སྐབས་༼སོ་བརྒྱད་པའི་༽རྩོམ་རིག་འགྲན་བསྡུར་ཁྲོད་འོས་བདམས་ཀྱི་ཚད་མཐོའི་རྩོམ་ཡིག་གསུམ།

微信图片_20200526173828.jpg

འཕུར་སྐྱོད་ཀྱི་ཚོམས་The group of movement.ཚང་གི་སྐབས་༼སོ་བརྒྱད་པའི་༽རྩོམ་རིག་འགྲན་བསྡུར་ཁྲོད་འོས་བདམས་ཀྱི་ཚད་མཐོའི་རྩོམ་ཡིག་གསུམ།༽

ཟླ་གསུམ་པའི་ཁེར་གཞས།

༼ཨང་དང་པོ།༽མཛངས་འཛུམ།

ས་སྲོད་སྐར་མའི་ཁྱུ་ལ།།

སྨྲེང་བའི་མགུར་ཆུང་བླངས་ཡོད།།

རླུང་གི་གཤོག་པ་ནག་པོས།།

དྲན་པ་དྲུད་ནས་ཤོར་སོང་།།

སེམས་ཀྱི་རྐུན་པོ་གང་ཉིད།།

གློ་མཆིན་རྩིབ་མ་ཡིན་ཤག།

སྣང་བའི་རྩ་ཕྲན་སྒུལ་བ།།

སྐྱུར་ལ་མངར་བའི་ཆང་རེད།།

ཁངས་རྡུལ་བྱེ་མའི་ངོས་སུ།།

ལས་ཀྱི་ཁ་ཡིག་ལྗང་སྐྱ།།

བསྐྱར་བྲིས་ལན་མང་བྱས་པ།།

ང་ཡི་ཉེས་དམིགས་ཡིན་འགྲོ།།

བར་ཐག་མི་རིང་མི་ཐུང་།།

གནམ་ས་གཉིས་ཀྱི་མཚམས་རེད།།

རི་ཀློང་གཙང་བོའི་སོ་སྲུང་།།

བཙན་པ་དེས་ཀྱང་མ་ཁོག།

སྤྲིན་པ་ཡར་འགྲོ་ཞིག་དང་།།

ཆུ་མོ་མར་ཡོང་གཉིས་ལ།།

སེམས་འཕྲིན་གསང་བ་ཀློག་ན།།

རེ་འདུན་སྐོང་རོགས་ཨེ་མཛད།།

ཉིན་ཞག་བརྩེགས་པའི་ལོ་ཟླ།།

དུས་ཚོད་སྤུང་བའི་ཚེ་སྲོག།

སྐྱོར་མཁན་ཡིད་ཀྱི་ལྷ་ལ།།

དད་མོས་བྲག་ལ་རི་མོ།།

རེ་སྒུག་སྐྱོ་གར་ཁུར་བའི།།

འཚོ་བ་ཕྱི་དཀར་ནང་ནག།

ཚེ་ཡི་སྐྱོ་བ་འཛེད་རོགས། །

ཞེ་རྩར་ལྷུང་བའི་སྒྲུང་ཡིན།།

ཡིད་ཀྱི་སྒོམ་ཁང་ནང་ལ།།

གངས་ཀྱི་རྨི་ལམ་རུམ་པ།།

རྒུད་པ་ཆང་ལ་བཅོལ་བའི།།

འདས་པའི་སྡིག་སྒྲིབ་ཡིན་སྲིད།།

སྟོན་གཞུང་སྡོང་ལོའི་ཟིལ་ཆུ།།

ཁ་བའི་མདངས་སུ་སིམ་པ།།

ཉི་འོད་སྤང་ལ་ཞེན་པའི།།

མཛའ་བརྩེའི་རྩིབ་རུས་ཙམ་མོ།།

སྲིད་པའི་གངས་རྒྱབ་འཁྱག་པར།།

ཞོགས་པའི་འཐོར་རླུང་ལྡང་དུས།།

སྤྲིན་སྨུག་ཡོལ་བའི་ཕག་གི།

