འཛུམ་དཀར།
ཞོགས་འབོད། ཁྲི་འདུ།
ཚིག་དེ་གདོང་དུ་བརྐོས་པ་ནས། །
ཚིག་དེ་རུམ་དུ་བཅུག་པ་ནས། །
ཚིག་དེ་སེམས་ལ་འཇགས་པ་ནས། །
སེམས་ཚེགས་མེད་ལ་དྲན་འོང་གི །
འཛུམ་དེ་དྲན་གདུང་བྱས་པ་ནས། །
འཛུམ་དེ་སྙིང་རུས་འཐིམ་པ་ནས། །
འཛུམ་དེ་སེམས་ཁུར་མྱོང་བ་ནས། །
ངལ་དུབ་མེད་ལ་རྨིས་འཇོག་གི །
རང་གིས་བཙལ་ཏེ་རྙེད་དུས་སུ། །
རང་གིས་དྲན་དེ་བོས་དུས་སུ། །
རང་གིས་ཁས་ལེན་བྱེད་དུས་སུ། །
རང་ལ་འཚམ་པ་རང་གིས་བདམས། །
ཡིད་ཆེས་མེ་ཏོག་ཆུན་པོ་དེ། །
བརྩེ་བ་གངས་དཀར་རང་མདངས་དེ། །
དུང་བའི་སྤྲིན་པ་ཁེར་ཉལ་དེ། །
འགྱོད་མེད་བདེན་པས་དང་ལེན་བྱས། །
2020.4.10
སྐྱོ་བ།
ཞོགས་འབོད།
ལྗོན་ཤིང་ལྗང་ལོའི་སྟེང་གི །
ཡིད་འོང་མཛེས་པའི་འཇོལ་མོ། །
གཅིག་པུར་ལུས་པའི་བདག་སེམས། །
དྲོད་ཅིག་སྟེར་རོགས་གནོངས་དང་། །
གངས་སེང་འཁྱག་གིས་བསྡམས་དུས། །
གངས་འདབས་བྱེའུ་ཆུང་འཇོལ་མོ། །
སེམས་པ་སྡུག་གིས་ཟིན་པས། །
གཅོང་སྐད་མེད་དོན་ཅི་ཞིག །
བཙན་གྱིས་དེད་པའི་ལུག་ཁྱུ། །
ཁྲག་གིས་བརྫིས་པའི་ལུ་གུ། །
གནས་ལུགས་ཕྲག་པར་བླངས་ཏེ། །
ངོ་རྒོལ་མེད་དོན་ཅི་ཞིག །
བཤུ་གཞོག་རང་ལུགས་ཁྲོད་ནས། །
བདེན་པའི་གཏམ་ཞིག་བགྲང་ན། །
ཅི་བྱ་གཏོལ་མེད་གྱུར་བའི། །
སྐྱོ་བའི་མིག་ཆུ་དམར་པོ། །
2020.3.23
