དབུ་འཇིགས་མེད་ཀྱི་སྙན་ངག་འོས་སྦྱོར།

པིར་མིང་དབུ་འཇིགས་མེད། དངོས་མིང་གུ་རུ་རྒྱལ་མཚན།

༡༩༩༨ལོར་མདོ་སྨད་ཡུལ་གྱི་བོང་སྟག་སྡེ་བའི་འབྲོག་ཚང་དཀྱུས་མ་ཞིག་ཏུ་འཚར་ལོངས་བྱུང་།

༢༠༡༣་ལོ་ནས་བཟུང་རྙིང་མའི་དགོན་སྡེ་ཁག་ཏུ་སློབ་སྦྱོང་ག་ལ་གང་འཚམ་རེ་བྱས།།

༢༠༡༧ལོ་ནས་བཟུང་རང་གི་དགའ་ཕྱོགས་ལྟར་དུ་རྩོམ་རིག་གི་ལམ་ཁར་ཕྱོགས།།

དེ་ནས་བཟུང་མུ་མཐུད་དུ་ཁམས་པའི་ཚགས་པར། བསྟོད་དབྱངས་ཀྱི་རང་སྒྲ།

ཁམས་པའི་སློབ་ཁྲིད་ཐོན་ཁུངས་དྲ་བ། ང་ཡི་རེབ་གོང་དྲ་བ། སོགས་ཚགས་དེབ་ཀྱི་སྟེང་དུ་རྩོམ་བཀོད་མྱོང་།

