༡ སྒྲོལ་མ་མྱུར་མ་དཔའ་མོ།
སྲིད་ཞིའི་གདུང་བ་འཛུམ་གྱིས་སེལ་ཞིང་།།
འགྲོ་དོན་ཐུགས་བསྐྱེད་རབ་ཏུ་མྱུར་མ།།
མཐའ་ཀླས་གདུལ་བྱའི་སྣང་བར་འཐིབ་པའི།།
ཉོན་མོངས་ན་བུན་འཇོམས་པའི་དཔའ་མོ།།
༢ སྒྲོལ་མ་དབྱངས་ཅན་མ།
རེག་མེད་སྲིད་པའི་ནམ་མཁའི་གར་སྟེགས།།
གཡོ་མེད་བཞད་པའི་སྐར་ཚོགས་ཁྲོད་དུ།།
གཉུག་གཤིས་བདེན་གྲུབ་སྟོན་ཟླའི་ཞལ་ལས།།
ཀུན་རྨོངས་འཇོམས་པའི་འོད་རབ་འཕྲོ་མ།།
རེག་མེད་སྲིད་པའི་ནམ་མཁའི་གར་སྟེགས།།
གཡོ་མེད་བཞད་པའི་སྐར་ཚོགས་ཁྲོད་དུ།།
གཉུག་གཤིས་བདེན་གྲུབ་སྟོན་ཟླའི་ཞལ་ལས།།
ཀུན་རྨོངས་འཇོམས་པའི་འོད་རབ་འཕྲོ་མ།།
༣ སྒྲོལ་མ་བསོད་ནམས་མཆོག་སྟེར་མ།
སྣང་བ་མཁའ་ལ་བསྙེགས་པའི་ལང་ཚོ།།
པདྨའི་འཁྲི་ཤིང་གཡོ་བའི་སྐྱེས་གཟུགས།།
མཚམས་སྤྲིན་ཀློང་ན་རྗེན་པར་འགྱིང་ཞིང་།།
བསོད་ནམས་སྐྲ་ལོ་མཁའ་ནས་དཔྱངས་མ།།
སྣང་བ་མཁའ་ལ་བསྙེགས་པའི་ལང་ཚོ།།
པདྨའི་འཁྲི་ཤིང་གཡོ་བའི་སྐྱེས་གཟུགས།།
མཚམས་སྤྲིན་ཀློང་ན་རྗེན་པར་འགྱིང་ཞིང་།།
བསོད་ནམས་སྐྲ་ལོ་མཁའ་ནས་དཔྱངས་མ།།
༤ སྒྲོལ་མ་རྣམ་རྒྱལ་མ།
མི་ཤིག་མཐོན་པོ་གནམ་གྱི་ཕོ་བྲང་།།
རྒྱལ་བའི་སྲས་ཀྱི་སྙིང་གི་ཐིག་ལེ།།
ལྷ་དང་ལྷ་མའི་སྐྱབས་ཀྱི་དྭངས་མ།།
ཕྱག་འཚལ་སྙིམ་པའི་མེ་ཏོག་གཏོར་མ།།
༥ སྒྲོལ་མ་རིག་བྱེད་མ།
རྫུ་འཕྲུལ་གློག་ཞགས་རྟ་རུ་བཅིབས་ནས།།
ཕྱོགས་ཀྱི་འཁོར་ལོའི་སྐྱེ་རྒུའི་འགྲོ་བ།།
མ་དག་འཁོར་བའི་གཡང་ནས་སྐྱོབ་མཁན།།
འབུམ་ཕྲག་མིག་གིས་རེ་བའི་མ་མ།།
རྫུ་འཕྲུལ་གློག་ཞགས་རྟ་རུ་བཅིབས་ནས།།
ཕྱོགས་ཀྱི་འཁོར་ལོའི་སྐྱེ་རྒུའི་འགྲོ་བ།།
མ་དག་འཁོར་བའི་གཡང་ནས་སྐྱོབ་མཁན།།
འབུམ་ཕྲག་མིག་གིས་རེ་བའི་མ་མ།།
