བརྩེ་བ་སེམས་ཀྱིས་གཉོར་བའི་ལོ་ཟླ།

དུངས་སེམས་ལས་ཀྱི་ཐག་པ་རིང་མོ་འདིས།།
ང་དང་ཁྱེད་རང་ཡུན་དུ་བཅིངས་པ་སྟེ།།
གདུང་བ་ཞེ་ལ་འཁྱིལ་བའི་ལོ་ཟླ་ཡང་།།
ད་ཚོད་རྫོགས་པའི་མཐའ་རུ་དམིགས་པ་ལགས།།།
དགུང་མཐའ་མུན་པ་བསལ་བའི་གུར་ཁྱིམ་དུ།།
གཞའ་རིས་བརྩེ་བའི་རྨི་ལམ་ཤར་བའི་མོད།།
ད་ནི་ཆུ་དང་འོ་མ་འདྲེས་པ་ལྟར།།
ཁྱེད་དང་ལྷན་དུ་བསྡད་ན་དགའ་བ་ལ།།
སྒྱུ་འཕྲུལ་གར་གྱིས་མཚར་བའི་དེང་རབས་ཀྱི།།
དུངས་པ་བདེན་རྫུན་བར་མའི་སོ་མཚམས་ན།།
འུ་གཉིས་དྲན་པ་དྭངས་མའི་ཆུ་ངོགས་སུ།།
རྟག་བརྟན་གསེར་གྱི་གཡུང་དྲུང་མཛེས་པ་ལགས།།
ཡེ་སྲིད་གངས་ཀྱི་རི་བོའི་འདབས་རོལ་ནས།།
ང་ཡི་ཚེ་རབས་སྲུང་བའི་དྲན་པ་རུ།།
མདུད་པ་སྙིང་ལ་བཅུག་པའི་འཁོར་བ་ཉིད།།
ད་མཚམས་བརྒལ་ཀྱང་འཕྱི་བར་མ་ལགས་སོ།།
མ་ཕམ་གཡུ་མཚོ་སྔོན་མོའི་འགྲམ་ངོགས་ཀྱི།།
རེ་སྒུག་ཡུན་ལ་འཚོས་པའི་དམ་བཅའ་རུ།།
ད་ནི་ལྷོ་མཐའི་ངང་བ་དཀར་བོ་ལྟར།།
ཁྱེད་རང་པང་དུ་འབྱོར་བའི་གཏམ་རྒྱུད་ཀྱང་།།
ང་ཡི་སྙན་ངག་བརྩིགས་པའི་སྒྱེ་གསེབ་ནས།།
རང་ཚུགས་རྣོ་དབལ་ཚ་བའི་གྲི་དངོ་རུ།།
ད་ལྟ་མེ་ལོང་བཞིན་དུ་འཆར་བ་ལགས།།
ད་ལྟ་རྨི་ལམ་ལྟར་དུ་རྨིས་པ་ལགས།།
ཨེ་མ་ང་ཡི་སྐྱབས་གསུམ་དམ་པ་ལགས།།
ང་ལ་ཀུ་རེ་གནང་བ་མ་བྱེད་ཅིག།
ང་ཡི་རྨི་ལམ་རྟག་ཏུ་སྲུང་བར་མཛོད།།
ང་ཡི་མེ་ལོང་སྔར་བཞིན་གསལ་བར་ཤོག།
ཕྱི་ལོ་༢༠༡༩ལོའི་ཟླ་༡་ཚེས་༢༧ཉིན་གྱི་མཚན་མོའི་ཆུ་ཚོད་1:20སྟེང་གྲུབ།