པིར་མིང་དབུ་འཇིགས་མེད། དངོས་མིང་གུ་རུ་རྒྱལ་མཚན།

༡༩༩༨ལོར་མདོ་སྨད་ཡུལ་གྱི་བོང་སྟག་སྡེ་བའི་འབྲོག་ཚང་དཀྱུས་མ་ཞིག་ཏུ་འཚར་ལོངས་བྱུང་།

༢༠༡༣་ལོ་ནས་བཟུང་རྙིང་མའི་དགོན་སྡེ་ཁག་ཏུ་སློབ་སྦྱོང་ག་ལ་གང་འཚམ་རེ་བྱས།།

༢༠༡༧ལོ་ནས་བཟུང་རང་གི་དགའ་ཕྱོགས་ལྟར་དུ་རྩོམ་རིག་གི་ལམ་ཁར་ཕྱོགས།།

དེ་ནས་བཟུང་མུ་མཐུད་དུ་ཁམས་པའི་ཚགས་པར། བསྟོད་དབྱངས་ཀྱི་རང་སྒྲ།

ཁམས་པའི་སློབ་ཁྲིད་ཐོན་ཁུངས་དྲ་བ། ང་ཡི་རེབ་གོང་དྲ་བ། སོགས་ཚགས་དེབ་ཀྱི་སྟེང་དུ་རྩོམ་བཀོད་མྱོང་།

