ཕ་ཡུལ་རྡོ་སྦིས།

བོད་མདོ་སྨད་རྟ་ཡི་ཆོལ་ཁ།།

ཆུ་རྨ་རླུང་སྒེག་མོའི་ཤར་ཕྱོགས།།

ཡུལ་རྡོ་སྦིས་གསེར་སྨུག་ལྗོངས་འདི།།

སྔོན་ཐུ་བྷོད་དཔུང་གི་རྒྱུད་པ།།

སྟོད་དར་རྒྱ་མང་པོ་རྗེ་འདི།།

རྗེ་བཙན་པོ་མང་སྲོང་མཛངས་བློན།།

ཡུལ་རྡོ་སྦིས་གཡང་རའི་ཡུལ་ལྷ།།

ངེད་ཡུལ་མི་སྤུན་ཟླའི་མགོན་སྐྱབས།།

གོང་གཏེར་བདག་སྟོང་རི་བརྗིད་པོ།།

རྟ་ནོར་ལུག་འཕེལ་ཁ་དར་ས།།

འབྲི་མཛོ་མོའི་འོ་མ་རང་འཁྱིལ།།

ཡུལ་འགྲོ་བའི་རེ་བ་བཅོལ་ས།།

བར་གཉན་ཆེན་རྫ་རི་གོང་ཡེ།།

སྨད་རྒྱ་ནག་འཇམ་དབྱངས་གོང་མའི།།

མཐའ་སྲུང་བའི་དམག་སྤྱི་ཆེན་མོ།།

ཡུལ་རྡོ་སྦིས་སྤྱན་གྱིས་གཟིགས་ཡོད།།

ངའི་ཕ་ཡུལ་གཡང་གི་ར་བ།།

ཡུལ་མདོ་སྨད་ས་ཡི་ཐིག་ལེ།།

རྡོ་སྦིས་གུར་ལྷུན་གྱིས་བརྗིད་པ།།

མགོན་གསེར་རིའི་ཕྲེང་བའི་འཁྲུངས་ཡུལ།།

ལྷོ་འཛམ་བུ་གླིང་ལ་གྲགས་པའི།།

སྐྱབས་རྗེ་བཙུན་ཤེས་རབ་རྒྱ་མཚོ།།

སྤྱིར་ཕ་ཡུལ་རྡོ་སྦིས་གཟི་བརྗིད།།

སྒོས་གངས་ཅན་བོད་ཀྱི་བླ་སྲོག།།

ས་པད་མ་འདབ་བརྒྱད་བཀོད་པ།།

རྫ་སྤང་རི་དགུང་ལ་ཟུགས་འདྲ།།

ནགས་ཚང་ཚིང་གཡུ་ལོ་རྒྱས་ས།།

ཆུ་གཙང་ཆབ་རླབས་ཕྲེང་རྩེན་ས།།

སྟོད་དར་རྒྱ་གཡུ་མཚོ་སྔོན་མོ།།

རྫ་བྲག་རིའི་གཡང་སའི་ཕང་བར།།

གཡུ་མེ་ལོང་ས་ལ་ལྷུང་འདྲར།།

སྔོ་ལྟེམ་མེར་འཁྱིལ་བ་ཨ་མཚར།།

བར་ཨ་མདོ་མཆོད་རྟེན་རང་བྱོན།།

དཔེ་འགྲན་བྲལ་འཛམ་གླིང་རྒྱན་གཅིག།

ཡིད་དད་པའི་ཞིང་མཆོག་དམ་པ།།

ངའི་རྡོ་སྦིས་ཕ་སའི་རྒྱན་ཡིན།།

སྨད་སྟོང་རིའི་ལྷ་མཚོ་སྔོན་མོ།།

མཛེས་མ་བོས་མགྲོན་པོ་འདུ་ས།།

མགོན་ལྷ་ལུང་དཔལ་གྱི་རྡོ་རྗེའི།།

སྒོམ་སྒྲུབ་གནས་བྱིན་རླབས་གཡས་འཁྱིལ།།

ཡུལ་ཕ་ཡུལ་རྡོ་སྦིས་གསེར་་ལྗོངས།།

ཤེས་རིག་པའི་འདབ་རྒྱ་གྲོལ་ས།།

དེང་ཤེས་ལྡན་མི་སྣའི་དཔུང་ཚོགས།།

དགུང་ནམ་མཁའི་སྐར་ཚོགས་ཤར་འདྲ།།

ངའི་ཕ་ཡུལ་གཡང་གི་ར་བ།།

གོང་རྒན་རབས་དད་འདུན་བརྟན་ས།།

སྟག་ཤ་ར་བློ་སྤོབས་ལྡན་ས།།

སྨན་བུ་མོ་ཁྲེལ་གཞུང་ཡོད་ས།།

མཛེས་ཕ་ཡུལ་རྡོ་སྦིས་ཡུལ་འདི།།

ང་བུ་ཆུང་སྐྱེས་ས་སྐྱེས་ཡུལ།།

ངའི་སེམས་ཀྱི་དུངས་བ་རང་འཁོར།།

སེམས་དགའ་བའི་བསྟོད་གླུ་འབུལ་ས།།