དེ་དུས། (ཞར་བཀོད་གཅིག)
དུ་སྤྲིན། ཡུལ་ཤུལ།
སེམས་འདི་ཉི་མ་གབ་པའི་གྲིབ་གཟུགས་ཡིན།།
རི་དང་ཆུ་བོ་ངལ་བས་བརྒལ་ནས་འགྲོ།།
ལ་དང་ལུང་པ་གོམ་ཤུགས་སྤར་ཏེ་འགྲོ།།
རྡོ་དང་ནགས་ཚལ་རྡོག་པས་བརྫིས་ཏེ་འགྲོ།།
ཐག་རིང་མི་ཡི་མཁུར་ཚོས་མེ་ལོང་ངོས།།
འཆར་ཞིང་ལྷུང་དུས་ང་རང་ཁེར་མ་དང་།།
ཡང་ན་ཟང་ཟིང་དང་བྲལ་མཚན་མོ་ངེས།།
ཁྱོད་རང་ཞེ་ལ་ཐོགས་པ་འཇིག་རྟེན་འདིའི།།
སྙན་འཇེབས་སིལ་དཀྲོལ་གཞས་ཀྱི་དྭངས་མ་ཡིན།།
ཉན་པའི་ཚེ་ན་ཡིད་དགའ་རབ་ཏུ་རྒྱས།།
གལ་ཏེ་ང་རང་ནམ་མཁའ་སྟོང་པ་དེའི།།
ཕྱོགས་མཚམས་ཀུན་རྒྱུ་སྤྲིན་པ་ཡིན་ན་བསམ།།
དེ་དུས་ཁྱོད་ཀྱི་མཁའ་རུ་རླུང་གིས་སྤུར།།
དེ་དུས་ཁྱོད་ཀྱི་མགོ་ཐོག་སྐྲ་ལོའི་གསེང་།།
རི་སྟོད་སྨུག་སྤྲིན་འཐིབས་ལྟར་ང་ཡང་བྱུང་།།
2020/3/21
ལས་ཀྱི་ཁྱོད།
ཡུལ་འདིའི་ནམ་མཁའ་སྔོ་ཞིང་དྭངས།།
རྒྱུ་སྐར་ཚོགས་ནི་འགུལ་ཙམ་འོག།
མི་རྣམས་གཉིད་ཟིན་ཁུ་སིམ་དུས།།
ང་ནི་དལ་དལ་བཞུར་བའི་མཚོ།།
ཟླ་བ་འདི་ནི་ལས་ཀྱི་མི།།
འཆར་ཞིང་དཔྱངས་པའི་འོད་ཟེར་ནི།།
རིང་དུ་བསྲིངས་བྱས་ལག་པ་ཟུང་།།
གཅེས་པའི་ཚུལ་གྱིས་བྱིལ་བྱིལ་བཏང་།།
སྤྲིན་པ་མཁའ་མཐར་རྒྱུ་བ་འདི།།
དྲན་པ་ཡི་གེར་བྲིས་བྱས་ནས།།
རླུང་གིས་ཡང་ཡང་སྤུར་ཚུལ་ཡིན།།
གནས་པའི་ཁ་ཐག་རིང་ན་ཡང་།།
ཁྱོད་རང་སེམས་པའི་རྫིང་བུ་ནང་།།
གཏན་དུ་ཟད་མེད་ཆུ་ཐིགས་བཞིན།།
ལྷུང་ཞིང་འཁྱིལ་བའི་ལས་འདི་ཨང་།།
2020/3/9
མགུར་དབྱངས།
དབུ་བཏེགས་གཙུག་ཏོར་དགུང་དང་མཉམ།།
དར་རས་སྤྲིན་དཀར་མགུར་དུ་འཁྱུད།།
འདབ་ཆགས་ཚོགས་ནི་འཕུར་མ་ལྡིང་།།
དཔྱིད་དང་དབྱར་གྱི་དུས་ཚིགས་སུ།།
མེ་ཏོག་དཀར་དམར་ཕྲ་རྒྱན་བཏགས།།
བུང་བས་གླུ་ལེན་གར་ལ་རོལ།།
བདེ་འཇམ་མཛེས་པའི་སྤང་གཞོངས་ན།།