སྟོང་ཆེན་ཁུག་གི་དབྱངས་རྟ།

དབུ་འཇིཊ་མེད།

ངས་མགུར་འདི་རྡོ་རྗེ་བྲག་ནས་བླངས།།

བྲག་དམར་ནག་རྩེ་ནས་ཀི་ཞིག་བཏབ།།

གཡང་ལུག་ཆུང་དེད་ནས་རི་ལ་བསྙེགས།།

རི་ཆེན་པོ་སྟོང་ཆེན་ལུང་བ་རེད།།

སྟོང་ཆེན་པོ་ཁུག་ན་དབྱངས་བརྒྱ་ཡོད།།

དབྱངས་རེ་རེ་ནང་དུ་ཚིག་རེ་ཡོད།།

ཚིག་ཕྲེང་བའི་རི་མོ་སེམས་ན་གསལ།།

སྟོང་ཆེན་པོ་གླུ་ཡིས་གུར་ཁང་ཡིན།།

ངས་བསམ་པའི་རི་མོ་ལྷ་ཡིས་ཕྲིས།།

ལྷ་དབྱངས་ཅན་ཚང་གི་རྟེན་འབྲེལ་བསྒྲིགས།

ཡང་རྟེན་འབྲེལ་རང་བཞིན་ལྷུན་གྱིས་གྲུབ།

འདི་དབྱངས་ཅན་ལྷ་ཡིས་དགོངས་པ་རེད།

སྟོང་ཆེན་པོ་བརྩེ་བའི་འདུས་མདོ་ཡིན།།

སེམས་བསམ་པའི་དབྱངས་རྟ་ཕྲ་མོ་དེ།།

ཐང་ཆེན་པོའི་ཁུག་ནས་རྣ་བའི་བཅུད།།

དབྱངས་སྙན་མོ་ངག་གི་མཆོད་པ་འབུལ།།

སྟོང་འཁོར་བའི་གསེབ་ནས་གླུ་བཙན་བླངས།།

གངས་དཀར་པོའི་དབུ་རྩེ་ལྷ་དར་འཐེན།།

ཆུ་ཆེན་པོ་རྨ་ཆུ་ཧུབ་ཀྱིས་བཏུང་།།

ལས་རླུང་རྟ་དར་བའི་བུ་རྒྱུད་ཡིན།།

ངག་བཙན་པས་གནས་ལུགས་བདེན་པའི་བཅད།།

བློ་རིག་པའི་གཤོག་རྩལ་མཁའ་རུ་མངོན།།

སྟོང་ཆེན་པོའི་དབྱིངས་ནས་མངའ་ཐང་རྒྱས།།

ཆོས་ཟབ་མོ་དབྱིངས་ལ་བདེན་པའི་དཔྱད།།

གཉུག་སེམས་ཀྱི་སྣང་མགུར།

ལྷ་ལམ་མཁའ་ནས་འོད་སྟོང་འཕྲོ་བའི།།

དབྱིག་གི་བློ་གྲོས་གཟི་འོད་མངོན་ཡོད།།

བྱ་ཁྱུ་སྐོར་ཞིག་གཙང་བོ་བསྙེགས་ནས།།

སྨུག་པོ་འབྲོག་པའི་ཐང་ཆེན་མཐོང་བྱུང་།།

འབྲོག་པའི་བུ་མོའི་མཛུམ་མདང་མངོན་ནས།།

སྐྱེས་པས་རྒྱལ་བོ་དེ་ལ་ཆགས་སོང་།།

ཞེན་ཆགས་སྙིང་གི་དབུས་སུ་སྒོམ་ནས།།

འཁོར་བའི་གནས་སུ་ད་དུང་སྒུག་ཡོད།

འཆི་མེད་ལམ་ནས་ལྷ་ཞིག་མཐོང་ན།།

ལས་སྐལ་དམར་པོ་ཞུས་ན་འདོད་བྱུང་།།

འཁོར་བའི་ཐང་ནས་ལྷ་མོ་མཇལ་ནས།།

དུང་སེམས་གཙང་མ་ཕུལ་ན་འདོད་བྱུང་།།

ཐང་སྨུག་གུར་ཁྱིམ་ནང་ན་གཡང་ཊི།།

གུར་ཁྱིམ་དཀར་པོའི་བདག་མོ་ཡིན་སོང་།།

བརྩེ་བ་གཙང་ཆུ་སྔོན་མོ་བཞུར་འདྲ།།

དུང་བ་གངས་དཀར་བཞིན་དུ་བརྟན་ཡོད།།

ཁ་བའི་མེ་ཏོག་ཞིག་སེམས་ན་བཞད།།

དུང་སེམས་གཙང་མ་ཞིག་ཁྱོད་ལ་ཕུལ།།

དྲན་པ་དམར་པོ་ཞིག་སེམས་ལ་བཟུང།།

ན་ཟུག་མང་པོ་ཞིག་སེམས་ནད་རེད།།

དྲན་པ་འདི་རླུང་བུ་ཞིག་ཡིན་ན།།

སེམས་པ་འདི་གཙང་བོ་ཞིག་ཡིན་འགྲོ།

གཙང་བོ་འདི་སེམས་པ་ལ་འདྲེས་ན།།

བརྩེ་བ་གཙང་མ་ཞིག་ཆུ་ལྟར་བཞུར།།

སྤོས་ལྡན་ནས་གྲུབ།

འཁོར་བའི་རི་རྒྱབ་ཏུ་སྙན་ངག་བྲིས།

རི་ཟོམ་མཐོན་པོ་འཁོར་བའི་རྒྱབ་གཟུགས་ནས།།

དབྱངས་གསལ་ངག་ལ་གྱེར་ནས་སྙན་ངག་བྲིས།།

ཡིད་ཀྱི་དཀའ་སྡུག་འཁོར་བའི་གྲོང་གསེབ་ནས།།

མི་ཚེ་རིང་མོ་རྨི་ལམ་ཐེངས་གཅིག་རེད།།

དར་བའི་ལང་ཚོ་ཟིན་པའི་ས་མཚམས་ནས།།

ཕྱིར་དྲན་མཚོ་མོ་འགྲམ་ནས་སྙན་ངག་བྲིས།།

བྱིས་པའི་ལང་ཚོ་གཙང་བོ་རླབས་ཕྲེང་རེད།།

སྐད་ཅིག་ཉིད་ལ་མཛེས་པའི་མེ་ཏོག་བཞིན།།

རྣམ་རྟོག་རྒོད་པོ་འཁྱུག་པའི་སྨྱུག་རྩེ་ནས།།

རྒྱུ་སྐར་གཙང་བོ་ལྟ་བཞིན་སྙན་ངག་བྲིས།།

ཚོར་བའི་གཤོག་གཟུང་བརྒལ་བའི་ལམ་སྐབས་སུ།།

སེམས་ཤོར་རི་དྭགས་མིག་ལ་སྙན་ངག་བྲིས།།

རི་མགོ་སྨུག་སྤྲིན་འཁྲིགས་པའི་བྱང་ཐང་ནས།།

རང་བྱུང་ཉི་ཟླ་གཉིས་ཀྱི་བར་མཚམས་སུ།།

སྙན་ངག་སྦྲང་ཆར་ཟིམ་མ་དལ་གྱིས་འབབ།།

བརྩེ་བའི་མེ་ཏོག་བཟང་པོ་ས་ལ་འཐོར།།

སྟོང་བའི་དབྱངས་སུ་འཁྱམ་པའི་ཕྱེ་ལེབ་ཁྱེད།།

དྲན་པའི་མིག་ཆུའི་གཞུང་ན་རྟག་དུ་བཞུགས།།

ལས་ཀྱི་ཕྱེ་ལེབ་དམར་མོ་མཚོན་བྱེད་དུ།།

སྙན་ངག་ཚིག་དུམ་གཅིག་གི་ཁྱེད་ཉིད་འབྲི།།

དབུ་འཇིགས་མེད་ཀྱི་སྙན་ངག་གཅེས་བཏུས།

པིར་མིང་དབུ་འཇིགས་མེད། དངོས་མིང་གུ་རུ་རྒྱལ་མཚན།