རྣར་ཡང་མི་འགྲོ།

ལན་བརྒྱར་ཞུས་ཀྱང་རྣར་ཡང་མི་འགྲོ།།
ཚིག་གི་རྟིང་མར་གྲུབ་པའི་སྙིང་གཏམ།།
དུང་བའི་མི་ཁྱོད་དྲངས་ལ་བསམ་ཡང་།།
ཤ་དང་རུས་པའི་བརྩེ་ཆང་ཞིམ་པོ།།

ཚིག་དེ་ཞིམ་པོ་ཆང་ལས་མངར་བ།།
མངར་ཁ་བཙན་པོ་བརྩེ་བའི་བརྡ་ཡིན།།
བརྡ་གླུ་རིང་མོ་སྐད་ལ་བཀུག་ཀྱང་།།
མ་འདྲིས་བུ་མོའི་རྣར་ཡང་མི་འགྲོ།།

འགྲོ་བའི་གོམ་ཆུང་མཉེན་ལྕུག་ལྡན་པ།།
ངག་སྒོའི་ཚིག་འབྲུ་ལྷོད་ཤ་འཛོམས་པ།།
འཛོམས་པའི་བུ་མོར་དུང་བའི་སྙིང་གཏམ།།
གླེང་བའི་གོ་སྐབས་ཤིན་ཏུ་ཕྲ་བ།།

འཇིག་རྟེན་རལ་གྲི་སོ་གཉིས་ཤིག་སྟེ།།
སེམས་གྱི་ན་བུན་དྭངས་ཐབས་མི་འདུག།
སྐྱོ་བའི་དུབ་པའི་སྙིང་ཆུང་དམར་པོ།།
ན་ཟུག་འགག་འཕྲང་དོག་མོར་ལྷུང་བྱུང་།།

རྒྱང་ལ་བསྐུར་བའི་འཕྲིན་གྱི་གཉོམ་ཤ།།
ཁོ་མོའི་བྲང་ལ་ལན་གཅིག་འཁྱུད་ཀྱང་།།
རྫོགས་ལྡན་དུས་ཀྱི་ཟང་ཟིང་བསམ་ནས།།
དྲན་པའི་མི་མོའི་རྣར་ཡང་མ་སོང་།།

མི་རྟག་ལས་ཀྱི་འདུ་འགོད་བཙན་པོ།།
འཁོར་བའི་རི་ལ་གང་བྱུང་རྒྱུག་པས།།
སེམས་ཀྱི་ཟབ་སར་བྱུང་བའི་བཟི་ཁ།།
འདོད་པའི་སྨན་ཤར་རྣར་ཡང་མི་འགྲོ།།

སྤྲིན་དཀར་བསིལ་གྲིབ་ཐོད་ལ་བཟུང་སྟེ།།
དགའ་མགུ་ཡི་རང་ཁོ་མོར་བྱས་ཀྱང་།།
ལྷད་ཀྱིས་མ་གོས་འཆར་སྣང་གསོན་པོ།།
སེམས་ཚེགས་རྒོད་པོས་རྨག་མེད་བཟོས་སོང་།།

སྐྱ་རེངས་སྐྱ་མདའི་སྐར་མའི་ངོགས་སུ།།
བྱུང་བའི་དགའ་ཞེན་དྭངས་གཙང་ཡིན་ཀྱང་།།
སྒྱུ་མའི་ཆོས་ཉིད་དབང་ཤུགས་བཙན་པས།།
འཁྲེང་བའི་བུ་མོའི་རྣར་ཡང་མི་འགྲོ།།

ལས་འབྲས་རྡོག་ཁྲེས་ཨེན་ཙམ་ལྕི་བས།།
བརྩེ་ཆང་ཞིམ་པོར་བྲོ་བ་དབེན་འདྲ།།
ཡིན་ཡང་མ་འཕྲད་ལས་ཀྱི་བུ་མོར།།
ཐུག་ཕྲད་བྱུང་ན་ག་ཙམ་དགའ་ཨང་།།

འདྲིས་དང་མ་འདྲིས་བཤད་ཀྱང་མི་དགོས།།
མ་འདྲིས་ཁོ་མོ་ལས་ཀྱི་རྟེན་ཡིན།།
རྟེན་དུ་བཞེངས་པའི་དཔ༵ལ་གྱི་བུ་མོ།།
སྟོང་དཀྲུགས་མ༵ཚོ་མོའི་ནང་གི་ནོར་ཡིན།།

ཚིག་ལ་ཚིག་ལན་བཏབ་པར་དཔགས་ན།།
ཁེངས་པ་ཤིན་ཏུ་སྐྱུང་བའི་ཚོད་རེད།།
ཁྲ་ཆུང་མིག་ལ་བསྙལ་བའི་མི་ཁྱོད།།
མ་ལོབས་ལས་ཀྱིས་ལོབས་པའི་མི་ཡིན།།

ཡིན་ཀྱང་ངས་ནི་དྲན་པ་དྲགས་སམ།།
དྲན་པའི་རི་མོའི་ཚོན་ཁ་མཐུག་སོང་།།
ཁྱོད་ལ་བཏང་བའི་ཚིག་འབྲུ་སྙི་མོ།།
ལས་འཕྲད་བུ་མོའི་རྣར་ཡང་མི་འགྲོ།།

༢༠༢༢ལོའི་སྤྱི་ཟླ༨པའི་ཚེས་པ༢༠ཉིན་བྲིས།