རྨི་ལམ་དུ་བདག་གིས་ཁྱོད་ཀྱི་རྟ་ཁ་འཁྲིད་མྱོང་།
གྱང་ཆག•རྫ་སྟོད།
འབྱམས་ཀླས་པའི་མུན་ནག་གི་པང་དུ།
ངས་སྟོང་བསམ་ལྟ་བུའི་རྨི་ལམ་ཞིག་རྨིས་མྱོང་།
རྨི་ལམ་དུ་རྒྱ་སེའི་མེ་ཏོག་རྣམ་པར་བཀྲ་བའི་རྩྭ་ཐང་གི་སྟེང་ནས།
བདག་གིས་ཁྱོད་ཀྱི་རྟ་ཁ་འཁྲིད་མྱོང་།
རྩྭ་ཐང་ལགས། རྟ་གོང་གི་བུ་མོ་དང་བདག་གི་རྐང་རྗེས།
ཁྱོད་ཀྱི་སྙིང་ཁར་ཕབ་ཡོད། རྐང་རྗེས་རེ་རེ་ནི་སྙན་ངག་གིས་འབྲི་ཐབས་བྲལ་ཞིང་། སྒྱུ་རྩལ་གྱིས་མཚོན་ཐབས་དབེན་པའི
ངའི་ཡིད་ཀྱི་མེ་ལོང་དེའོ།
རྨི་ལམ་དུ། བདག་གིས་ཁྱོད་ཀྱི་རྟ་ཁ་འཁྲིད་མྱོང་།
རྨི་ལམ་དུ། ངས་ས་སྲོད་ཀྱི་མཚམས་སྤྲིན་བླངས་ཏེ་ཁྱོད་ལ་ཕུལ་མྱོང་།
རྨི་ལམ་དུ། འུ་གཉིས་ཀྱིས་རབ་མེད་ཀྱི་གཙང་བོ་འང་བརྒལ་མྱོང་།
ཀྱེ། རྨི་ལམ་ལགས། རྟ་གོང་བུ་མོས་ཁོ་བོར་བླངས་བའི་མཛའ་གཞས་ཐན་ཐུན། ཡང་ན་བདག་གིས་ཁོ་མོར་ཕུལ་སྙན་ངག་རློན་པ།
ཁྱེད་ཀྱི་བྲང་གཞུང་དུ་འཁྱིལ་ཡོད།
བདག་གིས་ནི་ཁྱོད་ལ་བཀའ་དྲིན་ཞུ་བའི་ཚབ་ཏུ་འོ་ཞིག་བྱེད་འདོད།
བརྩེ་དུང་ནི་རྨི་ལམ་ལྟ་བུའི་གར་སྟེགས་ཤིག་ཡིན་ན།
བརྩེ་དུང་གི་འགྱུར་ཁུག་ལ་སྟངས་སྟབས་སྣ་ཚོགས་ཤིག་མཆིས་སྲིད།
སྙན་ངག་གི་གོམ་འགྲོས་དལ་དྲགས་དུས།
ང་ལ་ཕྱིར་མིག་ཅེས་པའི་ཐ་སྙད་རྡོག་རྡོག་ཅིག་གིས་མནར་འོང་།
དེ་དུས་ངས་རང་དབང་གི་ཀི་ཞིག་གདབ་ཆོག་པར་ཞུ།
2020.4.6....
