གོ་ཁྲབ་ཉི་མས་སྙན་རྩོམ་ཚན་པ་གསུམ།

སྒུག་ཡུན་རིང་བའི་མེ་ཏོག

སྣ་ཚོགས་ཟློས་གར་གྱི་མི་ཚེའི་ཁྲོད་ནས། །
ཉི་ཟླའི་ངོ་གདོང་ལ་མཛུབ་མོ་ཀེར་ཀྱང་། །
རང་སྣང་འཇིག་རྟེན་གྱི་རྟེན་འབྲེལ་ཟབ་མོས། །
མ་བརྟན་ལོ་ཟླ་ཡི་རི་དྭགས་དཀྲོགས་སོང་། །

སྟོང་ཆེན་མཁའ་དབྱིངས་ཀྱི་ཟླ་བའི་ངོས་སུ། །
ཁྱོད་རང་དྲན་དྲན་གྱི་ན་ཟུག་བྲིས་ན། །
གཟུགས་མེད་ཁྱོད་འཛིན་གྱི་སེམས་པའི་དཀྱིལ་ནས། །
འགྲན་བྲལ་ཐོལ་བྱུང་གི་སྐྱོ་གླུ་རྡོལ་ཡོང་། །

འདི་སྣང་ཆོས་ཀུན་ཏུ་སྒྱུ་མ་འདྲ་ཡང་། །
བདེན་འཛིན་ཨ་འཐས་ཀྱི་ཞེན་ཆགས་ཕུང་པོའི། །
མེད་ལ་ཡོད་ཡོད་ཀྱི་ཚོགས་དྲུག་སྣང་བས། །
བར་མེད་ཡུན་རིང་ལ་ཁྱོད་རྗེས་འཚོལ་ངེས། །

ངག་ལ་དབང་སྒྱུར་གྱི་ཚངས་སྲས་ལྷ་མོས། །
གྲོགས་ལ་གང་འདོད་ཀྱི་ནོར་བུ་སྩོལ་ན། །
མི་ཆེན་མངའ་འབངས་ཀྱི་སྟོབས་འབྱོར་མི་དགོས། །
ཅང་མེད་སྙིང་སྡུག་མ་ཐོབ་ན་དེས་ཆོག །

འཛུམ་ཞལ་བསིལ་བྱེད་ཀྱིས་དྲན་གདུང་སེལ་ཞིང་། །
སྙིང་གཏམ་ཆུ་མིག་གི་གསང་མདུད་དཀྲོལ་དུས། །
བརྩེ་བའི་མེ་ལོང་ལ་རྙིང་རྒྱུ་མེད་ན། །
དབུ་སྐྲའི་ཁ་དོག་འདི་འགྱུར་ན་ལོས་ཆོག །

བཏབ་ཀྱང་མ་སྨིན་པའི་བྱུ་རུའི་མེ་ཏོག །
ཁོག་པའི་སྙིང་ཆུང་གི་ཁྲག་ལ་བསྲེས་ན། །
བདེ་ལྡན་རྨི་ལམ་གྱི་ཕོ་བྲང་ནང་ནས། །
བྱིན་རླབས་ཚན་ཁ་ཞིག་འབར་ན་བསམ་བྱུང་། །

གཞོན་པ་སྟོང་འདུས་ཀྱི་ཟུར་ཁ་ཞིག་ནས། །
ཁེར་རྐྱང་འཚོ་བ་འདིའི་ཡང་སྙིང་ཁྱོད་ཡིན། །
ཟླ་འོད་རབ་གསལ་གྱི་མཚན་མོ་རེ་རེར། །
བརྩེ་བའི་རུམ་ནང་དུ་དལ་གྱིས་ཕེབས་ཤོག །

--2020/5/25 /མཚན་མོར་བྲིས།

སྨན་ཁང་ནང་གི་ཚིག་དུམ།

དུང་ཟླ་བ་མཁའ་ནས་འཛུམ་སྟེ། །
ས་དོག་མོའི་མུན་པ་སེལ་དུས། །
སེམས་བསམ་པ་དུང་ཟླ་འདྲ་བའི། །
ངའི་སྡེ་ཆེན་རོགས་ལོ་དྲན་སོང་། །

མཚན་ཐུན་གསུམ་རྨི་ལམ་ནང་ནས། །
རོགས་ཁྱེད་རང་མཇལ་བ་རྨིས་དུས། །
ནངས་ཡར་ལང་ཁྱེད་རང་མེད་པས། །
མིག་ཁྲ་ཆུང་མཆི་མས་རྣོང་སོང་། །

ས་རང་ཡུལ་རིག་པའི་གཞུང་ན། །
ནང་ཕུ་ནུའི་མཉམ་དུ་བསྡད་ཀྱང་། །
སེམས་བདག་མེད་རྟ་རྒོད་རི་བ། །
སྟོད་རྫ་ལུང་འགྲིམ་ནས་ཤོར་སོང་། །