༦ སྒྲོལ་མ་འཇིགས་བྱེད་མ།
ཞི་ལ་ཞི་བའི་ཉམས་ལྡན་ཟླ་མོ།།
རྒྱས་ལ་རྒྱས་པའི་ཚུལ་གྱིས་སྐྱོང་མ།།
དབང་ལ་དབང་གི་གར་མཛད་ནག་མོ།།
དྲག་ལ་དྲག་པོའི་ལས་ཀྱིས་སྒྲོལ་མ།།
༧ སྒྲོལ་མ་གཞན་གྱིས་མི་ཐུབ་མ།
རྒྱུ་འབྲས་གོ་ལྡོག་རྣོན་པོའི་མདུང་རྩེ།།
ལྷ་ཆོས་སྙིང་ཁར་ཤུགས་ཀྱིས་གཏད་པས།།
སྒྲ་བརྒྱ་བ་ཡི་གདངས་དང་འགྲོགས་ཏེ།།
དྲག་པོའི་གསུང་གིས་སྦྱོར་ངན་བཤིག་མ།།
རྒྱུ་འབྲས་གོ་ལྡོག་རྣོན་པོའི་མདུང་རྩེ།།
ལྷ་ཆོས་སྙིང་ཁར་ཤུགས་ཀྱིས་གཏད་པས།།
སྒྲ་བརྒྱ་བ་ཡི་གདངས་དང་འགྲོགས་ཏེ།།
དྲག་པོའི་གསུང་གིས་སྦྱོར་ངན་བཤིག་མ།།
༨ སྒྲོལ་མ་གཞན་ལས་རྒྱལ་མ།
མགྲིན་པ་དུང་གི་འཁོར་ལོའི་རྩེ་ནས།།
ཏུཏྟ་ར་ཡི་གསུང་གི་སྒྱུ་འཕྲུལ།།
མ་དག་འགྲོ་བའི་ཐོས་འཛིན་སིམ་པས།།
ཉོན་མོངས་བདུད་ཚོགས་རྣམ་པར་འཇོམས་མ།།
༩ སེང་ལྡིང་ནགས་ཀྱི་སྒྲོལ་མ།
མི་ཕྱེད་དད་པའི་མེ་ལྕེ་དམར་པོ།།
སེང་ལྡིང་ནགས་ཀྱི་གསེབ་ཏུ་སྦར་བས།།
སྲིད་མཚོ་ཉམས་ངར་ལྷུང་བའི་འགྲོ་བ།།
སྐད་ཅིག་རྣམ་གྲོལ་གླིང་དུ་ཁྲིད་མ།།
མི་ཕྱེད་དད་པའི་མེ་ལྕེ་དམར་པོ།།
སེང་ལྡིང་ནགས་ཀྱི་གསེབ་ཏུ་སྦར་བས།།
སྲིད་མཚོ་ཉམས་ངར་ལྷུང་བའི་འགྲོ་བ།།
སྐད་ཅིག་རྣམ་གྲོལ་གླིང་དུ་ཁྲིད་མ།།
༡༠ སྒྲོལ་མ་འཇིག་རྟེན་གསུམ་རྒྱལ་མ།
ཕྱག་འཚལ་རང་སྣང་སྤྲུལ་བའི་ལྷ་མོ།།
ཡིད་འཕྲོག་མཛེས་མའི་རྣམ་པར་རོལ་མ།།
མཉེན་ལྕུག་སོར་མོའི་ཕྱག་རྒྱའི་གདུགས་ཀྱིས།།
འགྲོ་ལ་གྲིབ་བསིལ་སྟེར་བའི་དགའ་མ།།
༡༡ སྒྲོལ་མ་ནོར་སྟེར་མ།
ཛམྦུའི་འཁྲི་ཤིང་ལྡེམ་པའི་སྟེང་གི།
ཀུན་སྙོམས་ཐུགས་རྗེའི་སྤྱན་གྱི་ནོར་བུས།།
མཐའ་ཀླས་འགྲོ་བའི་ཁམས་ལ་གཟིགས་པས།།