རྟོག་བཏགས་ཀྱི་ཐ་སྙད།

དབུ་འཇིགས་མེད། མཚོ་ལྷོ།

སེམས་འདི་རླུང་གིས་བསྐྱོད་པའི་དར་ཆ་བཞིན།།

འཁྲུལ་སྣང་ནམ་མཁའི་དབྱིངས་ཀྱི་འཇམ་ཚོན་འདྲ།།

སྙིང་ལ་གཟན་པའི་ཚོར་བའི་རླབས་ཕྲེང་འདི།།

སྨྱུ་གུའི་རྩེ་ལས་ས་ཆེན་དཀྱིལ་དུ་ལྷུང་།།

མི་སེམས་གཉོམ་པོའི་དགའ་སྐྱོ་ཉིན་སྲིབ་འདི།།

གྲང་ངར་རླུང་དང་འདྲེས་ནས་དགུན་ཟླ་དེར།།

རླུང་བུ་གཡུག་ཐེངས་ཤིག་གིས་གདུག་རྩུབ་ཀྱིས།།

སེམས་པ་རླུང་གིས་ཡང་ཡང་སྤྲུགས་ཀྱིན་ཡོད།།

བརྩེ་འདང་ཟབ་མོ་ཟེར་བའི་རྨི་ལམ་ཞིག།

ལུས་ཉོན་བག་ཆགས་སྤྲུགས་པའི་སྣང་བ་རེད།།

རྣམ་རྟོག་ཁྲ་མོ་ཟེར་བའི་བདེན་སྣང་འདི།།

མདང་གི་རྨི་ལམ་ཙམ་གྱིས་མ་གྲུབ་མོད།།

བདེན་པའི་དད་ཡུལ་སྐྱབས་གནས་གསུམ་པོ་ལ།།

འདི་ཕྱི་གཉིས་ཀྱིས་འདུན་མ་གཏད་ནས་ཡོང་།།

བརྩེ་བ་གཙང་བོ་འགྲོགས་ནས་བཞུད་ལམ་ནས།།

གཙང་འགྲམ་མེ་ཏོག་འཕྲད་པའི་ལས་སྨོན་འགྲིག།

ལོ་དང་ཟླ་བའི་བརྩེ་བའི་དབྱངས་རྟ་ཤིག།

སེམས་རང་མི་ལ་དམ་པོ་བཅིང་ནས་ཡོད།།

སྔོན་ལས་ཁྲེལ་གཞུང་ལྡན་པའི་ལན་བུ་ལ།།

དམ་ཚིག་གཙང་མའི་ཆུ་བོ་སེམས་སུ་འཁྱིལ།།

སྙིང་གི་སྨིན་དྲུག་ཁྲ་མོའི་སྤྲིངས་ཡིག་ནི།།

སེམས་པའི་སྒྲོམ་དུ་བཅུག་ནས་བསྡད་ན་ཡང་།།

མི་སེམས་རླུང་བུ་གཡུག་ཀྱང་དོར་ཐབས་མེད།།

ད་དུང་བརྟན་པོར་གནས་པའི་རི་རྒྱུད་འདྲ།།

དུངས་སེམས་རླུང་བུ་ལྡང་ནས་མཁའ་རུ་འཕྱོ།།

དྲན་པའི་སྤྲིན་དཀར་འདབ་མ་གཡས་འཁྱིལ་ལ།།

ཐུག་འཕྲད་སྐལ་བ་བཙལ་ནས་ཨ་ཐང་ཆད།།

ཨ་སྔོན་དབྱིངས་ལ་ཡང་ཡང་བལྟས་ཀྱིན་འདུག།

ཚོར་བ་གཙང་བོ་འདྲེས་ནས་ཕ་རོལ་ནས།།

ལོ་དང་ཟླ་བའི་ཁྲོད་ཀྱིས་འདང་མགུར་བྲིས།།

ལས་སྨོན་བརྩེ་བའི་བསིལ་རླུང་འཇམ་པོ་དེ།།

ལུས་གསེང་ཤ་གསེང་འཐིམས་པའི་ཁྲག་ཏུ་གྱུར།།

ཞེ་བློ་གངས་དང་འདྲེས་ནས་དཀར་གཙང་དེ།།

བརྩེ་བའི་དབུ་ཁྱུད་དཀར་པོ་ཚོན་རྟགས་ཡིན།།

གཙང་བོ་ཆུ་དང་བསྐུར་བའི་སེམས་འཕྲིན་དེ།།

གསེར་མིག་ཉ་མོ་ལག་ཏུ་འབྱོར་ཡོད་སྙམ།།

སེམས་ངོགས་ཀྱི་རི་མོ་གཡས་འཁྱིལ།

དབུ་འཇིཊ་མེད། མཚོ་ལྷོ།

སེམས་པའི་གསེབ་ན་དུངས་བའི་སྐད་ཆ་ཡོད། །

ཟླ་བའི་དྲི་མེད་ཡངས་བའི་དཀྱིལ་འཁོར་ནས། །

གཉོམ་དུངས་ཚིག་གི་བདུད་རྩི་ཁྱེད་ཉིད་འདྲེན། །

ལོ་ཟླའི་བསིལ་རླུང་འཇམ་པོ་ཁྱེད་ཉིད་ཕྱོགས། །

དམིགས་མེད་བརྩེ་བའི་རྫ་ཆུ་དྭངས་མ་བཞུར། །

དུངས་བའི་མཚོ་མོ་ཡིད་གཞུང་དཀྱིལ་དུ་འཁྱིལ། །

དབྱར་ལྗོངས་ཧྲིལ་བོ་བརྩེ་བའི་བཅུད་ལ་རོལ། །

སྨོན་ལམ་ཡག་པོ་བཏབ་པའི་འབྲས་བཟང་རྙེད། །