ཉི་མའི་འོད་དེ་འཆར་ཤོག།

རང་སེམས་ཡུལ་མཐའི་ལུང་ཀྱོག།

གཙང་འགྲམ་རྡོ་ལ་དར་ཆགས།།

གྲང་ངར་དགུན་གྱི་ལྷགས་རླུང་།།

ཚོར་བའི་ཕྱི་ནང་གཉིས་སོ།།

ཡིག་ཆུང་གསེབ་ཀྱི་འཁོར་བ།།

སྡུག་པ་ཡིད་ཀྱི་མཆོད་ཀོང་།།

འདང་བརྩེའི་མུ་གེ་ཐེབས་མཁན།།

དྲན་པའི་མེ་ལ་ལྕེབས་འགྲོ།།

མ་བཅོས་གཤིས་ཀྱི་རང་མདངས།།

མངོན་ལྐོག་མེད་པའི་མེ་ལོང་།།

སྐྱེ་བ་དུ་མའི་ལན་ཆགས།།

ཁེར་རྐྱང་གཞས་འདིས་འཇལ་ལོ།།

2020/3/25/

ཨ་མ་མ་ལོ་ང་ལ་སྒུག་ཙམ་མཛོད།

༼ཨང་གཉིས་པ།༽སེའུ།

ལོ་ཟླའི་ཁ་བས་དབུ་སྐྱེས་མདངས་བསྒྱུར་ཅིང་།།

ན་ཚོད་གཙང་བོའི་རླབས་ཀྱིས་ཐོད་པར་བཀང་།།

མི་རྟག་རླུང་བུས་ཚིག་དྲུག་གཟུགས་གཞི་སྒུར།།

ཨ་མ་དྲིན་ཆེན་རྒས་པའི་ཀློང་ན་འདུག །

ལུས་ཀྱི་ཕོན་པོ་ཡུལ་དུ་གནས་ན་ཡང་།།

སེམས་ཀྱི་ངལ་བས་བུ་ཡི་སྐྱིད་སྡུག་འཚོལ།།

ཕྲིང་བ་བགྲང་པའི་སེམས་སྐྱེད་ཚང་བ་ཞིག །

མི་ནུས་ཡོད་ཚད་བུ་དང་བུ་མོ་ལ།།

བསམ་པའི་ཨ་མ་སྡུག་བསྔལ་ཀློང་ན་འདུག །

རི་ཆུ་མང་པོས་ཆོད་ཀྱང་དུངས་སེམས་ཀྱི།།

འདུན་པའི་མཐོང་རྒྱུ་མེད་པའི་ང་ཡི་ཕྱོགས།།

ལག་གཡས་ཐོད་པར་ཀེར་ནས་རྒྱང་མིག་བཅས།།

ཨ་མ་དྲིན་ཆེན་མིག་ཆུའི་ཀློང་ན་འདུག །

ཚེ་ཡི་ལན་བུ་དེ་ཙམ་མ་དཀར་དང་།།

ཐུགས་ཀྱི་སྨྲེང་བ་དེ་ཙམ་མ་གསོག་དང་།།

སྤྱན་ཆུའི་གཙང་བོ་དེ་ཙམ་གྲུག་དང་།།

ང་རང་ཁྱེད་ཀྱི་གམ་དུ་ནམ་ཞིག་ཏུ།།

ལོག་ནས་ཁྱེད་ལ་དྲིན་གྱི་བུ་ལོན་འཇལ།།

ཨ་མ་མ་ལོ་ང་ལ་སྒུག་ཙམ་མཛོད།།

༢༠༢༠/༠༥/༡༠

འཇིགས་མེད་བླ་མ་རྗེས་སུ་དྲན་པ།

༼ཨང་གསུམ་པ།༽མེ་དོང་།

འཇིགས་མེད་གཞི་དབྱིངས་ཐིག་ལེ་འོད་ལྔའི་ཀློང་ནས།།

ཕུན་ཚོགས་མ་འགག་བརྩེ་བའི་ཕྲིན་ལས་གཅིག་གིས།།