སྐྱེ་རྒུའི་སེམས་ཅན་ཕོངས་ལས་སྒྲོལ་མ།།
ཛམྦུའི་འཁྲི་ཤིང་ལྡེམ་པའི་སྟེང་གི།
ཀུན་སྙོམས་ཐུགས་རྗེའི་སྤྱན་གྱི་ནོར་བུས།།
མཐའ་ཀླས་འགྲོ་བའི་ཁམས་ལ་གཟིགས་པས།།
སྐྱེ་རྒུའི་སེམས་ཅན་ཕོངས་ལས་སྒྲོལ་མ།།
༡༢ སྒྲོལ་མ་བཀྲ་ཤིས་དོན་བྱེད་མ།
པདྨའི་ཡལ་གའི་རྣ་ལུང་འགུལ་བའི།།
དག་པ་མཁའ་སྤྱོད་སར་གནས་ལྷ་མོ།།
ཚེས་གཅིག་ཟླ་བས་དབུ་ལ་རྒྱན་ནས།།
འོད་ཟེར་ཕྱོགས་ཀྱི་འཁོར་ལོར་འབར་མ།།
༡༣ སྒྲོལ་མ་དགྲ་དཔུང་འཇོམས་མཛད་མ།
བསྐལ་བ་མེ་དཔུང་འབར་བའི་ཀློང་དུ།།
ཞབས་གཉིས་སྣོལ་བའི་སྟབས་ཀྱིས་བཞུགས་ནས།།
སྲིད་ཞུའི་སྲོག་ཏུ་སྦྲུམ་པའི་ཉོན་མོངས།།
ལུས་པ་མེད་པར་ཕ་མཐར་སྤྲད་མ།།
བསྐལ་བ་མེ་དཔུང་འབར་བའི་ཀློང་དུ།།
ཞབས་གཉིས་སྣོལ་བའི་སྟབས་ཀྱིས་བཞུགས་ནས།།
སྲིད་ཞུའི་སྲོག་ཏུ་སྦྲུམ་པའི་ཉོན་མོངས།།
ལུས་པ་མེད་པར་ཕ་མཐར་སྤྲད་མ།།
༡༤ སྒྲོལ་མ་ཁྲོ་གཉེར་ཅན་མཛད་མ།
རྫོགས་ལྡན་པདྨའི་ཁྲི་ལ་བཞུགས་མ།།
གང་གི་སྤྱན་ཟུང་གློག་ཞགས་འཁྱུག་པའི།།
འོད་ཀྱི་ཀློང་ནས་ཧཱུྃ་ཡིག་བརྡོལ་བས།།
སྒྲིབ་གཉིས་ཆུ་འཛིན་ཡོངས་སུ་དག་མ།།
༡༥ སྒྲོལ་མ་རབ་ཞི་མ།
མུ་ཏིག་འཁྲི་ཤིང་གསར་བའི་རྩེ་མོའི།།
མི་ཟད་བཞད་པའི་སྙིང་རྗེའི་མེ་ཏོག།
མཐའ་ཡས་ནམ་མཁའི་དབྱིངས་སུ་གཏོར་བས།།
སྦྱིན་པའི་གེ་སར་ཆར་དུ་བསྙིལ་མ།།
མུ་ཏིག་འཁྲི་ཤིང་གསར་བའི་རྩེ་མོའི།།
མི་ཟད་བཞད་པའི་སྙིང་རྗེའི་མེ་ཏོག།
མཐའ་ཡས་ནམ་མཁའི་དབྱིངས་སུ་གཏོར་བས།།
སྦྱིན་པའི་གེ་སར་ཆར་དུ་བསྙིལ་མ།།
༡༦ སྒྲོལ་མ་འབར་བའི་འོད་ཅན་མ།
མ་རིག་འཁྲུལ་བའི་དགུ་མདུད་དཀྲོལ་ཕྱིར།།
རྒྱལ་ཀུན་གསུང་གི་སྙིང་པོ་གཅིག་བསྡུས།།
ཡི་གེ་བཅུ་བོ་འགག་པ་མེད་པར།།
