ཚེ་འཕྲོ་མའི་རེ་བ།
བསིལ་རླུང་ཟ་ཟི་གཡོ་ཞིང་།།
བྱེའུ་སྐད་ལྷང་ལྷང་གྲག་པའི།།
དབེན་གནས་སྐྱིད་པོ་དེ་རུ།།
ཁ་འདོན་གླེག་བམ་ཁྲིག་ཁྲིག།
རྡོ་རྗེའི་མགུར་དང་འགྲོག་ནས།།
རང་སེམས་ཉི་ཟླ་འདྲ་བོ།།
ཚུར་ཚུར་ཨེ་འཁོར་བལྟ་ཞོར།།
སངས་རྒྱས་དབྱེར་མེད་བླ་མ།།
ཡ་ཆུང་སྟེང་ལ་འབྲི་ནས།།
མི་རྟག་འདུས་བྱས་ཆོས་ལ།།
ངེས་འབྱུང་སྐྱེ་བའི་རེ་བ།།
སྒྱུ་མའི་རྩྭ་སྐྱ་མཐའ་དག།
གསེར་གྱི་ཟོར་བས་བྲེག་ཏེ།།
མུན་པའི་གནས་མལ་འདི་ནས།།
འོད་ཀྱི་ལམ་ཞིག་བརྙེད་ཅིང་།།
རང་ངོ་རང་ལ་འཕྲོད་དེ།།
ལྷ་ཆེན་རྒྱལ་བའི་ཞལ་ངོ་།།
འགྲོ་བསྡོད་བར་ནས་ཤར་བའི།།
རི་ལས་མཐོ་བའི་རེ་བ།།
ཕ་མ་ཉི་ཟླའི་འདྲ་བོའི།།
དཀའ་སྡུག་རྔུལ་ཆུའི་ཕྲེང་བ།།
སྐྲ་ལོ་དཀར་ནག་བར་ནས།།
ས་ལ་འཐོར་ཚུལ་བསམ་ཞིང་།།
ལུས་ཀྱི་བ་སྤུའི་གསེང་ནས།།
སྤུ་ཡི་རྡོ་རིང་ལང་ཞིང་།།
རྒྱུད་ལ་སྐྱོ་ཤས་མེ་ཏོག།
སྐྱེ་ནས་ཡམ་ཡུམ་གཉིས་ལ།།
དྲིན་ཀྱི་བུ་ལོན་འཇལ་བ།།
ཚེ་ཡི་འཕྲོ་མའི་རེ་བ།།