རྒྱུད་གསུམ་སྡེ་བཞིའི་པད་ཚལ་ཅིག་ཅར་སྐྱོང་བའི།།

དཔལ་ཡོན་ཕན་བདེའི་ཉི་མར་གུས་པས་འདུད་དོ།།

འཇམ་དཔལ་གཞོན་ནུ་དགྱེས་པའི་ཉ་གང་ཟླ་བ།།

སྒྱུ་མའི་མེ་ཏོག་ནང་གི་བསྟན་པ་འཕོས་ཚུལ།།

རྒྱུ་སྐར་ས་རུ་བབས་ནས་འཇའ་ཚོན་ཕྲོས་ཡོད།།

དགྱེས་ཞལ་ཟླ་བ་དཀར་པོའི་དྲོད་ཁོལ་ཡལ་མེད།།

བཅོ་ལྔའི་ཟླ་བ་དཀར་པོ་འཕྲོ་ཐེངས་རེ་ལ།།

མཛད་འཕྲིན་བྱེ་བ་ས་ཡ་ཡིན་ཆགས་བྱས་ཏེ།།

ནམ་མཁའི་རྒྱ་ཕིབས་ངོས་སུ་མིག་ཞགས་འཁོར་ཞོར།།

གསོལ་འདེབས་ཚིག་གི་དབྱངས་རྟ་བཀུག་ནས་སྡོད་ཡོད།།

སྐུ་ཡི་མཚན་དཔེའི་ཉི་མ་ཞིང་དུ་གཤེགས་ཀྱང་།།

འདས་པས་ཞག་གྲངས་སྟོང་གི་བགྲང་བྱ་མང་ཡང་།།

མིག་ཟུང་རྒྱུ་སྐར་ཁྲ་མོ་འཕྲོས་ནས་སྡོད་ན།།

བྱིན་རླབས་བདུད་རྩིའི་གྲུ་ཆར་ཨེ་ཐོབ་བསམ་ཡོད།།

ཕྱོགས་བཞི་སྤྲིན་དཀར་དེ་ཚོ་དབྱིངས་སུ་གཟིམ་རོགས།།

གཙང་ཆུ་ལུང་བ་བདུན་གྱི་ཡོན་ཆབ་བཤམ་ནས།།

སླར་ཡང་མཐོ་སར་འཕུར་བའི་ཁྱུང་ཆེན་ཞིག་ལ།།

དབྱངས་ཀྱི་རོལ་མོ་དཀྲོལ་ནས་མཇལ་ཁ་ཞུ་དགོས།།

མཁྱེན་རབ་འོད་སྟོང་འབར་བའི་སྐུ་ཡི་གཟི་འོད།།

རེ་སྒུག་དགྱེས་ཞལ་མཇལ་བའི་སྐལ་བཟང་ཞིག་ལ།།

སྒྲིབ་གཡོག་རྡུལ་ཙམ་མེད་པའི་ཨ་སྔོན་དབྱིངས་ནས།།

མཐོན་པོའི་ཐད་ལ་ཕེབས་ནས་གཟིགས་ཙམ་གནང་རོགས།།

མདོར་ན་སྨག་ཆེན་སྲིད་པའི་འཁོར་བའི་ཚང་ནས།།

སྔོན་བསགས་རྣམ་དཀར་དགེ་བའི་མཐུ་རུ་རྟོགས་པའི།།

འདྲེན་མཆོག་དཔལ་ལྡན་བླ་མའི་ཐུགས་རྩེ་དྲོན་མོས།།

ཚེ་རབས་ཀུན་ཏུ་རྗེས་སུ་བསྙེག་པར་གྱུར་ཅིག།

སྐྱབས་གཅིག་འཁོར་ལོའི་མགོན་པོ་ཆོས་རྗེ་༧ཡིད་བཞིན་ནོར་བུ་མཆོག་གི་གཟུགས་སྐུ་ཆོས་དབྱིངས་སུ་བསྡུས་ཏེ་ལོ་འཁོར་བཅུ་དྲུག་ལོན་པའི་མཚན་མོ་སྟེ། བོད་རབ་རྒྱན་ས་ཕག་ལོའི་ཟླ་བ་བཅུ་གཅིག་པའི་ཚེས་བཅོ་ལྔའི་ས་སྲོད་དུ་བླ་རུང་ནས།