ཕས་རྒོལ་སྲོག་གི་གཤེད་དུ་སྒྲོག་མ།།
༡༧ སྒྲོལ་མ་དཔག་མེད་གནོན་མ།
རྙོག་བྲལ་སྟོང་གསུམ་སྟོང་གི་འཇིག་རྟེན།།
སེམས་མེད་ལྗོན་པ་ལྗོན་པའི་ཡལ་ག།
ལྗོན་པའི་གསེབ་ཀྱི་རི་དྭགས་འདར་བྱེད།།
ཕྱག་འཚལ་ཁྲོ་མོ་ཧཱུྃ་ཡིག་སྤྲུལ་མ།
རྙོག་བྲལ་སྟོང་གསུམ་སྟོང་གི་འཇིག་རྟེན།།
སེམས་མེད་ལྗོན་པ་ལྗོན་པའི་ཡལ་ག།
ལྗོན་པའི་གསེབ་ཀྱི་རི་དྭགས་འདར་བྱེད།།
ཕྱག་འཚལ་ཁྲོ་མོ་ཧཱུྃ་ཡིག་སྤྲུལ་མ།
༡༨ སྒྲོལ་མ་རྨ་བྱ་ཆེན་མོ།
དཀར་འཇམ་ཟླ་ཤེལ་བྲང་གི་མེ་ལོང་།།
སྤངས་རྟོགས་ལང་ཚོའི་མྱོས་བུམ་འབུར་ཞིང་།།
རྨི་ལམ་ཡུལ་གྱི་མོས་ལྡན་བུ་ལ།།
མི་ཟད་འོ་མ་ལྡུད་པའི་མ་མ།།
༡༩ སྒྲོལ་མ་མི་ཕམ་རྒྱལ་མོ།
སྣང་བའི་སྨིག་རྒྱུ་འཁྲིགས་པའི་ཡུལ་གྱི།།
དག་པ་འོད་འཕྲོ་གཞལ་ཡས་ཁང་ཆེན།།
ལྷ་དང་ལྷ་མའི་ཚོགས་ཀྱི་རྣ་བར།།
ཡང་དག་ཆོས་ཀྱི་སྙན་གླུ་སྒྲོག་མ།།
སྣང་བའི་སྨིག་རྒྱུ་འཁྲིགས་པའི་ཡུལ་གྱི།།
དག་པ་འོད་འཕྲོ་གཞལ་ཡས་ཁང་ཆེན།།
ལྷ་དང་ལྷ་མའི་ཚོགས་ཀྱི་རྣ་བར།།
ཡང་དག་ཆོས་ཀྱི་སྙན་གླུ་སྒྲོག་མ།།
༢༠སྒྲོལ་མ་རི་ཁྲོད་མ།
བསྐལ་བའི་ཆུ་འཛིན་བརྩེགས་པའི་ནམ་མཁར།།
ཟུག་པའི་ལྷུན་པོ་སྲིད་པའི་བླ་རིར།།
སྤྱན་གྱི་ཉི་ཟླའི་འོད་ཀྱིས་བཏབས་པའི།།
ཨུཏྤལ་འདབ་མའི་སྟེང་དུ་གནས་མ།།
༢༡སྒྲོལ་མ་འོད་ཟེར་ཅན་མ།
སྤྱན་ཟུང་ཉི་ཟླ་ཀེམ་ཀེམ་གཡོ་བའི།།
འཇམ་པོ་གནག་སྣུམ་སྨིན་མའི་གཞུ་རྒྱུད།།
ལས་ཤོར་དུངས་ཞེན་སྐྱེན་པོའི་མདའ་མོ།།
བདག་ལ་ལས་དང་སྐལ་གྱིས་ཕོགས་མ།།
སྤྱན་ཟུང་ཉི་ཟླ་ཀེམ་ཀེམ་གཡོ་བའི།།
འཇམ་པོ་གནག་སྣུམ་སྨིན་མའི་གཞུ་རྒྱུད།།
ལས་ཤོར་དུངས་ཞེན་སྐྱེན་པོའི་མདའ་མོ།།
བདག་ལ་ལས་དང་སྐལ་གྱིས་ཕོགས་མ།།
