སྐྱེས་སྐར་བསུས་པ།

ཞོགས་འབོད། ཁྲི་འདུ།

གང་གི་མདོ་སྔགས་མཆེད་པའི་ཚལ་དུ་འབྱོར་ནས། །

བར་དུ་ཐ་སྙད་རིག་གནས་སོགས་ལས་བརྩམས་ཏེ། །

གཞུང་ཆེན་བང་རིམ་ཁྲོད་ཀྱི་གཟེངས་སུ་ཐོན་པའི། །

མཛའ་གཅུགས་དྲན་པ་དཀར་པོ་ལྷོག་ལྷོག་ལྡིང་བྱུང་། །

བསླབ་གསུམ་དངུལ་གྱི་མཚོ་མོས་སེམས་རྒྱུད་བརླན་པའི། །

ཚད་མ་རིག་པའི་གནས་སོགས་རྣམ་དཔྱོད་སྨིན་པའི། །

བདེན་ལུགས་ཕྲག་ཏུ་དཔྱང་པའི་ཕ་རུས་དཀར་པོ། །

ཡེ་ནས་རྙིད་པ་མེད་པའི་རྒྱ་སེའི་མེ་ཏོག །

དེ་ཡང་སྙིང་དུ་གླན་པའི་ལང་ཚོའི་མཛེས་པ། །

ཡུན་གྱིས་རུས་རྐང་འཐིམས་པའི་བྱུ་རུ་དམར་ཆུང་། །

བརྗོད་མེད་བརྩེ་གཞུང་ངོས་ཀྱི་སེམས་འཕྲིན་ཞིག་ཏུ། །

རྣམ་ཤེས་སྙིམ་པས་བཏེགས་ཏེ་ཕུལ་བ་རྟོགས་འོང་། །

མ་བྲིས་ཨུཏྤལ་དམར་པོ་བྲོད་སེམས་བསྙལ་བ། །

མ་ལྷོད་བརྩེ་བའི་སྒེའུ་ཁུང་འོད་ཀྱིས་ཟིན་པ། །

མ་སྣོག་བག་ཆགས་སྟུག་པོ་ངང་གིས་སད་པ། །

མ་སྦགས་མེ་ཏོག་ཕྲེང་བ་ཅི་འདྲའི་མཛེས་ཨང་། །

དྲན་པ་དབྱངས་ལ་བཀུག་ནས་གླུ་རུ་ལེན་ན། །

འཁྲེན་པ་གདོང་ལ་བརྒྱུས་ནས་ཤིས་ཚིག་ཕུལ་ན། །

མི་ཚེའི་གཏན་འདུན་གཙང་མས་བློ་གཏད་བགྱིས་ན། །

འདི་ཀོ་གསེང་སྲང་སྟོང་གི་སྐྱེས་སུ་གློད་དོ། །

བདག་སེམས་གཞིས་ཀར་ཕུབ་པའི་བརྩེ་བའི་གུར་ཆུང་། །

ཕུགས་འདུན་ཕྲག་པར་བླངས་པའི་གངས་ཀྱི་ན་གཞོན། །

ཤེས་བྱའི་གཤོག་རྩལ་ཐོགས་པའི་བྱིའུ་ཆུང་འཇོལ་མོ། །

ང་ཡི་སེམས་པ་འབལ་བའི་ལུས་ཀྱི་དྲོད་ཤ །

དགའ་ཕྱོགས་ཕྲ་རྒྱན་བཏབ་པའི་སྙིང་གི་ཤམ་བུ། །

ཉིན་མཚན་དབྱེར་མེད་བརྩོན་འགྲུས་རྟ་ཕོར་ཆིབས་པ། །

ཁྱེད་ཀྱི་ངོམ་མེད་བློ་སྤོབས་གཤིས་ལུགས་མཐོང་ན། །

ཡིད་འཕྲོག་མཛེས་སྡུག་སྤུད་པ་དྲན་གཞུང་འཁྱིལ་འདྲ། །

རེ་བའི་སྨྱུ་གུ་འཆང་བའི་དུས་ཀྱི་ན་ཆུང་། །

འཁྲེང་སེམས་མེ་ཏོག་སིལ་མ་ཁྱོར་གང་གཅུས་ཏེ། །

མ་འོངས་ཉིད་ཀྱི་བཞེད་དོན་ལྷུན་གྱིས་འགྲུབ་ཤོག །

སྐུ་ཚེ་སྲིད་མཐའི་བར་དུ་བརྟན་པར་ཤོག་ཅིག །

2020.5.6 སྐྱེས་སྐར་ལ།