དུས་བཞི་ཁྱད་མེད་ནོར་ཁྱུ་རྒྱུ།།
ངོ་མཚར་བརྗོད་བྲལ་མཐའ་ཡས་པའི།།
ཛྙཱ་ན་མེ་རི་བརྗིད་བག་ལྡན།།
རྨ་སེ་བློ་གྲོས་རིན་ཆེན་གྱི།།
དགོངས་དོན་ཆར་གྱི་དྭངས་མ་ལས།།
བྱུང་བའི་བཀྲ་ཤིས་ཟུར་མང་འདི།།
སྐར་ཚོགས་ས་ལ་འཕོས་འདྲ་ཡོད།།
ཉི་ཟླ་ཐང་ལ་ལྷུང་འདྲ་ཡོད།།
རྟགས་བརྒྱད་ས་ནས་བཀྲ་འདྲ་ཡོད།།
འཐུང་ན་ཁ་ལ་མངར་མོ་ཡིན།།
རེག་ན་ལག་ལ་འཇམ་པ་ཡིན།།
མཁས་པ་ཉིད་ནི་སྤྲིན་ལྟར་འཁྲིགས།།
20/2/22
སྨོན་ལམ་འདེབས་སྟངས་གཞན།
བདག་གི་སེམས་ནི་རྣམ་པར་དྭངས།།
སྤྲིན་དང་བྲལ་བའི་ནམ་མཁའ་འདྲ།།
དེ་ཡི་དབུས་སུ་ཉི་ཟླ་ལྟར།།
བསྐོར་ནས་དལ་དལ་འགྲོ་བ་པོ།།
རིང་ནས་ཚུར་བྱོན་ལྷ་མོ་ཁྱེད།།
མ་ཆགས་ཆགས་བྲལ་བརྩེ་ཆེན་མ།།
སྤྱན་གྱི་ཞགས་པ་མ་ལྷོད་པར།།
ལུག་ཁྱུ་བཞིན་དུ་འཚོས་སམ་ཅི།།
ཁྱེད་ལ་བདག་ནི་འབུལ་ལགས་ན།།
ཁྱེད་ཀྱི་སློབ་མར་བཟུང་དུ་གསོལ།།
ནམ་མཁའི་སྤྲིན་ཐོག་བཞུགས་པ་ན།།
སྐུ་ནི་སིན་རྡུ་ར་ལྟར་དམར།།
མཛེས་ཞེས་བརྗོད་པ་བསམ་མི་ཁྱབ།།
ཟླ་བ་དེ་ནི་ཕམ་པར་བྱས།།
རྩོམ་པ་པོ་མཚམས་སྦྱོར།
དུ་སྤྲིན། དགུ་བཅུའི་སྨད་ཙམ་དུ་མོ་གྲོང་གི་ཉེ་ཕྱོགས་ཤིག་ཏུ་སྐྱེས།2015ལོ་ནས་བཟུང་གསར་རྩོམ་གྱི་ལས་ལ་ཞུགས་ཏེ་ད་ལྟའི་བར《ཁམས་པའི་རྩོམ་རིག་སྒྱུ་རྩལ》《དྲི་ཟའི་གླིང་བུ》《ཁྲི་ཤོར་རྒྱལ་མོའི་རླབས་སྒྲ》《མཚོ་སྔོན་བོད་ཡིག་གསར་འགྱུར།》《ཁམས་པའི་ཚགས་པར།》 《རྔ་བའི་ཚགས་པར།》《གཞིས་ཀ་རྩེ་ཉིན་རེའི་ཚགས་པར།》《མཚོ་ལྷོ་བོད་ཡིག་ཚགས་པར》《ཀྲུང་གོ་བོད་ཀྱི་དྲ་བ》《བཙན་པོ་མགར་གྱི་དྲ་བ》 《རྨ་ཀླུང་རིག་གནས་དྲ་བ》《ཁམས་པའི་དྲ་བ》 《ཁམས་པའི་སློབ་ཁྲིད་དྲ་བ》སོགས་དང་གཞུང་སྒེར་གང་རུང་གི་དྲ་ཚགས་དེབ་གསུམ་དུ་སྙན་ངག་ཅི་རིགས་འགའ་བཀོད་མྱོང་།
