ཚངས་དབྱངས་རྒྱ་མཚོ།
ལྷ། ཁམས་པ།
ཤག་ཆུང་སྒེའུ་ཁུང་ནས་ཟུར་མིག་འཛུམ་ཞིང་།།
བརྩེ་བའི་གླུ་ཆུང་གི་རྟ་ཁྱུ་འདེད་དུས།།
མར་ཁའི་སྨན་ཆུང་དེའི་ཐུགས་ཀྱི་ཞིང་སར།།
ལས་འཕྲོའི་སྨོན་ལམ་གྱི་འབྲུ་དྲུག་སྨིན་སོང་།།
ཁ་འབྲས་ཉི་ཟླ་བཞིན་རབ་ཏུ་མཚར་བ།།
འདུ་ཁང་གསེར་ཁྲི་ཡི་བདག་པོ་ཡིན་པའི།།
བན་ཆུང་གཞོན་པ་དེའི་ཉལ་ཁེབ་འོག་ན།།
ལྷ་སའི་གཙང་ཆུ་ཡི་ཀླུ་མོ་གཟིམས་འདུག།
གང་འདོད་གླུ་ཆུང་རེ་ངག་ནས་ཤོར་དུས།།
ལྷ་སའི་མི་ཚོགས་དག་ཅག་གེར་ལུས་འགྲོ།།
སྐབས་རེར་སྐྱོ་གི་ཟེར་ངུས་ཀྱང་ཆོག་འདྲ།།
སྨན་ཆུང་གཟི་མདངས་ཅན་ངུ་རོགས་ཡོང་གི།
སྣང་བའི་སྤང་གཞུང་གི་འཇའ་རིས་ཡག་པོ།།
ཆང་ཁང་གར་མ་དེའི་དབུ་ལ་དཀྲི་དུས།།
མགུར་ཆུང་མུ་ཏིག་གི་ཕྲེང་བ་དཀར་པོས།།
བཀྲ་ཤིས་གཡང་འགུག་ཀྱང་བྱས་པ་ཡིན་འདུག།
མགོ་བོ་ཀྲོག་ཀྲོག་གི་སྡོང་རྒན་འོག་ནས།།
ཟླ་འོད་བྱ་ཁྱུ་དག་མིག་ལ་ཐོགས་དུས།།
མ་སྐྱེ་ཨ་མ་ལགས་དྲན་པའི་གཞས་ཆུང་།།
བར་སྣང་སྤྲིན་པ་ཡི་བར་ནས་མཆེད་བཞག།
ལི་ཡུལ་ཐང་དཀར་གྱི་གཤོག་པ་འདྲ་ལེ།།
མེ་ལོང་དཀར་པོའི་ངོར་ཡང་ཡང་འཆར་བས།།
ཐ་སྙད་ཕུང་ངེ་འགའ་དབྱངས་ཀྱིས་བཙེམ་ནས།།
ཁང་ཀླད་བྱ་ཕོ་ལ་ཁྱེར་རོགས་ཞུས་སོང་།།
ལས་སྐལ་རྩྭ་སྐྱ་ཡི་གསེབ་ཏུ་བོར་བའི།།
ཞེན་པ་དགུ་ཆགས་ཀྱི་འཕྱོངས་རྒྱས་ཟླ་སྒྲོལ།།
ཡིད་སེམས་པདྨ་ཡི་གུར་ནང་བཞག་ཏེ།།
ཕྱི་མ་བདེ་ཆེན་གྱི་དག་པའི་ཞིང་ནས།།
ཐེངས་གཅིག་འཕྲད་རྒྱུ་དེ་ཞེ་ཐག་བཅད་ཐལ།།
སྡེ་གཞུང་མི་ཆེན་ཚོའི་མིག་ནས་ཡལ་བ།།
བོད་ཡུལ་བུ་མོ་ཡི་སྙིང་ཁར་བཞུག་པའི།།
རྫོང་རྒྱབ་མི་རྐྱང་དེ་རིག་འཛིན་ཚངས་དབྱངས།།
འདུ་འབྲལ་འཁོར་བ་འདིའི་ཉིན་སྲིབ་མཐོང་བས།།
ཆ་མེད་སྤྱན་ཆབ་འགའ་ཐང་དུ་ལྷུང་ཞོར།།
མི་མཐོང་མི་མཇལ་བའི་གནས་ལ་བུད་སོང་།།