གཡུ་ཞུན་མར་ཙག་གིས་བཅོམ་དུས། །
བྱ་ཁྲུང་ཁྲུང་ལྷོ་རུ་འཕུར་ཐལ། །
སང་གནངས་མོ་ནམ་ཟླ་ཡག་དུས། །
དགུང་ནམ་འཕང་བཅག་གིན་ལོག་ཡོང་། །

ལོ་ཟླ་བའི་ཟློས་གར་ཁྲོད་ནས། །
ལུས་འབྱུང་བཞི་ནད་ཀྱིས་མནར་བས། །
ཁྱོད་འུ་གཉིས་འབྲལ་དགོས་བྱུང་རུང་། །
སླར་འཛོམ་པའི་དམ་བཅའ་བཞག་ཡོད། །

ནད་ཚབ་ཆེན་སྨན་ཁང་ཞིག་ནས། །
སེམས་ངལ་བ་བྱེ་བས་མནན་ཡང་། །
རོགས་རིན་ཆེན་ཡིན་བཞིན་རོར་བུ། །
ཁྱོད་མ་དྲན་ཉི་མ་གཅིག་མེད། །

རོགས་ཁྱེད་རང་མཐོང་ཐོས་མེད་པས། །
ས་རང་ཡུལ་སྐྱིད་སྣང་མི་འདུག །
དགུན་ཁ་བ་བུ་ཡུག་ཁྲོད་ནས། །
སེམས་ཡིད་ཐང་ཆད་ནས་བལྟས་ཡོད

མགོའི་སྐྲ་ལོ་རླུང་ལ་བཟན་ནས། །
ས་ཐག་རིང་ཞིག་ནས་ལྟ་དུས། །
ཡུལ་ག་འགྲོ་རང་དབང་ཐོབ་པའི། །
རྒོད་ཐང་དཀར་ཡིན་ན་བསམ་བྱུང་། །

༢༠༢༠ ༡༡ ༢༥

སྙིང་སྡུག་ཆོས་སྒྲོན།

ཡིད་འཕྲོག་སྐུ་ཡིས་འདབ་མ་སྟོང་ལྡན་འཕྱ། །
སྣ་ཚོགས་གསུང་གིས་དྲི་ཟའི་གླིང་བུ་སྨོད། །
ཟབ་ཡངས་ཐུགས་རྗེས་ཟླ་བའི་མ་མ་འཁུ། །
སྙིང་སྡུག་ཆོས་སྒྲོན་ཁོ་བོའི་ཡིད་ཀྱི་རྟེན། །

ལུས་ཀྱི་བར་ཐག་མུ་ཁྱུད་སྟར་གྱིས་བཅད། །
དྲན་པའི་རི་ལ་སྐྱོ་བའི་ན་བུན་འཁྲིགས། །
རང་ཡུལ་ཉི་ཟླ་གདུང་བའི་སྨག་གིས་བཟས། །
སྙིང་སྡུག་ཆོས་སྒྲོན་འཚོ་བའི་འོད་ཟེར་ཉིད། །

ལྷད་མེད་བརྩེ་བའི་སྤྱན་རས་བདག་ལ་གཟིགས། །
འཛད་མེད་དགའ་སྐྱིད་ཚིག་གི་པི་ཝང་འཁྲོལ། །
སྲིད་པའི་བུད་མེད་ཡོངས་ཀྱི་འཕགས་མ་ཞིག །
སྙིང་སྡུག་ཆོས་སྒྲོན་འཁོར་བའི་སྙིང་པོ་ཡིན། །

མི་རེའི་སྔོན་དུ་གདོང་རེ་མི་བསྟོན་ལ། །
ང་རང་ཁོ་ནར་སྟོན་ཟླ་རྒྱས་བཞིན་འཛུམ། །
སྐལ་བཟང་ལས་ཀྱིས་ཐོབ་པ་སྲིད་པའི་ནོར། །
སྙིང་སྡུག་ཆོས་སྒྲོན་ཚེ་ཡི་རྒྱབ་རི་བཞིན། །

བཤད་པའི་ཚིག་ཀུན་འགྱུར་མེད་བྲག་ལྟར་སྲ། །
གྲོགས་ཀྱི་སླད་དུ་སྲོག་ཀྱང་མི་འཛེམས་པའི། །
ཕྱི་མར་ཁྲིད་ཀྱང་དུང་བའི་ཆོད་སེམས་ཅན། །
སྙིང་སྡུག་ཆོས་སྒྲོན་སྲོག་གི་ཕྱེད་ཀ་ལགས། །

༢༣ ༡༠ ༢༠༢༠ རང་ཡུལ་ནས།