མུ་མཐའ་བྲལ་བའི་ཡངས་བའི་འཁོར་བ་ཤིག །

རྟག་བརྟན་བྲལ་བའི་ཆོས་ཉིད་གཤིས་ཀྱི་ངོར། །

གཉུག་མའི་སེམས་ཀྱི་སྣང་བའི་ཟློས་གར་ཤིག །

ཚིག་གི་ཆོ་འཕྲུལ་བཞེངས་བའི་ཕོ་བྲང་ཡོད། །

བར་ཐག་རི་ཆུ་སྟོང་གིས་བཅད་པའི་ལས། །

བསྐལ་བ་སྟོང་གིས་བསགས་པའི་རྒྱུ་ཉིད་ཡིན། །

བརྩེ་བའི་ལས་འཕྲོ་མུ་ཏིག་ཕྲེང་མཛེས་ཤིག །

བརྩེ་བ་གཙང་མའི་ས་གཞི་དྲོད་མོ་ཡིན། །

གཡུ་བྱུར་ལུས་ལ་རྒྱན་པའི་སྨིན་དྲུག་མ། །

ཚིག་དྲུག་སྙུག་མའི་ལང་ཚོ་འོད་ཟེར་འཕྲོས། །

ཡིད་དུ་ལྷུང་བའི་མེ་ཏོག་འཛུམ་པའི་གྲོལ། །

བརྩེ་བའི་གྲུ་ཆར་སེམས་སུ་བབས་ཀྱིན་ཡོད། །

གཡང་དཀར་སྤང་ལ་དེད་པའི་རྫི་བུ་མ། །

ནོར་ནག་འཚོ་བའི་འབྲོག་མོ་དཀྱུས་མ་ཡིན། །

སྲོན་རྒྱུན་བཟང་པོའི་གཞི་འཛིན་བདག་མོ་ཡིན། །

བོད་ཡུལ་ཆོས་ལ་དགའ་བའི་འབྲོག་ཕྲུག་མ། །

སྲིད་ངོགས་དཀར་ནག་གཉིས་ཀྱི་སོ་འཚམ་ན། །

ལས་དབང་ཁྲ་མོ་ཞིག་གི་བགྲོད་ལམ་ཡོད། །

སེམས་དབུས་གཙང་མ་ཞིག་གི་ཡིད་གཞུང་ན། །

འདང་ཆེན་དབྱར་ཀྱི་མེ་ཏོག་སེར་ཆེན་འཁྲུངས།།

སྙན་ཚིག་མགུར་མ་སྣང་སྟོང་དབྱིངས་སུ་གྱེར། །

དྲན་པ་བརྒྱ་སྟོང་ཚོར་བའི་དབྱངས་སུ་ལྷུང་། །

བརྩེ་བའི་དབྱངས་ཅན་ལྷ་མོ་འབོད་བཞིན་དུ། །

ངག་རིག་སྨྲ་བའི་རང་བཞིན་འཚོལ་གྱིན་འདུག །

༢༠༢༠.༥.༥ཉིན་འཕྲལ་མར་བྲིས།

སྨོན་ལམ་ཡག

ལྷད་མེད་གཙང་བོ་གངས་རི་ཡག་པོ། །

རྩེ་མོ་སྟོང་བའི་དབྱིངས་སུ་མཉམ་ཡོད། །

འདབ་མ་ཐང་ཆེན་སྤང་དུ་འཁྱིལ་ཡོད། །

སྨོན་ལམ་ཡག་པོ་དུས་སུ་བབ་ཡོད། །

རང་བྱུང་ཉི་ཟླའི་རྣ་ཆ་ཡག་བྱུང་། །

སྲིད་པའི་ས་འཛིན་དབང་པོ་མཛེས་སོང་། །

མགོ་ནག་མི་ཡི་ཡིད་ན་བཞུགས་པའི། །

གངས་དཀར་རིན་པོ་ཁྱེད་ཉིད་བརྟན་དགོས། །

མ་བཅོས་སྐད་ཀྱི་བདུད་རྩི་དྭངས་མ། །

དྲིན་ཆེན་ཨ་མའི་ཞལ་གསུང་ཡིན་ཞིང་། །

གསུང་འདི་ལྷ་ཡི་བདུད་རྩི་དངོས་ཡིན། །

སྐད་འདི་མི་ཡི་ལྷ་སྐད་བཟང་པོ། །

རང་བྱུང་མཛེས་པའི་ལུང་ཁོག་ཕྲ་མོ། །

ཕ་ཡུལ་ལུང་པའི་རང་གཤིས་ཆགས་ཡོད། །

ལྷད་མེད་རྩྭ་ཆུ་འཛོམས་པའི་ལུང་པ། །

མི་སྡེ་ཆགས་པའི་གནས་ཡུལ་སྐྱིད་པོ། །

མི་ཚེ་གཅིག་གི་གཏམ་རྒྱུད་རིང་མོ། །

སེམས་ཤོར་མི་ཡི་རུས་གསེབ་འཐིམ་ཡོད། །

བརྩེ་སེམས་མཚོ་མོ་རྫ་ཆུ་བཞུར་ནས། །

ཕ་ཡུལ་ལུང་པའི་མདོ་ནས་འདྲེས་སོང་། །

སྐད་ཆ་གསོན་པོའི་ས་གཞི་གང་ནས། །

གཏམ་དེས་ཚོར་བའི་གྲུང་ཤ་དོད་ནས། །

གསོན་ཉམས་ལྡན་པའི་སྐད་ཆའི་རང་གཤིས། །

གསོན་བྲལ་བར་དུ་བཤད་པར་ངེས་སོ། །

སྤོས་ལྡན་ནས་གྲུབ།