབུམ་པ་རྒྱལ།