ཚངས་དབྱངས་རྒྱ་མཚོ།
ཀ་ར། རྫ་ཆུ་ཁ།
ཁྱེད་ཉིད་གངས་རི་ཡིན་ནམ་གངས་སེང་ཡིན།།
ཡང་ན་སྤྲིན་པ་ཡིན་ནམ་གཙང་བོ་ཡིན།།
སྨྲ་བ་དྲོད་དུ་ལྷུང་བའི་དབུགས་རྔམ་གྱིས།།
ཁྱེད་ཉིད་ལན་གཅིག་མགྲིན་པའི་ལྟེ་བར་བསུ།།
ཁྱེད་རང་སྙན་ངག་ཡིན་ནམ་བདུད་རྩི་ཡིན།།
ཡང་ན་མ་བྲིས་སེམས་ཀྱི་རི་མོ་ཡིན།།
སྨྲེང་བ་ཙག་དང་འདྲེས་པའི་དགུན་གྱི་ཁྱོན།།
སྙན་ངག་མེ་ལྕེ་འབར་བས་ཁྱེད་ཉིད་བསྲོ།།
ཁྱེད་ཉིད་ལྷ་ས་ཡིན་ནམ་ཇོ་བོ་ཡིན།།
ཡང་ན་མ་སྐྱེས་ཨ་མའི་དགྱེས་ཞལ་ཡིན།།
རུས་པ་གསེར་གྱིས་ཤན་པའི་བགྲེས་པོ་ཆེས།།
སྙན་པའི་ཚིག་ལ་མགུར་གྱི་དོ་ཧ་བཞེངས།།
ཁྱེད་ཉིད་མནྡར་ཡིན་ནམ་དྲུག་དཀར་ཡིན།།
ཡང་ན་ངོམས་མེད་ཨིནྡྲ་ནི་ལ་ཡིན།།
མིག་གི་འོབས་སུ་འཁྱུད་ཙམ་བྱས་པ་ན།།
ཆབ་ཀྱི་བརླན་པ་འོད་ཀྱི་དྲོད་ལ་འཐག།
ཁྱེད་ནི་རང་བྱུང་མིན་པའི་ནོར་བུ་ཉིད།།
མགུར་དང་མ་སྐྱེས་ཨ་མའི་དོ་ཤལ་ཉིད།།
ཁྱེད་ནི་བཙན་པོའི་རུས་སུ་ཉལ་བ་ཉིད།།
མ་ཕྱིས་ཟླ་བ་ལྷ་མོའི་གའུ་ཉིད།།
ཁྱེད་ནི་ངོམས་པ་མེད་པའི་མཆོད་སྡོང་ལགས།།
དབུས་ཀྱི་ཞིང་ཁ་དེ་ཡི་གངས་རི་ལགས།།
ཁྱེད་ནི་བར་བསྐོར་ནང་གི་མགྲོན་པོ་ལགས།།
མྱོས་མ་ཁྲི་མ་འབུམ་གྱི་མཐོང་བྱེད་འཕྲོགས།།
༢༠༢༠ ༡ ༢༢)
